09-Mar-2026

କଳାହାଣ୍ଡି(ତ୍ରିନାଥ ବେଶ୍ରା )
ଆତ୍ମ ଶକ୍ତି ଟ୍ରଷ୍ଟର ରାଜ୍ୟ ସ୍ତରୀୟ ମହିଳା ଶ୍ରମଜୀବୀ ମଞ୍ଚ, ଓଡ଼ିଶା ଏବଂ ଓଡ଼ିଶା ଶ୍ରମଜୀବୀ ମଞ୍ଚର ଅନୁବନ୍ଧିତ ଜିଲ୍ଲା ସ୍ତରୀୟ ନାଗରିକ ବିକାଶ ସଂଗଠନ ଦ୍ୱାରା କଳାହାଣ୍ଡି ଜିଲ୍ଲାର ବିଭିନ୍ନ ବ୍ଲକରେ ଆନ୍ତର୍ଜାତୀୟ ମହିଳା ଦିବସ ବହୁ ଆଡ଼ମ୍ବରର ସହକାରେ ପାଳନ କରାଯାଇଛି। କୋକସରା, ଭବାନୀପାଟଣା, ଜୁନାଗଡ଼, ନର୍ଲା, ଲାଞ୍ଜିଗଡ଼, କେସିଙ୍ଗା, ମଦନ ରାମପୁର ଓ ଥୁଆମୂଳ ରାମପୁର ବ୍ଲକରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।ଏହି ଅବସରରେ ଆଜି କୋକସରା ବ୍ଲକ ଅନ୍ତର୍ଗତ ଖୁଣ୍ଟିଆ ଗ୍ରାମରେ ଏକ ବିଶେଷ କାର୍ଯ୍ୟକ୍ରମ ଆୟୋଜିତ ହୋଇଥିଲା। ସ୍ଥାନୀୟ ଖୁଣ୍ଟିଆ ଗ୍ରାମ ପଞ୍ଚାୟତର ସରପଞ୍ଚ ମାଧବୀ ଧରୁଆ ମୁଖ୍ୟ ଅତିଥି ଭାବରେ ଯୋଗଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ଏହି କାର୍ଯ୍ୟକ୍ରମରେ କମ୍ୟୁନିଟି ହେଲଥ୍ ଅଫିସର (CHO), ସହାୟିକା ନର୍ସ ମିଡୱାଇଫ୍ (ANM), ସ୍ଥାନୀୟ ବିଦ୍ୟାଳୟର ସହକାରୀ ଶିକ୍ଷକ, ଅଙ୍ଗନବାଡ଼ି କର୍ମୀ ଏବଂ ଆଶା କର୍ମୀମାନେ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ।
କମ୍ୟୁନିଟି ସପୋର୍ଟ ଷ୍ଟାଫଙ୍କ ନେତୃତ୍ୱରେ ବିଭିନ୍ନ ଗ୍ରାମର ଶତାଧିକ ମହିଳା ଏହି କାର୍ଯ୍ୟକ୍ରମରେ ଭାଗ ନେଇଥିଲେ।

ଏହି ଅବସରରେ ଭାରତ ତଥା ଓଡ଼ିଶାର ମହୀୟସୀ ମହିଳା ନେତ୍ରୀ ସାବିତ୍ରୀ ବାଇ ଫୁଲେ, ରାଣୀ ଲକ୍ଷ୍ମୀବାଈ, ମଦର ଟେରେସା, ସରୋଜିନୀ ନାଇଡୁ ପ୍ରମୁଖଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରାଯାଇ ସେମାନଙ୍କ ଜୀବନୀ ଓ ସଫଳତା ଉପରେ ଆଲୋଚନା କରାଯାଇଥିଲା।
ପରବର୍ତ୍ତୀ ସମୟରେ ଗ୍ରାମ ପରିକ୍ରମା କରି "ନାରୀ ଶକ୍ତି, ରାଷ୍ଟ୍ରର ଶକ୍ତି", "ଶିକ୍ଷିତ ନାରୀ, ଉନ୍ନତ ସମାଜ" ପରି ନାରା ସବଳରେ ଉଚ୍ଚାରଣ କରି ମହିଳା ସଶକ୍ତିକରଣ ଏବଂ ମହିଳାଙ୍କ ଅଧିକାର ସମ୍ପର୍କରେ ସଚେତନତା ସୃଷ୍ଟି କରାଯାଇଥିଲା। ମହିଳା ଦିବସର ଏହି ବାର୍ତ୍ତା ଗ୍ରାମବାସୀଙ୍କ ନିକଟରେ ପହଞ୍ଚାଯାଇଥିଲା।
ଏହି ଅଭିନବ ଶୈଳୀରେ ପାଳିତ କାର୍ଯ୍ୟକ୍ରମ ଶେଷରେ ଉପସ୍ଥିତ ସମସ୍ତ    ମହିଳା ଏବଂ ଅତିଥିମାନଙ୍କ ମଧ୍ୟରେ ମିଷ୍ଟାନ୍ନ ବଣ୍ଟନ କରାଯାଇଥିଲା। ଏହି ସମଗ୍ର କାର୍ଯ୍ୟକ୍ରମକୁ ସଫଳ କରିବାରେ ଉର୍ମି ଲିଡର ବୀଣାପାଣି ସୁନାନୀ, ପ୍ରେମଶିଳା ପାଣିଗ୍ରାହୀ, ସଂଗଠନର ଜିଲ୍ଲା ସଂଯୋଜକ ଅନିଲ କୁମାର ଦାସ, ଉମେନ୍ ଫେଡରାସନ କଲ୍ୟାଣୀ ଦାସ ବ୍ଲକ୍ ସଂଯୋଜକ ଉପେନ୍ଦ୍ର ସୁନାନୀ, ବାବୁଲାଲ ତାଣ୍ଡି, ମଧୁସୂଦନ ନାୟକ,ଏବଂ ଜନସାଥୀ ତ୍ରିନାଥ ବେଶ୍ରା, ଅନିଲ ନାଗ, ପବିତ୍ର ନାୟକ, ସୀମନ୍ତିନି ବାରିକ, ଅହଲ୍ୟା ସାହୁ ,ମୁକ୍ତା ଠାକୁର, ରୁକୁଣି ହାତୀ, ଯୋଗେଶ୍ୱର ନାୟକ, ଟଙ୍କେଶ୍ୱର, ସୁଦର୍ଶନ ସନ୍ତୋଷ ବାରିକ, ଜ୍ୟୋତି ସେନାପତି, ନୌକେସି ସାହୁ, ପିତାମ୍ବର ଗୌଡ, ଧନଂଜୟ ହରପାଲ୍ ସକ୍ରିୟ ସହଯୋଗ କରିଥିଲେ।