08-Aug-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): କିଛିଦିନତଳେ ସୁବର୍ଣ୍ଣପୁର ଜିଲ୍ଲାର ତରଭା ବ୍ଲକ୍ ଅନ୍ତର୍ଗତ କମସରା ପେକ୍ସରେ ଖରିଫ୍ ଧାନକିଣାରେ ଟାର୍ଗେଟ୍ ବାହାରେ ଲକ୍ଷାଧିକ ଟଙ୍କାର ଧାନକିଣି ଭେଣ୍ଡର୍ ରସିଦ୍ ଦେଇ ପାଉଣା ବାକି ଫେରାର୍ ହୋଇଯାଇଥିବା ଚାଷୀଙ୍କ ଅଭିଯୋଗର ସମାଧାନ ହୋଇ ଯାଇଥିବା ପ୍ରକାଶ । 

ଗ୍ରାମରେ ଏକ କଙ୍ଗାରୁ କୋର୍ଟରେ ଅଭିଯୁକ୍ତ ଦୋଷସ୍ବୀକାର କରି ଏକ ହାତଲେଖା ସ୍ବୀକାରୋକ୍ତି ଲେଖିବା ସହ ଅଭିଯୋଗକାରୀ ତଥାକଥିତ ଚାଷୀଙ୍କୁ ଜମି ବିକି ୧୫ ଲକ୍ଷଟଙ୍କା ଭରଣା କରିବାରୁ ଜିଲ୍ଲା ପ୍ରଶାସନ , ଯୋଗାଣ ବିଭାଗ , ସମବାୟ ବିଭାଗ ଓ ତରଭାଥାନା ପୁଲିସ୍ ରୁ ଅଭିଯୋଗ ଫେରସ୍ତ ହୋଇଯାଇଛି  ! ଏହା ସହ ସମ୍ପୃକ୍ତ ଅଭିଯୋଗକାରୀମାନେ ଜିଲ୍ଲାପାଳଙ୍କୁ ଚିଠିଲେଖି ଅଭିଯୁକ୍ତ ଡାଟା ଏଣ୍ଟ୍ରି ଅପରେଟରଙ୍କ ବିରୁଦ୍ଧରେ ଆଉ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନଯିବାକୁ ଅନୁରୋଧ କରିଛନ୍ତି । ଫଳରେ ବାହାର କରିଦିଆଯାଇଥିବା ଅଭିଯୁକ୍ତ ଡିଇଓଙ୍କୁ ପୁନଃଅବସ୍ଥାପିତ କରାଯାଇଥିବା ପ୍ରକାଶ । ସୋନପୁର ଜିଲ୍ଲାର ଏହି ବିଚିତ୍ର ସମାଧାନ ସମ୍ପର୍କରେ ମୁଖ୍ୟମନ୍ତ୍ରୀ ଓ ମୋହନ ସରକାରଙ୍କୁ ଏକ ନୂତନ ଦିଗ୍ ଦର୍ଶନ ମିଳିଲା ବୋଲି ଲୋକେ କଟାକ୍ଷ କରିଛନ୍ତି ।ଉଲ୍ଲେଖନୀୟ ଯେ , କମସରା ପେକ୍ସରେ ଗତ ଜାନୁଆରୀ ମାସଶେଷ ସୁଦ୍ଧା ଖରିଫ୍ ଋତୁର ଧାନକିଣା ବନ୍ଦ ହେବାପରେ ସେହିଗ୍ରାମ ନିବାସୀ ଡିଇଓ ମନୋରଞ୍ଜନ ମିଶ୍ର ଗତ ଫେବୃୟାରୀ ୫ ତାରିଖ ମଧ୍ୟରେ କୁମ୍ଭାରମୁଣ୍ଡାର ଚାଷୀ ଶକ୍ତି ସାହୁଙ୍କ ସମେତ ଆଖପାଖ ଗ୍ରାମ ବଡଯୋର , ଲେମ୍ବୁପାଲି , ମହୁଲପାଲି ,ଜାମପାଲି ଓ କମସରାର ଆଉ ୧୯ ଜଣ ଚାଷୀଙ୍କର ଧାନକିଣି ଭେଣ୍ଡର ସ୍ଲିପ୍ ଦେଇଥିଲେ । ସେମାନଙ୍କୁ

ଆଜି / କାଲି କରି ପ୍ରାପ୍ୟ ନ ଦେଇ ଲୁଚି ବୁଲିବାରୁ ଉକ୍ତ ଚାଷୀମାନେ ଜିଲ୍ଲାପାଳଙ୍କ ସମେତ ଜିଲ୍ଲା ଯୋଗାଣ ଅଧିକାରୀ , ଡିଆରସିଏସ୍ ଓ ଏଆରସିଏସ୍ ଙ୍କ ଉପସ୍ଥିତିରେ ତରଭା ଥାନାରେ ମଧ୍ୟ ଅଭିଯୋଗ କରିଥିଲେ ।  ଏ ସମ୍ପର୍କରେ ଗଣମାଧ୍ୟମରେ ଖବର ପ୍ରକାଶ ପାଇ ତନାଘନା ହେବାରୁ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଏକ ତଦନ୍ତକମିଟି ଗଠନ କରାଯାଇ ତଦନ୍ତ ହୋଇଥିଲା । ଏହା ସହିତ ଉକ୍ତ ଅଭିଯୁକ୍ତ ଡିଇଓଙ୍କୁ ବାହାର କରି ଦିଆଯାଇଥିଲା । ଅଭିଯୋଗ ଅନୁଯାୟୀ , ଏହି ଧାନକୁ ଡିଇଓ ଅସାଧୁ ମିଲର୍ସ ଓ ଚୋରାବେପାରୀଙ୍କ ଜରିଆରେ ବାହାରକୁ ଚୋରାରେ ବିକିଦେଇଥିବା ମଧ୍ୟ ଅଭିଯୋଗ ପ୍ରକାଶ ପାଇଥିଲା । ଏଥିରେ ସିଆଲଯୋରୀର ଲଳିତା ବନାମ ଶୀତଲମିଲ୍ ର ନାଁ ଉଠିଥିଲା । ତେବେ ସମ୍ପୃକ୍ତ ମିଲ୍ ପକ୍ଷରୁ ଏହାକୁ ଅସ୍ବୀକାର କରାଯାଇଛି । ଏଥିରେ ପେକ୍ସର ଆଉ କେହି ବା ସମ୍ପାଦକ ଛନ୍ଦା ଚରଣ ପଣ୍ଡା ସମ୍ପୃକ୍ତ ନଥିବା ସଫେଇ ଦିଆଯାଇଥିଲା ।ତେବେ ଇତିମଧ୍ୟରେ ଫେରାର୍ କୁହାଯାଇଥିବା ଉକ୍ତ ଅଭିଯୁକ୍ତ ଗାଁ'କୁ ଫେରି ପେକ୍ସ ସଭାପତି ଓ  ଭଦ୍ରଲୋକଙ୍କ ସହ ଏଆରସିଏସ୍ ଙ୍କ ଉପସ୍ଥିତିରେ ଏକ ବୈଠକରେ ଏହାର ସମାଧାନ କରିଦେଇଥିବା ଓ ଏକ ହାତଲେଖା ସ୍ବୀକାରୋକ୍ତି

ଦେଇ ଦୋଷ ସ୍ବୀକାର କରିଥିବା ଏବଂ କୁମ୍ଭାରମୁଣ୍ଡାର ପ୍ରମୁଖ ଚାଷୀ ଓ ବେପାରୀ ଶକ୍ତି ସାହୁଙ୍କୁ ନିଜର ୩ ଏକର ଜମି ତରଭା ରେଜିଷ୍ଟ୍ରି ଅଫିସ୍ ରେ ୧୫ ଲକ୍ଷ ଟଙ୍କାରେ ବିକ୍ରିକରିଦେଇଥିବା ଓ ବର୍ଷେ ମଧ୍ୟରେ ଟଙ୍କା ନ ଫେରାଇଲେ ଜମିର ମାଲିକାନା କ୍ରେତାଙ୍କ ହାତକୁ ଚାଲିଯିବ ବୋଲି ସର୍ତ୍ତ ରଖିଥିବା ପ୍ରକାଶ । ଏହାପରେ ଅଭିଯୋଗକାରୀ ତଥାକଥିତ ଚାଷୀଙ୍କ ପକ୍ଷରୁ ଜିଲ୍ଲାପାଳଙ୍କୁ ଅଭିଯୁକ୍ତଙ୍କ ବିରୁଦ୍ଧରେ ଆଉ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନଯିବାକୁ ଅନୁରୋଧ କରାଯାଇଛି 

ଏ ସମ୍ପର୍କରେ ଜିଲ୍ଲା ଯୋଗାଣ ବିଭାଗ , ସମବାୟ ବିଭାଗ , ପ୍ରଶାସନ ଓ ପୁଲିସ୍ ରେ କରାଯାଇଥିବା ଅଭିଯୋଗକୁ ଫେରସ୍ତ ନିଆଗଲା ବୋଲି ପ୍ରକାଶ । 

ଅନ୍ୟ ଏକ ସୂତ୍ରରୁ ପ୍ରକାଶ ଯେ ଏହି ଧାନ ଏକ ନିର୍ଦ୍ଦିଷ୍ଟ ମିଲ୍ ର ସ୍ଥାନୀୟ ତରଭାର ଜଣେ ମାରୁଆଡି ମ୍ୟାନେଜର ଓ ବେପାରୀଙ୍କ ଜରିଆରେ ଛତିଶଗଡର ସରକାରୀ ଧାନଦର ଅଧିକ ଥିବାରୁ ପାର୍ କରି ଦିଆଯାଇଛି । 

ତେବେ  କମସରା ଗ୍ରାମରେ ଅନୁଷ୍ଠିତ କୁହାଯାଇଥିବା ଉକ୍ତ କଙ୍ଗାରୁକୋର୍ଟରେ ଅଭିଯୁକ୍ତ ଡିଇଓଙ୍କ ଉକ୍ତ ହାତଲେଖା ସ୍ବୀକାରୋକ୍ତିରେ ସେ ଉକ୍ତ ମିଥ୍ୟାଖର୍ଦ୍ଦି କାରବାରରେ ସିଏସଓ ଅଫିସ୍ ର ଜଣେ କମ୍ପ୍ୟୁଟର ଅପରେଟର ରଞ୍ଜିତ ଦୀପ ଓ ଭୁବନେଶ୍ବର ମୁଖ୍ୟ ଯୋଗାଣ କାର୍ଯ୍ୟାଳୟର ଜଣେ କର୍ମଚାରୀ ତାଙ୍କୁ ସହଯୋଗ କରିଥିବା 
ଉଲ୍ଲେଖ କରିଥିଲେ ହେଁ , ତଦନ୍ତକାରୀ କମିଟି , ଯୋଗାଣ ବିଭାଗ , ଡିଆରସିଏସ୍ , ତରଭା ଥାନା ପୁଲିସ୍ ବା ଖୋଦ୍ ଜିଲ୍ଲାପାଳ ଏଥିପ୍ରତି ଉଦାସୀନ ରହିବା ଆଶ୍ଚର୍ଯ୍ୟଜନକ !  ଏଦିସହ ପୁଣି ଉକ୍ତ ଅଭିଯୁକ୍ତ ଡାଟା ଏଣ୍ଟ୍ରି ଅପରେଟରଙ୍କୁ ପୁନଃଅବସ୍ଥାପିତ କରିବାକୁ ପରାମର୍ଶ ପଛରେ ଏହି ଅଞ୍ଚଳରେ ଏଭଳି ଅନିୟମିତତାକୁ ପ୍ରୋତ୍ସାହିତ କରାଯିବାକୁ ସୁଯୋଗ ଦିଆଯିବା ନୁହେଁ କି  ? ଅର୍ଥାତ୍ ଆଉ ଏକବର୍ଷରେ ସେ ୧୫ ଲକ୍ଷର ଭରଣା କରିଦେଇପାରିବେ  ? ଏଣୁ ଏହି ଘଟଣାରୁ ସୁବର୍ଣ୍ଣପୁର ଜିଲ୍ଲା , ସୋନପୁର ଡିଆରସିଏସ୍ ,  ଯୋଗାଣ ବିଭାଗ ଓ ଥାନାପୁଲିସ୍ ର କାର୍ଯ୍ୟପଦ୍ଧତି ଅନୁମେୟ । କମସରା ପେକ୍ସର ଚେର ଯେ କେତେଦୂର ଲମ୍ବିଛି ଓ ଏଇସବୁ ଡାଟାଏଣ୍ଟ୍ରି ଅପରେଟରମାନେ କେଡେ ଖିଲାଡି ଏହି ଘଟଣାରୁ ସ୍ପଷ୍ଟ ଅନୁମିତ । ସରକାର ଏହାର ଏକ ଉଚ୍ଚସ୍ତରୀୟ ତଦନ୍ତ ସକାଶେ ଦୃଷ୍ଟି ଦେବେ କି  ?