15-Oct-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗିର ଜିଲ୍ଲା ଦେଓଗାଁ ଥାନା ଅନ୍ତର୍ଗତ ଦେଓଗାଁ କଛାରପାଲିରେ ସୋମବାର ସଂନ୍ଧ୍ୟାରେ ଘଟିଥିବା ଦୁବୃର୍ତ୍ତଙ୍କ ଦ୍ୱାରା ଆତଙ୍କରାଜ ଘଟଣାରେ ବୁଧବାର ସ୍ଥାନୀୟ ପୋଲିସ ଗୋଟିଏ ବାଇକ,୨ଟି ମୋବାଇଲ ଫୋନ ସହ ମାରଣାସ୍ତ୍ର ଜବତ କରି ୫ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ମାନେ ହେଲେ   ଦେଓଗାଁ ଥାନା ଅନ୍ତର୍ଗତ ଅର୍ଡା ଗାଁର କାଲିଆ ବେହେରା (୨୮),ୱେଷ୍ଟବେଙ୍ଗଳ ମୁରଶିଦାବାଦ ଜିଲ୍ଲା ବେଲଡଙ୍ଗା ଥାନା ହରେକନଗରର ମହମ୍ମଦ ସାନାଉଲ୍ଲା ଖାଁ (୩୮),ବଲାଙ୍ଗିର ସାଗରପଡାର ସାଗର ମାହାକୁର (୨୫),ଶାସ୍ତ୍ରୀନଗରର ମୁକେଶ ବଗର୍ତ୍ତି(୩୦) ଓ ସଇଁନ୍ତଲା ଥାନା କମଲଡଗା ଗାଁର କିଷାନ ମାଝି (୨୫) । ସମସ୍ତଙ୍କ ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ଜେଲହାଜତକୁ ପଠାଇଦିଆଯାଇଥିବା ଜଣାପଡିଛି । ପ୍ରକାଶଯେ, ସୋମବାର ସଂନ୍ଧ୍ୟା ପ୍ରାୟ ୭ଟା ସମୟରେ ହଠାତ ୧୨ଜଣ ଯୁବକ ୪ଟି ବାଇକରେ ଆସି ସ୍ଥାନୀୟ ସାହୁପଡାରେ ବନ୍ଧୁକ ଓ ଖଣ୍ଡା ବାହାରକରି କିଛି ସମୟପାଇଁ ଆତଙ୍କ ଖେଳାଇଥିଲେ । ସାଧାରଣ ଲୋକଙ୍କୁ ଅସଭ୍ୟ ଭାଷାରେ ଗାଲିଗୁଲଜ କରି ଜଣେ ଯୁବକଙ୍କୁ ଆକ୍ରମଣ କରିବାପାଇଁ ଖୋଜିଥିଲେ । ଏନେଇ ସଂନ୍ଧ୍ୟା ପ୍ରାୟ ୮ଟାରେ ସାହୁପଡା ପ୍ରଗତିଯୁବକ ସଂଘର କର୍ମକର୍ତ୍ତା ତଥା ପଡାବାସୀ ମାନେ ଦେଓଗାଁ ଥାନାକୁ ଯାଇ ଲିଖିତଭାବେ ଅଭିଯୋଗ କରିଥିଲେ । ଦେଓଗାଁ ଥାନାରୁ ମାତ୍ର କିଛିଦୂରରେ ବାହାରର ଯୁବକମାନେ ଆସି ମାରଣାସ୍ତ୍ରଧରି ଆତଙ୍କରାଜ ଚଳାଇବା ଘଟଣାକୁ ନେଇ ଜନଅସନ୍ତୋଷ ବ୍ୟାପିଛି । ଅଭିଯୋଗପରେ ଏସପି ଙ୍କ ନିର୍ଦ୍ଦେଶକ୍ରମେ ପୋଲିସ ୨ଟି ଟିମଗଠନ କରି ରାତିରେ ତନାଘନା ଚଲାଇଥିଲା ।  ଦୁବୃର୍ତ୍ତମାନେ ଜୁର୍ଲାକାନୀ ଛକନିକଟରେ ଗୋଟିଏ ବାଇକ ଛାଡିଦେଇ ଫେରାର ମାରିଥିଲେ । ଉକ୍ତବାଇକ କୁ ପୋଲିସ ଜବତ କରି ତଦନ୍ତ ଆରମ୍ଭ କରିଥିଲା । ଅନ୍ୟ ଅଭିଯୁକ୍ତ ମାନଙ୍କୁ ଅତିଶିଘ୍ର ଗିରଫ କରାଯିବ ଓ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଅରାଜକତାକୁ ପ୍ରଶ୍ରୟ ଦିଆଯିବ ନାହିଁ ବୋଲି ଥାନାଧିକାରୀ ବୁଲୁ ମୁଣ୍ଡା ସୂଚନା ଦେଇଛନ୍ତି ।