19-Jul-2026

ଅତାବିରା(ଆକାଶ ମିଶ୍ର): ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ (ଓଷ୍ଟା) ଅତାବିରା ବ୍ଲକ ପକ୍ଷରୁ ଏକ ମହନୀୟ ତଥା ମାନବୀୟ ପଦକ୍ଷେପ ସ୍ଵରୂପ ସ୍ୱର୍ଗତ ସୁଶୀଲ ଭୁଏଙ୍କ ଶୋକସନ୍ତପ୍ତ ପରିବାର ବର୍ଗଙ୍କୁ ୫,୦୦୦ ଟଙ୍କାର ଆର୍ଥିକ ସହାୟତା ରାଶି ପ୍ରଦାନ କରାଯାଇଛି।ସୂଚନାଯୋଗ୍ୟ ଯେ, ଅତାବିରା ବ୍ଲକ ଅନ୍ତର୍ଗତ ନୂତନ ଅନୁଦାନ ପ୍ରାପ୍ତ ଲରାସରା ଉଚ୍ଚ ବିଦ୍ୟାଳୟର ଚତୁର୍ଥ ଶ୍ରେଣୀ କର୍ମଚାରୀ ଭାବେ କାର୍ଯ୍ୟରତ ଥିବା ସୁଶୀଲ ଭୁଏ ଗତ ୯ ତାରିଖ ଦିନ ବୁର୍ଲା ବଡ଼ ଡାକ୍ତରଖାନାରେ ଚିକିତ୍ସିତ ଅବସ୍ଥାରେ ମୃତ୍ୟୁବରଣ କରିଥିଲେ। ମୃତ୍ୟୁ ବେଳକୁ ତାଙ୍କର ଆହୁରି ୧୨ ବର୍ଷର ଚାକିରି କାଳ ବାକି ରହିଥିଲା। ଓଷ୍ଟା ସଂଘର ନିୟମାନୁଯାୟୀ, ଅନୁଦାନ ପ୍ରାପ୍ତ ବିଦ୍ୟାଳୟଗୁଡ଼ିକରେ କାର୍ଯ୍ୟରତ କୌଣସି ଶିକ୍ଷକ ବା କର୍ମଚାରୀଙ୍କ ଅକାଳ ବିୟୋଗ ଘଟିଲେ ସଂଘ ପକ୍ଷରୁ ପରିବାରକୁ ଏହି ସହାୟତା ରାଶି ପ୍ରଦାନ କରାଯାଇଥାଏ।
ପ୍ରକାଶଥାଉ କି, ଓଷ୍ଟା କେବଳ ଶିକ୍ଷକ ଓ କର୍ମଚାରୀମାନଙ୍କ ହକ୍ ତଥା ନ୍ୟାଯ୍ୟ ଦାବି ପାଇଁ ଲଢ଼େଇ କରିବାରେ ସୀମିତ ନାହିଁ, ବରଂ ସର୍ବଦା ସେମାନଙ୍କ ସୁଖ-ଦୁଃଖର ସାଥୀ ହୋଇ ରହିଆସିଛି। ବିଭିନ୍ନ ସମୟରେ ରାଜ୍ୟରେ ଦେଖାଦେଉଥିବା ବନ୍ୟା, ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ ସମୟରେ ବିପନ୍ନଙ୍କ ପାଖରେ ପହଞ୍ଚି ଖାଦ୍ୟ ସାମଗ୍ରୀ ବଣ୍ଟନ କରିବା ସହ ଆର୍ଥିକ ସହାୟତା ଯୋଗାଇଦେଇ ସଂଘ ସଦାସର୍ବଦା ନିଜର ସାମାଜିକ ଦାୟିତ୍ୱବୋଧ ଓ ବଦାନ୍ୟତାର ପରିଚୟ ଦେଇ ଆସିଛି।
ଏହି ପରିପ୍ରେକ୍ଷୀରେ ଆଜି ଓଷ୍ଟାର ବ୍ଲକ ତଥା ଜିଲ୍ଲା ସ୍ତରୀୟ

କର୍ମକର୍ତ୍ତାମାନେ ସ୍ୱର୍ଗତ ଭୁଏଙ୍କ ବାସଭବନରେ ପହଞ୍ଚି ପରିବାର ବର୍ଗଙ୍କୁ ଗଭୀର ସମବେଦନା ଜଣାଇବା ସହ ଉକ୍ତ ଆର୍ଥିକ ସହାୟତା ରାଶି ହସ୍ତାନ୍ତର କରିଥିଲେ। ଏହି ଅବସରରେ ଓଷ୍ଟା ଜିଲ୍ଲା ଉପସଭାପତି ସଚ୍ଚିଦାନନ୍ଦ ପ୍ରଧାନ, ଯୁଗ୍ମ ସମ୍ପାଦକ ଯାଦବ ପ୍ରଧାନ, ବ୍ଲକ ସମ୍ପାଦକ ପ୍ରସନ୍ନ ବେହେରା, ଲରାସରା ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ମନବୋଧ ମାଝୀ ଏବଂ ଶିକ୍ଷକ ରବି ନାରାୟଣ ପ୍ରଧାନ ପ୍ରମୁଖ ଉପସ୍ଥିତ ଥିଲେ। ବିପତ୍ତି ସମୟରେ ଓଷ୍ଟା ସଂଘର ଏଭଳି ସହାନୁଭୂତିପୂର୍ଣ୍ଣ ସେବା ମନୋଭାବକୁ ସ୍ଥାନୀୟ ଅଞ୍ଚଳରେ ବେଶ୍ ପ୍ରଶଂସା କରାଯାଇଛି।