10-Jan-2026

ନୂଆପଡ଼ା(ପରମେଶ୍ଵର ମେହେର):  ନୂଆପଡା ଦାଦନ ଶ୍ରମିକ ଚାଲାଣ କରୁଥିବା ଦଲାଲ୍ ଓ ସର୍ଦ୍ଦାର ଙ୍କ ତ୍ରାହି ନାହିଁ, ସଜାଗ ହୋଇ  ପଇତରା ମାରୁଛନ୍ତି ସିନାପାଲି ସିଙ୍ଘମ୍  ପୋଲିସ । ନୂଆପଡା ଜିଲ୍ଲା ସିନାପାଲି ପୋଲିସ ୧୦ ଜଣ ଦାଦନ ଶ୍ରମିକଙ୍କୁ ଉଦ୍ଧାର କରିଥିବା ସହିତ ଏକ ଚାରିଚକିଆ ଗାଡି ଜବତକରି ସର୍ଦ୍ଦାରଙ୍କୁ ଗିରଫ କଲାପରେ କୋର୍ଟଚାଲାଣ କରିଥିବା କଥା ଖଡିଆଳ ଏସ୍.ଡି.ପି.ଓ. ଉପେନ୍ଦ୍ର ପ୍ରଧାନ ସିନାପାଲି ଥାନାରେ ଏକ ସାମ୍ୱାଦିକ ସମ୍ମିଳନୀ ଡାକି ସୁଚନା ପ୍ରଦାନ କରିଥିଲେ । ୧୦ ଜଣ ଦାଦନ ଶ୍ରମିକ ମଧ୍ଯରୁ ଜଣେ ନାବାଲକ ଥିବାବେଳେ, ଅଭିଯୁକ୍ତ ସର୍ଦ୍ଦାର ତେଲେଙ୍ଗାନା ରାଜ୍ଯ କେଭି ରଙ୍ଗାରେଡ୍ଡୀ ଜିଲ୍ଲା, ମାଲକ୍ଜଗିରି ଥାନା ଦୁର୍ଗାନଗରର  ମିରୟଲା ରାମୁଲୁ (୬୦)। ପ୍ରାପ୍ତ ସୁଚନା ମୁତାବକ ଏକ ଚାରିଚକିଆ ଆର୍ଟିକା ଯାହାର ନମ୍ୱର ଓଡି୨୬ ଜି ୬୩୩୨ ଗାଡି ଯୋଗେ  ସିନାପାଲି ଥାନା ଗୋଡାଲ ଛକ ଫୋରୱେ ରାସ୍ତା ହାତିବନ୍ଧା ଦେଇ ଦାଦନ ଶ୍ରମିକ ଚାଲାଣ ହେଉଥିବା ସିନାପାଲି ପୋଲିସ ବିଶେଷ ସୁତ୍ରରୁ ଖବର ପାଇଥିଲା। ସେଠୁ ଥାନାଧିକାରୀ ଦୁର୍ଗାମାଧବ ବାଗଙ୍କ ନେତୃତ୍ବରେ ଏକ ପୋଲିସ ଟିମ୍  ଚଢାଉ କରିଥିଲା। ପୋଲିସ ଉକ୍ତ ଶ୍ରମିକ ମାନଙ୍କୁ ଉଦ୍ଧାର କରିବା ସହ ଚାରିଚକିଆ ଗାଡିକୁ ଜବତ କରି  ସର୍ଦ୍ଦାରଙ୍କୁ ଗିରଫ କରିଥିଲା। ଏନେଇ ସିନାପାଲି ଥାନାରେ କେସ୍ ନମ୍ୱର ୬/୨୬ ଅନୁସାରେ ଏକ ମାମଲା ରୁଜୁକରି ଅଭିଯୁକ୍ତଙ୍କୁ କୋର୍ଟଚାଲାଣ କରିଥିବା ଏସ୍.ଡି.ପି.ଓ. ଶ୍ରୀ ପ୍ରଧାନ ସୁଚନା ପ୍ରଦାନ କରିଛନ୍ତି। ଏହି ଚଢାଉରେ ସିନାପାଲି ପୋଲିସ ଅଧିକାରୀ ଓ କର୍ମଚାରୀ ସାମିଲ ଥିଲେ। ସିନାପାଲି ପୋଲିସର ଏଭଲି ଚଢାଉ କୁ ଦେଖି  ଅଞ୍ଚଳର ଦାଦନ ଶ୍ରମିକ ଚାଲାଣ ରାକେଟ ରେ ସକ୍ରୀୟ ଥିବା ଦଲାଲ୍ ଓ ସର୍ଦ୍ଦାର ମାନଙ୍କ ମନରେ ଭୟର ବାତାବରଣ ସୃଷ୍ଟି ହୋଇଛି।