18-Jul-2025

ଲୋଇସିଂହା, (ବିନୋଦ ଦୀପ) ବାଲେଶ୍ବର ଫକୀରମୋହନ ସ୍ଵୟଂଶାସିତ ମହାବିଦ୍ୟାଳୟର ଛାତ୍ରୀ ସୌମ୍ୟାଶ୍ରୀ ବିଶି ଙ୍କ ଆତ୍ମହତ୍ୟା ଉଦ୍ୟମ ପରେ ୨ ଦିନ ଏମସ୍ ରେ ଚିକିତ୍ସିତ ହେବା ପରେ ଆଖୁ ବୁଜିଲେ। ଜଣେ ଅଧ୍ୟାପକଙ୍କ ଯୌନ ଆବେଦନ ଓ ନିର୍ଯାତନା ବିରୋଧରେ ଛାତ୍ରୀ ଜଣକ ୬ ମାସ କାଳ ବିଭିନ୍ନ ସମୟରେ କଲେଜ କର୍ତ୍ତୃପକ୍ଷ,ପୋଲିସ ପ୍ରଶାସନ, ବିଧାୟକ,ସାଂସଦ,ଉଚ୍ଚ ଶିକ୍ଷାମନ୍ତ୍ରୀ,ଗୃହ ବିଭାଗ ଦାୟିତ୍ଵରେ ଥିବା ମୁଖ୍ୟମନ୍ତ୍ରୀ, ଜାତୀୟ ମହିଳା ଆୟୋଗ ପ୍ରମୁଖ ଙ୍କୁ ନ୍ୟାୟ ପାଇଁ କାକୁତି ମିନତି କରିବା ସତ୍ତ୍ବେ କେହି ତାଙ୍କୁ ସାହାଯ୍ୟ କରିବାକୁ ଆଗେଇ ଆସିନଥିଲେ। ଏହି ଘଟଣା ପାଇଁ ସରକାରଙ୍କୁ ଦାୟୀ କରି  ୧୨ଘଣ୍ଟିଆ ଓଡ଼ିଶା ବନ୍ଦ କରିବା ପାଇଁ ଓଡ଼ିଶା ପ୍ରଦେଶ କଂଗ୍ରେସ ଡାକରା ଦେଇଥିଲା। ଏହି ଓଡ଼ିଶା ବନ୍ଦ କୁ ସମର୍ଥନ ଜଣାଇ ଲୋଇସିଂହା ବ୍ଲକ କଂଗ୍ରେସ ପକ୍ଷରୁ ସଭାପତି ଅରବିନ୍ଦ ସାହୁ ଙ୍କ ନେତୃତ୍ୱରେ ଲୋଇସିଂହା ସହର ବନ୍ଦ କରାଯାଇଥିଲା। ଏନେଇ  କଂଗ୍ରେସ କର୍ମୀ ପିକେଟିଙ୍ଗ କରି ବ୍ୟାଙ୍କ, ଶିକ୍ଷାନୁଷ୍ଠାନ,ସରକାରୀ ଓ ବେସରକାରୀ କାର୍ଯ୍ୟାଳୟ ଗୁଡିକ ବନ୍ଦ କରିଥିଲେ। ତେବେ କାଁ ଭାଁ କେତେକ ଦୋକାନ ଖୋଲା ଥିବା ବେଳେ ସତପ୍ରବୃତ୍ତ ଭାବେ କେତେକ ଦୋକାନୀ ଦୋକାନ ବନ୍ଦ କରିବା ଦେଖା ଯାଇଥିଲା।  ପରେ ସମସ୍ତ କର୍ମୀ ମୁଖ୍ୟ ସହରରେ ଏକତ୍ରିତ ହୋଇ ସୌମ୍ୟଶ୍ରୀ ଙ୍କୁ ନ୍ୟାୟ ଦାବୀରେ ନାରା ଦେଇ ମୋହନ ସରକାର ଙ୍କୁ କଟୁ ସମାଲୋଚନା କରିଥିଲେ। ଏହି ଅବସରରେ  କଂଗ୍ରେସ ବ୍ଲକ ସଭାପତି ଶ୍ରୀଯୁକ୍ତ ଅରବିନ୍ଦ ସାହୁ କହିଛନ୍ତି ଯେ ରାଜ୍ୟରେ ବିଜେପି ସରକାର ମହିଳା ଓ ଛାତ୍ରୀମାନଙ୍କୁ ସୁରକ୍ଷା ଦେବାରେ ସମ୍ପୂର୍ଣ୍ଣ ବିଫଳ। ଗତ ଏକ ବର୍ଷ ମଧ୍ୟରେ ରାଜ୍ୟରେ ଅପରାଧ ରେକର୍ଡ ସୃଷ୍ଟି କରିଛି। ଉଚ୍ଚ ଶିକ୍ଷାମନ୍ତ୍ରୀ,ବାଲେଶ୍ୱର ସାଂସଦ ଓ ବିଧାୟକ ଘଟଣା ସମ୍ପର୍କରେ ଜାଣି ମଧ୍ୟ କୌଣସି ପଦକ୍ଷେପ ଗ୍ରହଣ ନ କରିବା ଦାୟିତ୍ୱ ହୀନତାର ପରିଚୟ। ତେଣୁ ଉଚ୍ଚ ଶିକ୍ଷାମନ୍ତ୍ରୀ ତୁରନ୍ତ ଇସ୍ତଫା ଦେବା ସହ ଅପରାଧୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାବୀ କରିଥିଲେ। ଏଥିରେ ଲୋଇସିଂହା ବ୍ଲକ କଂଗ୍ରେସ କମିଟିର ସୋମନାଥ ପଟେଲ,ସାନ୍ତୁନୁ କୁମାର ସିଂ,ମାଗୁର ବେଡା ସରପଞ୍ଚ ସଞ୍ଜୟ ଗଡତ୍ୟା,ବ୍ୟାସଦେବ ଝାଙ୍କର,ପରମାନନ୍ଦ ଗଡତ୍ୟା,ଅଶୋକ ବେହେରା,ସୋମନାଥ ବେହେରା,ଶିବ ଅଗ୍ରୱାଲ,ଭାଗବତୀଆ ଭୋଇ,ପଦ୍ମଲୋଚନ କୁମ୍ଭାର,ରାମବିଳାସ ଝାଙ୍କର,ଲଷ୍ମୀନାରାୟଣ ଗଡତ୍ୟା ଙ୍କ ସମେତ ଶତାଧିକ କଂଗ୍ରେସ କର୍ମୀ ଓ ସମର୍ଥକ ଉପସ୍ଥିତ ରହିଥିଲେ l