16-Mar-2025

ବରପାଲି (ସୁଦାମ ଦୀପ)
ପବିତ୍ର ଦୋଳ ପୂର୍ଣ୍ଣିମା ଅବସରରେ ବରପାଲି ଠାରେ ହରିହର ଭେଟ୍‌ଘାଟ୍ କାର୍ଯ୍ୟକ୍ରମ ହର୍ଷ ଉଲ୍ଲାସ ସହ ପାଳିତ ହୋଇଯାଇଛି। କପିଳେଶ୍ୱର ମନ୍ଦିରରୁ କପିଳେଶ୍ୱର ବାବା ରେଳ ଷ୍ଟେସନ, କଲେଜ ରୋଡ  ଦେଇ ଏକ ଶୋଭାଯାତ୍ରାରେ ଆସିଥିବା ବେଳେ ଜଗନ୍ନାଥ ମନ୍ଦିର ନିକଟରୁ ହରି ଏକ ଶୋଭାଯାତ୍ରାରେ ବରପାଲି ବସ୍ତି ରାସ୍ତା ଦେଇ ଆସିଥିଲେ । ଉଭୟ ହରି ଓ ହରଙ୍କ ଭେଟ୍‌ଘାଟ୍ ଦୈନିକ ବଜାର ଛକଠାରେ ହୋଇଥିଲା । ଏହି କାର୍ଯକ୍ରମରେ ଆସନ୍ତା ଶୀତଳ ଷଷ୍ଠୀ ଯାତ୍ରାର କନ୍ୟା ପିତାମାତା ଦାୟିତ୍ଵ ନେବାକୁ ଥିବା ସଞ୍ଜୟ ମେହେର ଓ ଧର୍ମ ପତ୍ନୀ ସସ୍ମିତା ମେହେର ତାଙ୍କ ସାହିର ଶୈବ ଭକ୍ତଙ୍କ ସହ ଉପସ୍ଥିତ ଥିଲେ । ହରିହର ଭେଟ୍‌ଘାଟ୍‌ର ନେତୃତ୍ୱ ନେଇଥିଲେ ଜବାହାର ଯୁବ ପରିଷଦ। ଅନୁଷ୍ଠାନ ପକ୍ଷରୁ ଭଜନ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ସେଠାରେ ପୂଜାର୍ଚ୍ଚନା ପରେ ମିଳିତ ଶୋଭାଯାତ୍ରା ଜଗନ୍ନାଥ ମନ୍ଦିର କୁ ଯାଇ ସେଠାରେ ଭକ୍ତଙ୍କ ଦର୍ଶନ ପରେ ପଣ୍ଡିତଙ୍କ ଦ୍ଵାରା ନୂତନ ପଞ୍ଜିକା ପଠନ ହୋଇଥିଲା। ଅନୁଷ୍ଠିତ ଉଭୟ ଶୋଭାଯାତ୍ରାରେ ଦୁଲ୍‌ଦୁଲି ବାଜା, ଘଣ୍ଟ ବାଦ୍ୟ, ଘୁମୁରା ନୃତ୍ୟ ଆଦିର କଳାକାରମାନେ ସାମିଲ ହୋଇଥିଲେ। ସହରର ପ୍ରତ୍ୟେକ ଛକରେ ଭକ୍ତଗଣ ପୂଜା ଅର୍ଚ୍ଚନା କରିଥିଲେ । ଏହି ଅବସରରେ ଜଗନ୍ନାଥ ମନ୍ଦିରରେ ଭଜନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି ଉତ୍ସବରେ ହଜାର ହଜାର ଶ୍ରଦ୍ଧାଳୁ ଦର୍ଶନ କରିବା ପାଇଁ ଭିଡ ଜମାଇଥିଲେ। ସୂଚନାଯୋଗ୍ୟ ଯେ ଏହି ହରିହର ଭେଟ୍‌ଘାଟ୍ କାର୍ଯ୍ୟକ୍ରମ କୁ ଶୀତଳ ଷଷ୍ଠୀ ଯାତ୍ରା କମିଟି ଆୟୋଜନ କରିଥାଏ। ହରିହରଙ୍କ ଭେଟ୍‌ଘାଟ୍‌ କାର୍ଯ୍ୟକ୍ରମ ସୁରୁଖୁରୁରେ ସମାପନ ହୋଇଥିବାରୁ ଯାତ୍ରା କମିଟି ସଭାପତି ଆନନ୍ଦ ବାବୁ ଓ ସମ୍ପାଦକ ଜୟନ୍ତ ତ୍ରିପାଠୀ ବରପାଲିବାସୀ ଙ୍କୁ ଧନ୍ୟବାଦ ଜଣାଇଛନ୍ତି।