04-Feb-2025

ସରକାର ଗରିବ ନିରୀହ ଜନସାଧାରଣଙ୍କ ପାଇଁ ଅନେକ ଯୋଜନା କରି ସହାୟତା କରୁଛନ୍ତି। ହେଲେ କିଛି ଦୁର୍ନୀତିଖୋର ଅଧିକାରୀ କର୍ମଚାରୀଙ୍କ ପାଇଁ ଗରିବ ନିରୀହ ଲୋକେ  ସେହି ସହାୟତା ପାଇବାରୁ ବଞ୍ଚିତ ରହୁଛନ୍ତି। ସିନାପାଲି ବ୍ଲକ ସଦର ପଞ୍ଚାୟତ କାର୍ଯ୍ୟାଳୟ ନିକଟସ୍ଥ ବୃଦ୍ଧା କୁନ୍ତି ମେହେର (୮୦) ଙ୍କ ୨୧ ମାସର ଭତ୍ତା  ବିଭାଗୀୟ ପଞ୍ଚାୟତ ଅଧିକାରୀ ଓ ଜନପ୍ରତିନିଧି ମିଶି ଖାଇ ଦେଇଥିବା ଅଭିଯୋଗ ହୋଇଛି। ଅଭିଯୋଗ ଅନୁସାରେ ବୃଦ୍ଧାଙ୍କ ସ୍ୱାମୀ ରାମେଶ୍ଵର ମେହେର ଗତ ୨୪ ଡିସେମ୍ବର ୨୦୨୪ ମସିହାରେ ମୃତ୍ୟୁ ହେଲାପରେ  ସିନାପାଲି ବ୍ଲକ ସାମାଜିକ ସୁରକ୍ଷା ବିଭାଗକୁ ବିଧବା ଭତ୍ତା ଆବେଦନ କରିବାକୁ ଗତ ୨୭ ଜାନୁଆରୀରେ ଯାଇଥିଲେ। ହେଲେ ସେଠାରେ ଗତ ୧୩/୪/୨୦୨୩  ମସିହାରେ ତାଙ୍କ ବୃଦ୍ଧା ଭତ୍ତା ସେକସନ ହୋଇଥିବା ବିଭାଗୀୟ ସୁତ୍ରରୁ  ଜାଣି ପାରିଥିଲେ। କିନ୍ତୁ ଏହି ଭତ୍ତା ହୋଇଥିବା ସ୍ଥାନୀୟ ପଞ୍ଚାୟତ କୌଣସି ସୂଚନା ଦେଇନଥିବା ବେଳେ  ଭତ୍ତା କାର୍ଡ ବା ଗୋଟିଏ ଟଙ୍କା ମଧ୍ଯ ଭତ୍ତା ବାବଦକୁ ପଞ୍ଚାୟତ  ଅଧିକାରୀ କିମ୍ବା ଜନପ୍ରତିନିଧି ଦେଇନ ଥିବା ଅଭିଯୋଗ କରିଥିଲେ। ଏହି ବିଷୟରେ ବୃଦ୍ଧା ଜାଣିବା ପରେ ସ୍ଥାନୀୟ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଭତ୍ତାକାର୍ଡ ଓ ଭତ୍ତା ଟଙ୍କା ୨ହଜାର ଦେଉଥିଲେ। ହେଲେ ଭତ୍ତା ଟଙ୍କା ଓ କାଡ୍ କୁ ବୃଦ୍ଧା ଗ୍ରହଣ କରିନଥିବା ବେଳେ ୨୧ ମାସର ଭତ୍ତା ଟଙ୍କା ପ୍ରଦାନ କରିବାକୁ ଅଧିକାରୀଙ୍କୁ ଦାବୀ କରିଥିଲେ। ସେହିପରି ସ୍ୱାମୀଙ୍କ ମୃତ୍ୟୁ  ପରେ ପରିବାର ଲୋକଙ୍କୁ ହରିଶ୍ଚନ୍ଦ୍ର ଯୋଜନାର ସହାୟତା ତୁରନ୍ତ ସ୍ଥାନୀୟ ପଞ୍ଚାୟତ ପ୍ରଦାନ କରିବା ନିୟମ ରହିଥିବା ବେଳେ ସେହି ସହାୟତା ମଧ୍ଯ କରିନଥିବା ଅଭିଯୋଗ ହୋଇଛି। ପ୍ରକାଶଯୋଗ୍ୟ ଯେ ଏହି ପଞ୍ଚାୟତ ରେ ଏଭଳି ଅନେକ ଲୋକଙ୍କ ଭତ୍ତା ବଣ୍ଟନରେ ଅନିୟମିତତା କରି  ହିତାଧିକାରୀଙ୍କ ଭତ୍ତା ଟଙ୍କା ଖାଇଯାଉ ଥିବା ଜନସାଧାରଣରେ ଅସନ୍ତୁଷ୍ଟ ପ୍ରକାଶ ପାଉଛି। ସୂଚନାଯୋଗ୍ୟ ଯେ ବୃଦ୍ଧା ଜଣକ ଭତ୍ତା ପାଇଁ ଗତ ୨୮/ ୩/ ୨୦୨୩  ରେ ଆବେଦନ କରିଥିଲେ। ଆବେଦନ ପରେ ଗତ ୧୩/୪/୨୦୨୩ ରେ ତାଙ୍କ ଭତ୍ତା ଗ୍ରହୀତ ହୋଇଥିଲା। ସେହି ସମୟରୁ ଆଜି ପର୍ଯ୍ୟନ୍ତ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଭାବେ ଗତ ତାରିଖ ୧୭/୫/୨୦୨୩ ରେ ସୁରଂଜନ ହୋତା ଯୋଗଦାନ କରିଥିବା ବେଳେ ତାପରେ ଗତ  ୧୩/ ୧୧/ ୨୦୨୩ ରେ ଭୀଷ୍ମରାଜ ମେହେର, ତା- ୧୩/୩/୨୪ ମସିହାରେ ସୁଜାତା ମେହେର ଯୋଗଦାନ କରି କାର୍ଯ୍ୟ ଦାୟିତ୍ୱ ତୁଲାଇ ଥିଲେ। ସେହିପରି ଗତ ତାରିଖ ୨୯/୧୦/୨୦୨୪ ରେ  ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଭାବେ ସୁଶାନ୍ତ ବେହେରା ଯୋଗଦାନ କରି ବର୍ତ୍ତମାନ ଦାୟିତ୍ୱ ତୁଲାଉଛନ୍ତି। ଗତ ତାରିଖ ୧୭/୫/୨୩ ଠାରୁ ୧୩/୩/୨୦୨୪ ପର୍ଯ୍ୟନ୍ତ ୩ଜଣ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କ ଅଦଲବଦଲ ହୋଇଥିବା ବେଳେ କେମିତି ବୃଦ୍ଧାଙ୍କ ଭତ୍ତା ବାବଦରେ ଯାଣି ପାରି ନଥିଲେ ତାହା ଜନସାଧାରଣ ରେ ଅନେକ ପ୍ରଶ୍ନ ସ୍ରୁଷ୍ଟି କରୁଥିବା ବେଳେ  ଅଧିକାରୀ ଓ ଜନପ୍ରତିନିଧି ମିଲିମିଶି ବୃଦ୍ଧାଙ୍କ ଭତ୍ତା ଟଙ୍କା ଖାଇଦେଇ ଥିବା ବୋଲି ଜନସାଧାରଣରେ ଯୋରଦାର ଚର୍ଚ୍ଚା ହେଉଛି। ଏନେଇ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ସୁଶାନ୍ତ ବେହେରାଙ୍କୁ ପଚାରିବାରୁ ଦୁଇ ତିନି ମାସ ହେବ ମୁଁ ଯୋଗଦାନ କରିଛି। କିଛି କିଛି ମାସକରି ସମସ୍ତ ଟଙ୍କା ପ୍ରଦାନ କରାଯିବ ବୋଲି କହିଛନ୍ତି। ପୁଣି ଏନେଇ ସିନାପାଲି ବିଡିଓ କାର୍ମୀ ଓରାମଙ୍କୁ ପଚାରିବାରୁ ତଦନ୍ତ କରି ଉଚିତ୍ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି। ଏନେଇ ବ୍ଲକ ତଥା ଜିଲ୍ଲା ପ୍ରଶାସନ ତୁରନ୍ତ ଦୁଷ୍ଟିଦେଇ ଉଚିତ୍ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବୀ ହେଉଛି।

(ନୂଆଁପଡ଼ା ଜିଲ୍ଲାରୁ ପରମେଶ୍ୱର ମେହେର ରିପୋର୍ଟ)