10-Jun-2026

ରେଙ୍ଗାଲିକ୍ୟାମ୍ପ(ଆକାଶ ମିଶ୍ର):  ଜୁନ୍ ଶେଷ ସୁଦ୍ଧା ରବି ଧାନ ସଂଗ୍ରହ ପ୍ରକ୍ରିୟା ଶେଷ କରିବାକୁ ସରକାର ଲକ୍ଷ୍ୟ ରଖିଥିବା ବେଳେ ଏବେ ବି ହଜାର ହଜାର ଚାଷୀ ସେମାନଙ୍କର ପ୍ରାପ୍ୟ ଟୋକନ୍‌ ପାଇବାରୁ ବଞ୍ଚିତ ଅଛନ୍ତି। ମାତ୍ର କୋଡ଼ିଏ ଦିନ ସମୟ ବାକି ଥିବା ବେଳେ ବହୁ ଚାଷୀଙ୍କ ଦ୍ଵିତୀୟ ଓ ତୃତୀୟ ପର୍ଯ୍ୟାୟ ଟୋକନ୍ ଆସିନାହିଁ। ଏପରିକି ଜମିର ପରିମାଣ ଅନୁଯାୟୀ ଚାଷୀଙ୍କୁ ବହୁତ କମ୍ ସଂଖ୍ୟକ ଟୋକନ୍ ମିଳିଥିବା ଅଭିଯୋଗ ହୋଇଛି। ଏହି ସମସ୍ୟାର ସ୍ଥାୟୀ ସମାଧାନ ଏବଂ ଆଗାମୀ ଶୁକ୍ରବାର ସୁଦ୍ଧା ସମସ୍ତ ବାକିଆ ଟୋକନ୍ ପ୍ରଦାନ କରାନଗଲେ ଆଗାମୀ ଦିନରେ ବ୍ୟାପକ ରାସ୍ତାରୋକ କରାଯିବ ବୋଲି ଓଡ଼ିଶା ରାଜ୍ୟ କୃଷକ ସଂଗଠନ ଚେତାବନୀ ଦେଇଛି।
ବୁଧବାର ଅତାବିରା ମୁଖ୍ୟ ବଜାର ପ୍ରାଙ୍ଗଣରେ ଅନୁଷ୍ଠିତ ସଂଗଠନର ଏକ ଗୁରୁତ୍ଵପୂର୍ଣ୍ଣ ବୈଠକରେ ଏହି ନିଷ୍ପତ୍ତି ନିଆଯାଇଛି। ସୂଚନାଯୋଗ୍ୟ ଯେ, ଗତ ୧ ତାରିଖ ଦିନ ଅତାବିରା ବ୍ଲକ କାର୍ଯ୍ୟାଳୟଠାରେ ଜିଲ୍ଲାପାଳଙ୍କୁ ଏ ନେଇ ଏକ ଦାବିପତ୍ର ପ୍ରଦାନ କରାଯାଇଥିଲା। ଜିଲ୍ଲା ପ୍ରଶାସନର ପରାମର୍ଶ କ୍ରମେ ଚାଷୀମାନେ ଜୁନ୍ ୫ ତାରିଖ ମଧ୍ୟରେ ସଂପୃକ୍ତ ପ୍ୟାକ୍ସ (PACS) ମାନଙ୍କରେ ଲିଖିତ ଅଭିଯୋଗ ମଧ୍ୟ ଦେଇଥିଲେ। ହେଲେ ଆଜି ପର୍ଯ୍ୟନ୍ତ ଏହି ଦିଗରେ କୌଣସି ପଦକ୍ଷେପ ନିଆଯାଇ ନାହିଁ। ବର୍ତ୍ତମାନ ସୁଦ୍ଧା ମାତ୍ର 45\% ଧାନ ସଂଗ୍ରହ ହୋଇପାରିଛି, ଯାହା ଚାଷୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ମଣ୍ଡିଗୁଡ଼ିକରେ ଧାନ କିଣିବାର ଟାର୍ଗେଟ୍‌ ବହୁତ କମ୍ ରଖାଯାଉଛି।
ବର୍ଷା ଭୟ: ଆଗାମୀ ୪-୫ ଦିନ ମଧ୍ୟରେ ମୌସୁମୀ ବାୟୁ ଓଡ଼ିଶା ଛୁଇଁବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ଟୋକନ୍ ଆଶାରେ ମଣ୍ଡିରେ ଖୋଲା ଆକାଶ ତଳେ ହଜାର ହଜାର କ୍ଵିଣ୍ଟାଲ ଧାନ ପଡ଼ିରହିଛି, ଯାହା ବର୍ଷାରେ ନଷ୍ଟ ହେବାର ଆଶଙ୍କା ଦେଖାଦେଇଛି।
ଚାଷୀଙ୍କୁ ଶାସନ ଓ ପ୍ରଶାସନ ବାରମ୍ବାର ହଇରାଣ ହରକତ କରୁଛନ୍ତି। ଯଦି ଚାଷୀଙ୍କ ନ୍ୟାର୍ଯ୍ୟ ଦାବିକୁ ସରକାର ଶୀଘ୍ର କର୍ଣ୍ଣପାତ ନ କରନ୍ତି, ତେବେ ଆସନ୍ତା ଶନିବାର ପରଠାରୁ ଯେକୌଣସି ମୁହୂର୍ତ୍ତରେ ରାଜପଥ ଅବରୋଧ କରାଯିବ ବୋଲି ଓଡ଼ିଶା ରାଜ୍ୟ କୃଷକ ସଂଗଠନ କହିଛି ।
ଏହି ବୈଠକରେ ସଂଗଠନର ସଭାପତି ଭୁବନ ପ୍ରଧାନ, ସଂପାଦକ ନରେନ୍ଦ୍ର ପ୍ରଧାନ, ଚାଷୀନେତା ବୀରେନ୍ଦ୍ର କର, ବୁଦ୍ଧଦେବ ନନ୍ଦ, ମନୋରଞ୍ଜନ ସାହୁ, ଅଶ୍ଵିନୀ ତ୍ରିପାଠୀ, ସଂସାର ଭୋଇ, ହରେନ୍ଦ୍ର ସ୍ଵାଇଁ, ଦେବେନ୍ଦ୍ର ସାହୁ, ସୁରେଶ କର୍ଣ୍ଣ, ସମୀର ପ୍ରଧାନ, ରାଜେଶ ପ୍ରଧାନ, ଗୁରୁଦେବ ଭୋଇ, ବି. ପାପାରାଓ, ସଂକ୍ରାନ୍ତି ଭେଙ୍କଟେଶ୍ଵର ରାଓ, ଭି. କ୍ରିଷ୍ଣ ମୂର୍ତ୍ତି, ଦଶରଥ ଭୋଇ, ଏମ୍. ସତ୍ୟ ପ୍ରକାଶ, ଜେ. ସୂର୍ଯ୍ୟପ୍ରକାଶ ଏବଂ କେ. ରାମ ବାବୁଙ୍କ ସମେତ ବହୁ ସଂଖ୍ୟାରେ ଚାଷୀ ଉପସ୍ଥିତ ଥିଲେ।