12-May-2026

କଟକ(ତପନ ମହାନ୍ତି): ମଧୁପାଟଣା ଥାନାରେ 'ମୋ କଟକ ସୁରକ୍ଷା ମଞ୍ଚ' କଲା ଅଭିଯୋଗ। କଟକ ମଧୁପାଟଣା ଥାନା ଅଧିନସ୍ଥ କଲ୍ୟାଣୀନଗର ସର୍ଭିସ ରୋଡ ଅତି ସଂକୀର୍ଣ୍ଣ ରାସ୍ତା କୋଣରେ ଥିବା ବହୁ ପୁରୁଣା ଛଅତାଲା କୋଠାକୁ ସରକାରୀ ନିର୍ଦ୍ଦେଶନାମାକୁ ବେଖାତିର କରି କୌଣସି ସୁରକ୍ଷା ବଳୟ ନଥାଇ କୋଠା ଉପରେ ଡହଡହ ଖରାତରାରେ ନିଜ ଜୀବନକୁ ବାଜି ଲଗାଇ ବିନା ସେଫ୍ଟି କିଟ୍ ରେ କୋଠା ଭାଙ୍ଗୁଥିବା ଦେଖିବାକୁ ମିଳିଛି।ସଂକୀର୍ଣ୍ଣ ରାସ୍ତାରେ  କୋଠା ଭଙ୍ଗାଯାଉ ଥିବା ବେଳେ ଏହି ରାସ୍ତା ଦେଇ 

ଯାତାୟତ କରୁଥିବା ଜନସାଧାରଣ, ସ୍କୁଲକଲେଜ ଛାତ୍ରଛାତ୍ରୀ ଓ ଆଖପାଖରେ ବସବାସ କରୁଥିବା ଲୋକଙ୍କ ଜୀବନ ପ୍ରତି ବିପଦ ରହିଛି।ରାଜ୍ୟ ସରକାର ପ୍ରଚଣ୍ଡ ଗ୍ରୀଷ୍ମ ପ୍ରବାହ ଯୋଗୁଁ ଦିନ ୧୧ଟାରୁ ୩ଟା ପର୍ଯ୍ୟନ୍ତ ଶ୍ରମିକ କାର୍ଯ୍ୟ ନକରିବା ପାଇଁ ନିର୍ଦ୍ଦେଶନାମା ଜାରି କରିଥିବା ବେଳେ ଡହଡହ ଖରାତରାରେ ଶ୍ରମିକ କାର୍ଯ୍ୟ କରୁଥିବା ସତ୍ତ୍ୱେ ସ୍ଥାନୀୟ ବିଭାଗୀୟ ଅଧିକାରୀ ନୀରବତା ଅବଲମ୍ବନ କରୁଥିବା ଯୋଗୁଁ ନାନାପ୍ରକାର ସନ୍ଦେହ ସୃଷ୍ଟି ହେଉଛି। ପୁର୍ବରୁ କଟକ ସହରରେ କାର୍ଯ୍ୟ ଚାଲୁଥିବା ସମୟରେ ଅନେକ କାର୍ଯ୍ୟରତ ଶ୍ରମିକଙ୍କ ମୃତ୍ୟୁ ହୋଇଥିବା ସତ୍ତ୍ଵେ ଶ୍ରମ ବିଭାଗ ଓ ଜିଲ୍ଲା ପ୍ରଶାସନ ଶ୍ରମିକ କାର୍ଯ୍ୟ କରିବା ପାଇଁ ଜାରି ହୋଇଥିବା ନିର୍ଦ୍ଦେଶନାମାକୁ କାର୍ଯ୍ୟକାରୀ କରୁନଥିବା 

ଯୋଗୁଁ ପ୍ରଭାବଶାଳୀ ଠିକାସଂସ୍ଥା ଓ ଠିକାଦାର ଏଭଳି ବେଆଇନ କାର୍ଯ୍ୟ କରୁଥିବା ଅଭିଯୋଗ ହେଉଛି।ଶ୍ରମିକଙ୍କୁ ନିୟୋଜିତ ଠିକାସଂସ୍ଥା ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ସହ ଅଞ୍ଚଳବାସୀ ଓ କାର୍ଯ୍ୟରତ ଶ୍ରମିକଙ୍କ ସୁରକ୍ଷା ପାଇଁ ଛଅତାଲା କୋଠାକୁ ଭଙ୍ଗାଯିବା ନିମନ୍ତେ ସରକାରୀ ନିର୍ଦ୍ଦେଶନାମା ଓ ନୀତିନିୟମ ମାନି ସୁରକ୍ଷାର ସହିତ ଭଙ୍ଗାଯିବା ସମୟରେ ବିଭାଗୀୟ ଅଧିକାରୀ ଉପସ୍ଥିତରେ ଭଙ୍ଗାଯିବା ନିମନ୍ତେ 'ମୋ କଟକ ସୁରକ୍ଷା ମଞ୍ଚ' ସମ୍ପାଦକ ଜିତେନ୍ଦ୍ର ସାହୁଙ୍କ ନେତୃତ୍ବରେ ମଧୁପାଟଣା ଥାନା ଅତିରିକ୍ତ ଥାନା ଅଧିକାରୀ ସାଗରିକା ମହାନ୍ତି,ଜିଲ୍ଲା ଶ୍ରମ ଅଧିକାରୀଙ୍କୁ ଲିଖିତ ଅଭିଯୋଗ କରିଛନ୍ତି।ଏହି କାର୍ଯ୍ୟକ୍ରମରେ ମାନବାଧିକାର କର୍ମୀ ସନ୍ତୋଷ କୁମାର ସାହୁ ଓ ସମାଜସେବୀ ଡ.ବ୍ୟୋମକେଶ କାନୁନଗୋ ପ୍ରମୂଖ ଉପସ୍ଥିତ ଥିଲେ।