26-Apr-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )
ସୋନପୁର ସହର ରେ ଦିନକୁ ଦିନ ଡ୍ରେନ ସମସ୍ୟା ଗୁରୁତର ହେବାରେ ଲାଗିଛି । ସମସ୍ତ ବନ୍ଧ ମାନଙ୍କରେ ପୌର୍ ପରିଷଦ ଡ୍ରେନ ପାଣି ଛାଡ଼ି ଦେଇ ସହର ରେ ଦୁର୍ଗନ୍ଧମୟ ସ୍ଥିତି ସୃଷ୍ଟି କରୁଛି ପୌର ପରିଷଦ। ସୋନପୁର ଟିକିରିପଡାସ୍ଥିତ ନୂଆଁବନ୍ଧରେ ବାଇପାସ୍ ଡ୍ରେନେଜ କାମ ବନ୍ଦ ପାଇଁ ଦାବି ହୋଇଛି । ଏନେଇ ବିଜେପି ନଗର ମଣ୍ଡଳ ପକ୍ଷରୁ ସୋନପୁର ପୌର ପରିଷଦ ଇଓ ୠଷି ମାଝୀଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ପ୍ରକାଶଥାଉକି, ବର୍ତ୍ତମାନ ପୌର ପ୍ରଶାସନ ପକ୍ଷରୁ ନୂଆଁବନ୍ଧର ସୌନ୍ଦର୍ଯ୍ୟକରଣ ଏବଂ ପୁନରୁଦ୍ଧାର କାର୍ଯ୍ୟ ଚାଲୁରହିଛି । ପ୍ରାୟ ୧ କୋଟି ଟଙ୍କା ବ୍ୟୟ ଅଟକଳରେ ଟେଣ୍ଡର କରାଯାଇ କାର୍ଯ୍ୟ କରାଯାଉଛି । ବନ୍ଧ ସାଇଟ୍‌ରେ ଏକ ବାଇପାସ୍ ଡ୍ରେନ୍ ନିର୍ମାଣ କରି ସହରର ସମସ୍ତ ଡ୍ରେନ୍ ଏବଂ ଆବର୍ଜନା ପାଣି ଧୁଣ୍ଡିନାଲ ଦେଇ ମହାନଦୀକୁ ଛଡାଯିବା ପାଇଁ ଧାର୍ଯ୍ୟ କରାଯାଇଛି। ଉକ୍ତ ବାଇପାସ୍ ଡ୍ରେନ କାମକୁ ସୋନପୁର ବିଜେପି ନଗର ମଣ୍ଡଳ ବିରୋଧ କରିଛି । ଯଦି ଉକ୍ତ ବାଇପାସ୍ ଡ୍ରେନେଜ୍ ସିଷ୍ଟମ୍ କରାଯାଏ ଏହା ସ୍ଲମ୍ ଏରିଆ ହୋଇଥିବାରୁ ନୂଆଁବନ୍ଧର ଉପର ଅଂଶ ଯଥା ବସଷ୍ଟାଣ୍ଡ, ମଝିପଡା ସହ ସହରର ଅନ୍ୟାନ୍ୟ ଅଞ୍ଚଳର ପ୍ରାୟ ସମସ୍ତ ଡ୍ରେନ୍‌ର ମଇଳା ଏବଂ ଆବର୍ଜନା ପାଣି ଧୁଣ୍ଡିନାଳ ଦେଇ ସିଧାସଳଖ ମହାନଦୀରେ ପଡିବ । ଫଳରେ ବଡବଜାରର ଟିକିରିପଡ଼ା ଘାଟ, ତେନ୍ତୁଲିଘାଟ, ତରିଆପଡା ଘାଟ, ତଲପଡା ଘାଟ, କୁମ୍ଭାରପଡା ଘାଟ, ବାଘପଡା ଘାଟ, ଆମ୍ବଘାଟ ସହିତ ରାମେଶ୍ଵର ସଙ୍ଗମ ଆଦି ସଂପୂର୍ଣ ରୂପେ ଆବର୍ଜନାମୟ ହେବ। ଉକ୍ତ ଘାଟ ଗୁଡିକର ପାଣି ସହରର ଲୋକେ ପାନୀୟ, ରୋଷେଇ ଏବଂ ଶୌଚ ପାଇଁ ନିର୍ଭର କରିଥାନ୍ତି । ଯଦି ଉକ୍ତ ଡ୍ରେନ୍ ପାଣି ସିଧାସଳଖ ନଦୀରେ ପଡିବ, ତେବେ ଲୋକେ ପ୍ରଭାବିତ ହେବେ ବୋଲି ବିଜପି କର୍ମୀ ଯୁକ୍ତି ବାଢ଼ିଛନ୍ତି। ଏଣୁ ବାଇପାସ୍‌ ଡ୍ରେନେଜ୍ ବ୍ୟବସ୍ଥାକୁ ବନ୍ଦକରି ଡ୍ରେନ୍ ପାଣିକୁ ଅନ୍ୟ ସ୍ୱରେଜ୍ ବ୍ୟବସ୍ଥା ସହ ସ୍ୱଚ୍ଛ କରାଯାଇ ରାମଶ୍ୱର ସଙ୍ଗମ ର ତଳ ଅଞ୍ଚଳକୁ ଛାଡିବା ପାଇଁ ବିଜେପି ଦାବି କରିଛି। ଦାବିପତ୍ର ପ୍ରଦାନ ବେଳେ ନଗର ମଣ୍ଡଳ ସଭାପତି ସୁରେଶ ବିଶ୍ଵାଳ, ଦାଶରଥ୍ ମେହେର, କାଉନସିଲର ସୁକାନ୍ତ ସାହୁ, ଗଙ୍ଗାଧର ତରିଆ, ଗଣେଶ ସାହୁ, ବିକି ମିଶ୍ର, କାହ୍ନୁ ତରିଆ, ସୁଦାମ ନାଏକ, ଅନନ୍ତ ମିଶ୍ର, କେଶବ ବୁଡେକ, ରାମେଶ୍ଵର ତରିଆ, ସୁଦାମ ନାଏକ, ସୁରୁବାବୁ ସାହୁ, ୱାସିମ ମହମ୍ମଦ, ସକୁର ମହମ୍ମଦ, ଧରମ୍ ମହାଲିକ ପ୍ରମୁଖ ଉପସ୍ଥିତ ଥିଲେ।