16-Oct-2025

ସିନାପାଲି(ପରମେଶ୍ୱର ମେହେର): ପାତାଳରୁ ଅନର୍ଗଳ ପାଣି ବାହାରୁଥିବା ଅପୂର୍ବ ପ୍ରାକୃତିକ ସ୍ଥାନ ସିନାପାଲି ବ୍ଲକ ଅନ୍ତର୍ଗତ ଯୁଗେନପଦର ପାର୍ଶ୍ୱ ଉଦନ୍ତୀ ନଦୀ ତଟରେ ଥିବା ଝରିଆ ବଣଭୋଜି ପର୍ଯ୍ୟଟନ ସ୍ଥଳୀ ଏବେ ଅବହେଳାର ଶିକାର ହୋଇପଡ଼ିଛି । ପୂର୍ବରୁ ଏହି ସ୍ଥାନକୁ ଅଞ୍ଚଳ ତଥା ବାହାରୁ ଲୋକମାନେ ବଣଭୋଜି ଓ ବିଶ୍ରାମ ସ୍ଥଳୀ ଭାବରେ ବ୍ୟବହାର କରୁଥିଲେ, କିନ୍ତୁ ପ୍ରଶାସନ ଓ ସ୍ଥାନୀୟ ନେତାଙ୍କ ଅବହେଳାରେ ଏହା ଆସ୍ତେ ଆସ୍ତେ ମଳିନ ହେବାରେ ଲାଗିଛି । ପାତାଳରୁ ନିରନ୍ତର ବାହାରୁଥିବା ସେଇ ଶୀତଳ ଓ ସ୍ୱଚ୍ଛ ପାଣି ପ୍ରକୃତିର ଅନନ୍ୟ ଉପହାର ହେଲେ ମଧ୍ୟ, ତାହାର ଯଥୋଚିତ ବ୍ୟବହାର ଓ ସୁରକ୍ଷା ହେଉନାହିଁ । ସେହି ପାଣିକୁ ଯଦି ସଠିକ ଭାବରେ ବ୍ୟବସ୍ଥାପନା କରାଯାଏ, ତେବେ ଏହା ପର୍ଯ୍ୟଟକଙ୍କ ପାଇଁ ପାନୀୟଜଳ ତଥା ଅଞ୍ଚଳର ଲୋକଙ୍କ ପାଇଁ ଜଳ ସମ୍ପଦ ଭାବେ ବି ଉପକୃତ ହୋଇପାରେ । ଏକ ସମୟରେ ବଣଭୋଜି କରିବା ପାଇଁ ଲୋକମାନେ ଦୂରଦୂରନ୍ତରୁ ଏଠାକୁ ଆସୁଥିଲେ, କିନ୍ତୁ ଏବେ ସେହି ସ୍ଥାନ ଜଙ୍ଗଲ ଓ ଜଣ୍ଟା-ଗଛରେ ଆବୃତ ହୋଇ ଅସୁବିଧାଜନକ ରୂପ ନେଇଛି । ପର୍ଯ୍ୟଟକମାନେ ଆସିବାକୁ ଇଚ୍ଛା କଲେ ମଧ୍ୟ, ବିଜୁ ଏକ୍ସପ୍ରେସ୍‌ୱେ ଠାରୁ ଝରିଆ ପର୍ଯ୍ୟନ୍ତ ଯୋଗାଯୋଗ ସୁବିଧା ନଥିବାରୁ ଆସିବା କଷ୍ଟସାଧ୍ୟ ହେଉଛି । ସେଠାକୁ ପହଞ୍ଚିବା ପାଇଁ ଗୋଟିଏ ସୁଯୋଗସୁବିଧାପୂର୍ଣ୍ଣ ରାସ୍ତା ତିଆରି ମଧ୍ୟ ଅତି ଆବଶ୍ୟକ । ବର୍ତ୍ତମାନ ଏଠାକୁ ଲୋକେ ବଣଭୋଜି କରିବାକୁ ଯିବାପାଇଁ

ଭୟ କରୁଛନ୍ତି । ସ୍ଥାନୀୟ ଲୋକମାନଙ୍କ କହିବା ଅନୁସାରେ, ଯଦି ପ୍ରଶାସନ ଏହି ସ୍ଥାନପ୍ରତି ଦୃଷ୍ଟି ଦିଏ, ସମ୍ପୂର୍ଣ୍ଣ ପରିସରକୁ ପରିଷ୍କାର କରି, ବସିବା ଓ ବିଶ୍ରାମ ସ୍ଥଳୀ, ପାଣି ତଳାଘର ଓ ସାଇନବୋର୍ଡ୍, ସ୍ଥାନୀୟ ଦେବୀ ମନ୍ଦିର ତିଆରି, ରାସ୍ତା ତିଆରି ଏବଂ ବଣଭୋଜି ପାଇଁ ଉଚିତ ବ୍ୟବସ୍ତା ‌କରାଯାଏ, ତେବେ ଏହି ଝରିଆ ସ୍ଥାନ ନିଶ୍ଚୟ ଏକ ଆକର୍ଷଣୀୟ ପର୍ଯ୍ୟଟନ କେନ୍ଦ୍ର ହୋଇପାରେ । ପର୍ଯ୍ୟଟକ ଆକର୍ଷଣ ଓ ଅଞ୍ଚଳର ପରିଚୟ ବୃଦ୍ଧି ପାଇଁ ଝରିଆ ସ୍ଥଳୀର ପୁନଃରୁଦ୍ଧାର ଅତି ଆବଶ୍ୟକ। ସ୍ଥାନୀୟ ଜନସାଧାରଣ ପ୍ରଶାସନ ଓ ରାଜନୈତିକ ବ୍ୟକ୍ତିବିଶେଷଙ୍କୁ ଅନୁରୋଧ କରିଛନ୍ତି ଯେ, ଏହି ଅବହେଳିତ ପର୍ଯ୍ୟଟନ ସ୍ଥଳୀକୁ ପୁନଃ ସଜାଇ ଅଞ୍ଚଳର ଗୌରବ ଭାବେ ଗଢ଼ି ତୋଳାଯାଉ, କାହିଁକିନା ପ୍ରକୃତିର କୋଳରେ ଥିବା ଏହି ଝରିଆ, ଯଦି ପୁନଃ ସଜାଯାଏ, ତେବେ ଅଞ୍ଚଳର ନୂତନ ପିକନିକ ଓ ପର୍ଯ୍ୟଟନ ଗନ୍ତବ୍ୟ ହୋଇଉଠିବ ।