18-Jul-2025

ସିନ୍ଧେକେଲା(ଅନୀଲ କୁମାର ତ୍ରିପାଠୀ):  ବଲାଙ୍ଗୀର ଜିଲ୍ଲାରେ ଥିବା ରାଜ୍ୟର ଅନନ୍ୟ ଐତିହାସିକ ଯୋଗିନୀ ପୀଠ ରାଣୀପୁର ଝରିଆଲରେ ପ୍ରତିବର୍ଷ ଶ୍ରାବଣ ମାସରେ ଭକ୍ତ, ଶ୍ରଦ୍ଧାଳୁ ଏବଂ କାଉଡ଼ିଆ ମାନଙ୍କ ବେଶ୍ ଭିଡ ପରିଲକ୍ଷିତ ହୋଇଥାଏ। ଏହାକୁ ନଜରରେ ରଖି କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଗ ହଠାତ୍ ଗୁରୁବାର ରାଣୀପୁର ଝରିଆଲ ମନ୍ଦିର ପରିଦର୍ଶନ କରିଛନ୍ତି। ଏବଂ ମନ୍ଦିର ଟ୍ରଷ୍ଟ କମିଟି ଏବଂ ଅଞ୍ଚଳବାସୀଙ୍କ ସହ ଶ୍ରାବଣ ସମୟର ସୁବିଧା ଅସୁବିଧା ପଚାରି ବୁଝିଥିଲେ। ତେବେ ବର୍ତ୍ତମାନ ସମୟରେ କୌଣସି ମୌଳିକ ସୁବିଧା ଟିକକ ନ ଥିଲେ ହେଁ ବହୁ ସଂଖ୍ୟାରେ ଭକ୍ତ, ଶ୍ରଦ୍ଧାଳୁ ଏବଂ ବୋଲବମ ଭକ୍ତଙ୍କ ବହୁ ଭିଡ ପରିଲକ୍ଷିତ ହେଉଥିବାରୁ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଣ କରିବାପାଇଁ ପ୍ରାଥମିକତା ଦିଆଯାଇଥିଲା। ତେବେ ବିଧାୟକ ଏ ବିଷୟରେ ବଙ୍ଗୋମୁଣ୍ଡା ବିଡ଼ିଓ ଙ୍କୁ ଫୋନ କରି ପାଣି ଟ୍ୟାଙ୍କର ବ୍ୟବସ୍ଥା କରିଦେବା ପାଇଁ କହିଥିଲେ। ପରେ ଟ୍ରଷ୍ଟ କମିଟି ଏବଂ ଅଞ୍ଚଳବାସୀଙ୍କ ତରଫରୁ ମହାଶିବରାତ୍ରି ମେଳା ଓ ରାଣୀପୁର ଝରିଆଲ ମହୋତ୍ସବକୁ ଆନ୍ତରିକତା ସହ ସହଯୋଗ କରି କାର୍ଯ୍ୟକ୍ରମକୁ ସଫଳ କରିଥିବାରୁ ଧନ୍ୟବାଦ୍ ଅର୍ପଣ କରାଯାଇ ଥିଲା। ରାଣୀପୁର ଝରିଆଲ ମନ୍ଦିରର ଉନ୍ନତି ପାଇଁ ଡିପିଆର ପ୍ରସ୍ତୁତ ହୋଇସାରିଛି। ଶିଘ୍ର କାମ ଆରମ୍ଭ ହୋଇଯିବ ବୋଲି ସୁଚନା ଦେଇଥିଲେ। ପରେ ମାଁ ପାଇଁ ଗଛଟିଏ କାର୍ଯ୍ୟକ୍ରମ କରି ବୃକ୍ଷ ରୋପଣ କରିଥିଲେ। ଏହି ସମୟରେ ମନ୍ଦିର ଟ୍ରଷ୍ଟ କମିଟିର ଆବାହକ ଅନିଲ କୁମାର ତ୍ରିପାଠୀ, ସମ୍ପାଦକ ଖିରସିନ୍ଧୁ ଭୋଇ, ମନ୍ଦିର ପୂଜକ ଜଗମୋହନ ତ୍ରିପାଠୀ, କୃଷ୍ଣ ସାହୁ,ଗୋପୀନାଥ ସାହୁ, ମଞ୍ଜେସ ମେହେର, ଝରିଆଲ ସମିତି ସଭ୍ୟ ରାଜୁ ହାତୀ, ରମା ସାହୁ, ହେମନ୍ତ ସାହୁ, ଝରିଆଲ ସରପଞ୍ଚ ଭରଦ୍ୱାଜ ଗହୀର, ନୌରାଜ ରଣା, ପବିତ୍ର ପୋଢ, ମୁନି ରାମ ନାଗ, ସୁଶାନ୍ତ ଥନାପତୀ ପ୍ରମୁଖ ଉପସ୍ଥିତ ଥିଲେ।