09-Aug-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ସୋନପୁର ଉଠାଜଳସେଚନ ନିଗମ ବିଭାଗର ନିର୍ବାହୀ ଯନ୍ତ୍ରୀଙ୍କ ସରକାରୀ ଆକାଉଣ୍ଟ୍ ରୁ ତାଙ୍କ ଅଫିସ୍ ର ସହକାରୀ ହିସାବରକ୍ଷକଙ୍କଦ୍ବାରା ୧ କୋଟି ୧୯ ଲକ୍ଷ ୭୧ ହଜାର ଟଙ୍କା ହଡପ ହେବା ମାମଲା ଚାଞ୍ଚଲ୍ଯ ସୃଷ୍ଟି କରିଛି । ଏବେ ଏହା ସୋନପୁର ଥାନାକୁ ଯିବାପରେ ସୋନପୁର ଭିଜିଲାନ୍ସ ତଦନ୍ତ କରୁଛି । ଭୁବନେଶ୍ବରରୁ ବିଭାଗର ଏକ ତଦନ୍ତ କମିଟି ଆସି ମଧ୍ୟ ଯାଞ୍ଚ କରିଛି । ନିଜ କମ୍ପ୍ୟୁଟର ଦୋକାନ ବା ବି ଏମ ଫାର୍ମ ଆକାଉଣ୍ଟ୍ କୁ ଏହି ଟଙ୍କା ପର୍ଯ୍ୟାୟକ୍ରମେ ଟ୍ରାନ୍ସଫର୍ କଲାପରେ ତୃତୀୟ ଥର ଆଉ ଟଙ୍କା ଉଠାଇବାକୁ ଉଦ୍ୟମ କରୁଥିବା ବେଳେ ବ୍ୟାଙ୍କର ସନ୍ଦେହରୁ ଏହା ଜଣାପଡିଛି । ଧରା ପଡିବା ପରେ ସ୍ଥାନୀୟ ଘୋଡାଘାଟ ପଡା ଘରୁ ସପରିବାର ଅଭିଯୁକ୍ତ ବଳରାମ ମେହେର ଫେରାର୍ ହୋଇଯାଇଥିବା ପ୍ରକାଶ । ନିର୍ବାହୀଯନ୍ତ୍ରୀ ଇଂ ପ୍ରଫୁଲ୍ଲ କୁମାର ବେହେରା କହିଛନ୍ତି ଯେ , ସେ ବିଶ୍ବାସରେ ଅଫିସ୍ କାମରେ ସୁବିଧା ହେବ ବୋଲି ୨୦୧୪ରୁ ଡାଟା ଏଣ୍ଟ୍ରି ଅପରେଟରରୁ ଦୁଇବର୍ଷ ତଳେ ସହକାରୀ ହିସାବରକ୍ଷକ ହୋଇଥିବା ଅଭିଯୁକ୍ତ କର୍ମଚାରୀଙ୍କୁ ଆରଟିଜିଏସ୍ ରେ ବ୍ୟାଙ୍କରୁ ଟଙ୍କା ଉଠାଣ ନିମନ୍ତେ ନିଜ ଆଇଡି, ପାସ୍‌ୱାର୍ଡ , ସିଲ୍ , ଦସ୍ତଖତ ଇତ୍ୟାଦି ଦେଇ ଦେଇଥିଲେ । ତେବେ ଏଇ ଆଉଟ୍ ସୋର୍ସିଂରେ ନିଯୁକ୍ତି ପାଇ ଅଫିସ୍ ରେ ଏତେବର୍ଷ ରହିଥିବା 

ବିଶ୍ବସ୍ତ କର୍ମଚାରୀ ଜଣକ ଏପରି ବିଶ୍ବାସଘାତ କରିବ ବୋଲି ସେ ଜାଣି ନଥିଲେ । 

ଘଟଣାରୁ ପ୍ରକାଶ ଯେ , ଗତବର୍ଷ ଅଗଷ୍ଟ ମାସରେ ୩୨ ଲକ୍ଷ ଓ ଗତ ଜୁଲାଇମାସରେ ୮୬ ଲକ୍ଷ ଆକାଉଣ୍ଟ୍ ଟ୍ରାନ୍ସଫର୍ କରି ହଡପ କଲାପରେ ଗତ ୭ ତାରିଖରେ ଅଭିଯୁକ୍ତ ଏକ ୭୬ ଲକ୍ଷ ଟଙ୍କାର ଚେକ୍ ନେଇ ସୋନପୁର ୟୁନିଅନ ବ୍ୟାଙ୍କକୁ ଯାଇଥିବାବେଳେ ଦସ୍ତଖତରେ ଜାଲିଆତି ସନ୍ଦେହରେ ନୂତନ ଭାବେ ୧୫ ଦିନତଳେ ଯୋଗ ଦେଇଥିବା ବ୍ୟାଙ୍କମ୍ୟାନେଜର ନିର୍ବାହୀଯନ୍ତ୍ରୀଙ୍କୁ ଫୋନ୍ ରେ ପଚାରିବାରୁ ଏହା ଜଣାପଡ଼ିଥିଲା  

ତେବେ ଏତେଦିନ ଧରି ଏତେ ପରିମାଣର ସରକାରୀ ଟଙ୍କାର ହଡପ ସମ୍ପର୍କରେ କିପରି କେହି ଜାଣିପାରି ନଥିଲେ , ଆଶ୍ଚର୍ଯ୍ୟର କଥା । ଉଲ୍ଲେଖନୀୟ ଯେ , ଏଭଳି ଠକେଇ ସୋନପୁରରେ ତୃତୀୟଥର ଘଟିଲା । ଆଗରୁ ସୋନପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ୫ କୋଟିର ଓ ସୋନପୁର କଲେଜରେ ଏଭଳି ଘଟିଥିଲା ।