12-Nov-2020

ପାଟଣାଗଡ଼, - ଗତକାଲି ପାଟଣାଗଡ ସହର ବ୍ରହ୍ମପୁରା ସ୍ଥିତ ସଅଁରା ପଡା ଠାରେ ଘଟି ଗଲା ଏକ ଲୋମହର୍ଷଣକାରୀ  ଘଟଣା । ଫେରିବାଲା କାମ କରି ନିଜର ଗୁଜୁରାଣ ମେଣ୍ଟାଉଥିବା ଗୋଟିଏ ଅଣଓଡ଼ିଆ ପରିବାରର ୬ ଜଣଙ୍କ ଏକା ସଙ୍ଗରେ ମୃତ୍ୟୁ ଘଟଣା ସକାଳେ ପ୍ରଘଟ ହେବା ପରେ ପାଟଣାଗଡ଼ ସହରରେ ଚାଞ୍ଚାଲ୍ୟ ସୃଷ୍ଟି ହୋଇଥିଲା । ଏହି ଫେରିବାଲା ପରିବାର ଝାରଖଣ୍ଡ ରାଜ୍ୟର ବାଗବରା ଅଞ୍ଚଳର ମୂଳ ବାସୀନ୍ଦା ହୋଇଥିବା ବେଲେ ଏମାନେ ବହୁ ବର୍ଷରୁ ବ୍ରହ୍ମପୁରା ଅଞ୍ଚଳରେ ରହି ଛୋଟମୋଟ ବ୍ୟବସାୟ କରି ଆସୁଥିଲେ । ସବୁଠାରୁ ଦୁଃଖଦ ଖବର ହେଲା, ଏପରି ଅମାନୁଷିକ କାରବାରରେ ବଳି ପଡିଛନ୍ତି ତିନି ଜଣ ନିଷ୍ପାପ ଶିଶୁ । ଛଅ ଜଣଙ୍କ ଶବ ପଡିଥିବା ହୃଦୟ ବିଦାରରକ ଦୃଶ୍ୟ ଦେଖିଲେ ଯାହାର ହେଲେ ବି ରୋମ ଟାଙ୍କୁରି ଉଠିବ । ପୂର୍ବ ଶତୃତାକୁ କେନ୍ଦ୍ର କରି ହିଁ ଏପରି ଏକ ନାରକୀୟ କାଣ୍ଡ ସଫଳ ରୂପ ଦେଲେ ଅପରାଧୀ ମାନେ । ତେବେ ହତ୍ୟାର ପ୍ରକୃତ କାରଣ କଣ ଏବଂହତ୍ୟା ପଛରେ କେତେ ଜଣଙ୍କ ହାତ ରହିଛି, ତାହାର ପୁଙ୍ଖାନୁପୁଙ୍ଖ ତଦନ୍ତ କରୁଛି ପୋଲିସ । 
 

ନଭେମ୍ବର ୧ଠ ତାରିଖ ବିଳମ୍ବିତ ରାତ୍ରୀରେ  ଘଟଣା ଘଟିଥିବା ଅନୁମାନ କରାଯାଉଛି । ହତ୍ୟାର ଶିକାର ହୋଇଛନ୍ତି ବୁଲୁ ଜାନି(୫ଠ), ତାଙ୍କ ସ୍ତ୍ରୀ ଜ୍ୟୋତି(୪୮),  ଓ ଦୁଇ ପୁଅ ଭୀଷ୍ମ(୫) ଓ ସଂଜୀବ(୨), ଦୁଇ ଝିଅ ସରିତା(୧୪) ଓ ଶ୍ରୀୟା(୩) ।  ସକାଳ ୧ଠ ଟା ପର୍ଯ୍ୟନ୍ତ ଘରୁ କେହି ନ ବାହାରିବାରୁ ଲୋକଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା । ଘର ପାଖ ପୋଡଶୀ ମାନେ ପୋଲିସକୁ ଖବର ଦେବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ଗୋଟିଏ ପରିବାରର ୬ଜଣଙ୍କ ରକ୍ତ ଜୁଡୁବୁଡୁ ଶବ ପଡିଥିବା ଦେଖିବାକୁ ମିଳିଥିଲା । ଅନୁସନ୍ଧାନରୁ ଜଣାପଡିଛି ଯେ, ପାଟଣାଗଡ଼ ବ୍ରହ୍ମପୁରା ଅଞ୍ଚଳରେ ଏକ ଅଣଓଡିଆ ପରିବାର ବହୁ ଦିନରୁ ରହି ବ୍ୟବସାୟ କରି ଆସୁଥିଲେ । ଘରର ମୁରବୀ କୁହାଯାଉଥିବା ବୁଲୁୁ ଜାନିଙ୍କ ୮ଟି ପୁଅ ଓ ୨ ଟି ଝିଅ ମଧ୍ୟରେ ସୌଭାଗ୍ୟବସତଃ ମୃତ୍ୟୁମୁଖରୁ ବର୍ତ୍ତି ଯାଇଥିବା ୩ଟି ପୁଅ  ସରୋଜ, ବିକାଶ ଓ ଫିରୋଜ ଭୁବନେଶ୍ୱର ରହି ବସଷ୍ଟାଣ୍ଡରେ ଫେରିବାଲା ଭାବରେ କାମ କରୁଥିଲେ ।

 ପରିବାରର ୬ଜଣଙ୍କ ମୃତ୍ୟୁ ଖବର ପାଇବା ପରେ ତିନି ପୁଅ ପାଟଣାଗଡ଼ରେ ପହଞ୍ଚିଛନ୍ତି । ଏହି ହତ୍ୟା ଘଟଣା ପଛରେ ୬-୭ଲୋକଙ୍କ ହାତ ରହିଥିବା ମୃତକଙ୍କ ପୁଅ ସରୋଜ କହିଥିବା ବେଳେ ପ୍ରାୟ ୨-୩ବର୍ଷ ପୂର୍ବରୁ ବ୍ରହ୍ମପୁରା ଅଞ୍ଚଳର ଶିବା ଜାନି ଓ ତାଙ୍କ ଭେଣେଇ ସହ କୌଣସି କାରଣରୁ ମୃତକଙ୍କ ପାରିବାରର ଶତୃତା ଥିବା ଏବଂ ଘଟଣା ଥାନାରେ କଂପ୍ରମାଇଜ୍ ହୋଇସାରିଥିବା କହିଛନ୍ତି । ତେବେ ବଲାଙ୍ଗୀର ଏସ୍‌ପି ସନ୍ଦୀପ ସଂପତଙ୍କ ସମେତ ସାଇଣ୍ଟ୍ଟିଫିକ୍ ଟିମ୍ ଘଟଣାର ତଦନ୍ତ କରୁିଛନ୍ତି । ଏହି ଘଟଣାରେ ସଂପୃକ୍ତ ଥିବା ସନ୍ଦେହରେ ପାଟଣାଗଡ଼ ପୋଲିସ ସିଦ୍ଧା ଜାନି ଓ ପ୍ରତାପ ଜାନୀ ନାମକ ଦୁଇ ଜଣ ଯୁବକଙ୍କୁ ଥାନାରେ ଆଣି ଅଟକ ରଖିଛି । । ଏମାନଙ୍କ ଟାରୁ ହିଁ ଘଟଣାର ପ୍ରକୃତ ରହସ୍ୟ ଓ ହତ୍ୟାକାରୀଙ୍କ ସୁରାକ ପାଇବ ବୋଲି ପୋଲିସ ବୋଲି ଅନୁମାନ କରାଯାଉଛି । ତେବେ ଖୁବ ଶୀଘ୍ର ହତ୍ୟାକାଣ୍ଡ ଘଟଣାରେ ସଂପୃକ୍ତ ଥିବା ଅପରାଧୀ ମାନଙ୍କୁ ଗିରଫ କରାଯିବ ବୋଲି ବଲାଙ୍ଗୀର ଏସ୍‌ପି ସନ୍ଦୀପ ସଂପତ ସୂଚନା ଦେଇଛନ୍ତି ।