07-Aug-2024

ବରଗଡ଼/ଅମ୍ବାଭୋନା:(ନିରଞ୍ଜନ ତ୍ରିପାଠୀ)- ଜଣେ ସଫଳ ଚାଷୀ ସୁବଳ ପାତ୍ର। ବୟସ ମାତ୍ର   ୪୭ ବର୍ଷ ଓ ଜୀବିକା କହିଲେ କେବଳ ଚାଷ ।ଅମ୍ବାଭୋନା ବ୍ଲକ ଅଧିନରେ ଥିବା ଛୋଟିଆ ଗାଁ କଣ୍ଠିପାଲି ଗ୍ରାମରେ ନିଜସ୍ଵ ବାସଗୃହ। ଜମିବାଡି ସମୁଦାୟ ତିନି ଏକର।ଛଅ ପ୍ରାଣୀକୁ ନେଇ ଘର ସଂସାର ଚଳେ। ତିନି ଝିଅ, ଗୋଟିଏ ପୁଅ ଏବଂ ସ୍ୱାମୀ ସ୍ତ୍ରୀକୁ ନେଇ ପରିବାର ଚଳେ। ଅନ୍ୟ ବର୍ଷ ମାନଙ୍କରେ ବିଲରେ ଧାନ, ବାଇଗଣ ଆଦି ଚାଷ କରି ଆଶାନୁରୂପ ଲାଭ ପାଇନ ଥିଲେ କିନ୍ତୁ କୃଷିକାର୍ଯ୍ୟ କରି ଜୀବିକା ନିର୍ବାହ କରୁଥିବା ସୁବଳ ଅନ୍ୟର ପରାମର୍ଶ ବିନା କେବଳ ନିଜ ଅନୁଭୂତିକୁ ବିନିଯୋଗ କରି ଏ ବର୍ଷ ନିଜର ଗୋଟିଏ ଏକର ଜମିରେ ଅଦା ସହ ଧନିଆ ଚାଷ କରିଛନ୍ତି। ମିଶ୍ରିତକୃଷିକୁ ନେଇ ସୁବଳର ପରିବାର ଭାରୀ ଖୁସି । ହାଟକୁ ଯିବାକୁ ପଡୁନି।ଆମ ରାଜ୍ୟ ଓଡ଼ିଶା ତଥା ପଡ଼ୋଶୀ ରାଜ୍ୟ ଛତିଶଗଡ଼ରୁ ବେପାରୀ ଆସି ଘରୁ ନେଉଛନ୍ତି।ଧନିଆ ପତ୍ରକୁ ବିକ୍ରି କରି ଭଲ ଦୁଇ ପଇସା ମିଳୁଛି

ବୋଲି ମତ ଦିଅନ୍ତି ସୁବଳ ପାତ୍ର। ସୁସ୍ଥ  ବିହନର ଚୟନ ସାଙ୍ଗକୁ ପାଗ ଅନୁକୂଳ ଯୋଗୁଁ ଏହା ସମ୍ଭବ ହୋଇ ପାରିଛି ବୋଲି କହନ୍ତି ସୁବଳ ।ପ୍ରଶାସନ ଦୃଷ୍ଟି ଦେଲେ ଆଗକୁ ଆହୁରି ଲାଭାନ୍ବିତ ହେବେ ବୋଲି ଆଶା ବାନ୍ଧିଛନ୍ତି ସୁବଳର ପରିବାର। ସ୍ଥାନୀୟ ଅଞ୍ଚଳବାସୀ ତାଙ୍କରି ଏଭଳି ପରିଶ୍ରମକୁ ବେଶ୍ ପ୍ରଶଂସା କରୁଛନ୍ତି । ସୁବଳଙ୍କ ଅଦା ସହ ଧନିଆ ଚାଷରୁ ଏପରି ରୋଜଗାର କରିବାର ପନ୍ଥା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।