05-Aug-2026

ସମ୍ବଲପୁର:(ସଂଜୀବ ପାଣିଗ୍ରାହୀ )

ସମ୍ବଲପୁର ସହରର ମୋଦିପଡ଼ା ସ୍ଥିତ ଦୁର୍ଗା ମନ୍ଦିର ନିକଟରେ ଡ୍ରେନ୍‌ ଉପରେ ହୋଇଥିବା ବେଆଇନ ଜବରଦଖଲ ଉଚ୍ଛେଦ ଏବଂ ସହରର ଜଳନିଷ୍କାସନ ବ୍ୟବସ୍ଥାକୁ ସୁଚାରୁ ରୂପେ ପରିଚାଳିତ କରିବା ଉଦ୍ଦେଶ୍ୟରେ ଏକ ବ୍ୟାପକ ମିଳିତ ଅଭିଯାନ ସଫଳତାର ସହ ସମ୍ପାଦିତ ହୋଇଯାଇଛି। ସମ୍ବଲପୁର ମହାନଗର ନିଗମର ନିର୍ଦ୍ଦେଶନାରେ ଆୟୋଜିତ ଏହି ସ୍ୱତନ୍ତ୍ର ଅଭିଯାନରେ ସମ୍ବଲପୁର ମହାନଗର ନିଗମ ର ସ୍ୱଚ୍ଛତା ଟିମ୍ ‘ନିର୍ମଳ’, ଟାଟା ପାୱାର (TPWODL), ୱାଟକୋ (WATCO) ଏବଂ ସ୍ଥାନୀୟ କେବୁଲ୍ ଅପରେଟରମାନେ ମିଳିତ ଭାବେ ସାମିଲ ହୋଇଥିଲେ।

ଏହି ଅଭିଯାନ ସମୟରେ ଡ୍ରେନ୍‌ର ସ୍ୱାଭାବିକ ଜଳ ପ୍ରବାହରେ ବାଧା ସୃଷ୍ଟି କରୁଥିବା ବିଭିନ୍ନ ଅସ୍ଥାୟୀ ନିର୍ମାଣ ଓ ବେଆଇନ ଜବରଦଖଲଗୁଡ଼ିକୁ ସମ୍ପୂର୍ଣ୍ଣ ଉଚ୍ଛେଦ କରାଯିବା ସହ ବୃହତ ସଫେଇ କାର୍ଯ୍ୟ ହାତକୁ ନିଆଯାଇଥିଲା। ସମ୍ବଲପୁର ମହାନଗର ନିଗମ ର ‘ନିର୍ମଳ’ ଟିମ୍ ଅତ୍ୟନ୍ତ ନିଷ୍ଠାର ସହ ଡ୍ରେନ୍‌ ଭିତରେ ଜମା ହୋଇ ରହିଥିବା ଆବର୍ଜନା, ପ୍ଲାଷ୍ଟିକ୍ ଫୋପାଡ଼ା ଓ ଗାଢ଼ ପଙ୍କ ସଫା କରି ବର୍ଷା ଜଳର ସୁଗମ ପ୍ରବାହ ସୁନିଶ୍ଚିତ କରିଛନ୍ତି।

ଏହା ସହିତ ରାସ୍ତାଘାଟରେ ସାଧାରଣ ନାଗରିକଙ୍କ ଯାତାୟାତରେ ବାଧା ସୃଷ୍ଟି କରୁଥିବା ଅନାବଶ୍ୟକ ତଥା ବିପଜ୍ଜନକ ବିଦ୍ୟୁତ ଖୁଣ୍ଟ, ଟେଲିଫୋନ୍ ଓ କେବୁଲ ତାର ଏବଂ ପାନୀୟ ଜଳ ପାଇପ୍‌ଗୁଡ଼ିକୁ ସମ୍ପୃକ୍ତ ବିଭାଗୀୟ ଅଫିସରମାନଙ୍କ ସୁଦୃଢ଼ ସମନ୍ୱୟରେ ତୁରନ୍ତ ସ୍ଥାନାନ୍ତର ଓ ଅପସାରଣ କରାଯାଇଛି। ସହରରେ ସୁଦୃଢ଼ ଜଳନିଷ୍କାସନ ବ୍ୟବସ୍ଥା, ଉନ୍ନତ ପରିମଳ ପରିଚାଳନା ଏବଂ ସ୍ୱଚ୍ଛ ତଥା ନିରାପଦ ସହରୀ ପରିବେଶ ପ୍ରଦାନ କରିବା ପାଇଁ ପ୍ରଶାସନ ପକ୍ଷରୁ ଏହିଭଳି ପଦକ୍ଷେପ ଆଗାମୀ ଦିନରେ ମଧ୍ୟ ଜାରି ରହିବ। ଡେପୁଟି କମିସନର ଶ୍ରୀ ଶୁଶାନ୍ତ ସାହୁ, additional tahasildar ଶ୍ରୀ ପ୍ରତାପ ଶଙ୍କର ଦାସ ପ୍ରମୁଖ ଉପସ୍ଥିତ ଥିଲେ।