09-Aug-2024

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲାପାଳଙ୍କ ସମ୍ମୀଳନୀ କକ୍ଷରେ ଜିଲାପାଳ ଦିବ୍ୟଜ୍ୟୋତି ପରିଡ଼ାଙ୍କ ପୌରହିତ୍ୟରେ ଏକ ସମୀକ୍ଷା କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଉକ୍ତ କାର୍ଯ୍ୟକ୍ରମରେ ୱାନ୍ ଷ୍ଟପ୍ ସେଣ୍ଟର(ସକ୍ଷୀ) ଓ ଜାଗୃତି ଅନୁଷ୍ଠାନର ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି l ଏହି ସମୀକ୍ଷା ଅବସରରେ ଜିଲ୍ଲାର ପ୍ରତ୍ୟେକ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ସମନ୍ୱିତ ଶିଶୁ ବିକାଶ କେନ୍ଦ୍ର, ପଞ୍ଚାୟତ ସମିତି କାର୍ଯ୍ୟାଳୟ ଓ ପୋଲିସ ଥାନା କାନ୍ଥରେ ଅନୁଷ୍ଠାନ ପକ୍ଷରୁ ସଚେତନତା ବାର୍ତ୍ତା ଲେଖି ତୃଣମୂଳ ସ୍ତରରେ ସାଧାରଣ ଲୋକଙ୍କୁ ସଚେତନ କରିବା ପାଇଁଁ ଜିଲାପାଳ ପରାମର୍ଶ ଦେଇଥିଲେ। ସୂଚନା ଅନୁଯାୟୀ ଜଣାପଡିଛି ଯେ ଗତ ୫ ବର୍ଷ ମଧ୍ୟରେ ସକ୍ଷୀ କେନ୍ଦ୍ରରେ ୧୧୯୪ ଅଭିଯୋଗ ପଞ୍ଜିକରଣ ହୋଇଛି ଓ ବିଶେଷ କରି ଗତ ଆର୍ଥିକ ବର୍ଷରେ ୪୩୦ ଅଭିଯୋଗ ପଞ୍ଜିକରଣ ହୋଇଛି। ସେଥିରୁ ୭ ଅଭିଯୋଗର ନିଷ୍ପତ୍ତି ହୋଇନାହିଁ। ଏହି 'ସକ୍ଷୀ' କେନ୍ଦ୍ର ଯୋଗୁଁ ବହୁ ମହିଳା ନିଜ ଜୀବନରେ ପରିବର୍ତ୍ତନ ଓ ଶୃଙ୍ଖଳିତ ଜୀବନ ବିତାଉଥିବା ପ୍ରମାଣ ଉଲ୍ଲେଖ କରିଥିଲେ। ବିଶେଷ କରି ଆସନ୍ତା ଅଗଷ୍ଟ ୧୫ ତାରିଖରେ ଲାଲକିଲ୍ଲା ଆୟୋଜିତ ସ୍ବାଧୀନତା ଦିବସ ଉପଲକ୍ଷେ ଗଞ୍ଜାମ ୱାନ୍ ଷ୍ଟପ୍ ସେଣ୍ଟର ବା "ସକ୍ଷୀ" କେନ୍ଦ୍ର ନିମନ୍ତ୍ରିତ ହୋଇଥିବାରୁ ସଂସ୍ଥାର ସମସ୍ତ କର୍ମଚାରୀଙ୍କୁ ପ୍ରଶଂସା କରିଥିଲେ। ଅନୁଷ୍ଠିତ କାର୍ଯ୍ୟକ୍ରମରେ ଜିଲ୍ଲା ସ୍ଵାସ୍ଥ୍ୟ ଅଧିକାରୀଙ୍କ ପ୍ରତିନିଧି ଡଃ ଭାବା ମୋହନ ପଣ୍ଡା, କେନ୍ଦ୍ରୀୟ ପ୍ରଶାସିକା ମହେଶ୍ୱତା ପାଢୀ,  ଜିଲ୍ଲା ପଞ୍ଚାୟତ ଅଧିକାରୀ, ଗଞ୍ଜାମ ଏସ୍ ପି ଙ୍କ ପ୍ରତିନିଧି, ବ୍ରହ୍ମପୁର ଏସ୍ ପି ଙ୍କ ପ୍ରତିନିଧି ଅନୀତା ସାହୁ, ଜିଲ୍ଲା ଶିଶୁ ମଙ୍ଗଳ ଅଧିକାରୀ ପ୍ରମୁଖ ଯୋଗ ଦେଇଥିଲେ। ପ୍ରାରମ୍ଭରେ ଜିଲ୍ଲା ସମାଜ ମଙ୍ଗଳ ଅଧିକାରୀ ସ୍ବାଗତ ଭାଷଣ ଦେଇଥିବା ବେଳେ ଆଇ ଏସ୍ ଆର ଡି ନିର୍ଦ୍ଦେଶକ ସୁଧୀର ସାବତ କାର୍ଯ୍ୟକ୍ରମ ବିଷୟରେ ସୂଚନା ପ୍ରଦାନ କରିଥିଲେ।