07-Aug-2024

ବରଗଡ଼/ପାଇକମାଲ(ନିରଞ୍ଜନ ତ୍ରିପାଠୀ)- ପଶ୍ଚିମ ଓଡିଶାର ସୁପ୍ରସିଦ୍ଧ ପର୍ଯ୍ୟଟନ କ୍ଷେତ୍ର ଶ୍ରୀଶ୍ରୀ ନୃସିଂହନାଥ ପୀଠରେ ଏକ ସ୍ଥାୟୀ ଫାଣ୍ଡି ସହ ଦିବାରାତ୍ର ପୋଲିସ ବ୍ୟବସ୍ଥା କରିବା ପାଇଁ ମୁଖ୍ୟମନ୍ତ୍ରୀଙ୍କ ନଜର ପଡୁ ବୋଲି ଦାବି ଜଣାଉଛନ୍ତି ପର୍ଯ୍ୟଟକ। ପ୍ରତିଦିନ ହଜାର ହଜାର ସଂଖ୍ୟକ ରାଜ୍ୟ ତଥା ରାଜ୍ୟ ବାହାରରୁ ଶ୍ରଦ୍ଧାଳୁଙ୍କ ସମାଗମ ହେଉଥିବା ବେଳେ ଶ୍ରୀଶ୍ରୀ ନୃସିଂହନାଥ ପୀଠରେ ଏକ ଫାଣ୍ଡି ନ ଥିବାରୁ ବେଳେବେଳେ ଯାତ୍ରୀ, ପର୍ଯ୍ୟଟକ ଓ ଭକ୍ତ ମାନେ ବିଭିନ୍ନ ସମସ୍ୟାରେ ପଡ଼ି ହଇରାଣ ହରକତ ହେଉଛନ୍ତି। ଗନ୍ଧମାର୍ଦ୍ଦନ ପର୍ବତମାଳା ସହ ଚିରସ୍ରୋତା ଝରଣା, ଜଳପ୍ରପାତ ଓ ଅନେକ ମନ୍ଦିର ରହିଛି। ଲୋକ ଗାଧୋଇବା ପାଇଁ ଝରଣା ନିକଟକୁ ଯାଇଥାନ୍ତି।ଶହଶହ ସଂଖ୍ୟାରେ ଦୋକାନ ବଜାର ରହିଛି, କିଣାବିକା ଚାଲିଛି । ବଣ ଭୋଜି, ବିବାହ, ବ୍ରତ, କାର୍ଯ୍ୟଘର, ସୁଦ୍ଧିକ୍ରିୟା ପ୍ରଭୃତି ସାମାଜିକ କାର୍ଯ୍ୟକ୍ରମ ହେଉ କିମ୍ବା  ଠାକୁରଙ୍କୁ ଦର୍ଶନ ପାଇଁ ହେଉ ବିଭିନ୍ନ ଅଞ୍ଚଳ ରୁ ବିଭିନ୍ନ ପ୍ରକାରର, ବିଭିନ୍ନ ବର୍ଗର ଲୋକ ଶ୍ରୀଶ୍ରୀ ନୃସିଂହନାଥକୁ ଦୈନନ୍ଦିନ ଯିବା ଆସିବା କରୁଛନ୍ତି। ଏଭଳି ଏକ ବିରାଟ ପର୍ଯ୍ୟଟନ ଅଞ୍ଚଳରେ କେବେବି କେଉଁଠି ବି ଅଘଟଣ କିମ୍ବା ଦୂର୍ଘଟଣା ଘଟିବାର ସମ୍ଭାବନା ଥିବାବେଳେ ଗଣ୍ଡଗୋଳ, ଚୋରୀ, ବଦମାସି ହେବାର ସମ୍ଭାବନା ସବୁବେଳେ ରହୁଛି।ଯଦି  କୈାଣସି ଛୋଟ ବଡ ଘଟଣା, ଗଣ୍ଡଗୋଳ କିମ୍ବା ଦୂର୍ଘଟଣା ଘଟୁଛି ତାହେଲେ ଘଟଣା ପାଇଁ ଶ୍ରୀଶ୍ରୀ ନୃସିଂହନାଥ ପୀଠ ଠାରୁ ପାଇକମାଲ ଥାନା ପ୍ରାୟ ତିନି କିଲୋମିଟର ଦୈାଡିବାକୁ ପଡୁଛି। ସେହିପରି ଶ୍ରୀଶ୍ରୀ ନୃସିଂହନାଥ ପୀଠରେ ବାର ମାସରେ ତେର ପର୍ବ ପାଳନ ହେଉଥିବାରୁ ଯାତ୍ରୀଙ୍କ ଭିଡ ମଧ୍ୟ ପ୍ରବଳ ରହୁଛି । କେବଳ ବୈଶାଖ ମେଳା କୁ ଛାଡିଦେଲେ ଅନ୍ୟ ଦିନରେ ପୋଲିସର ଦେଖାନାହିଁ। କୈାଣସି ଅଘଟଣ ହେଲେ ପାଇକମାଲ ଥାନା ଅଧିକାରୀ ବହୁ ବିଲମ୍ବରେ ପହଞ୍ଚିବା ମଧ୍ୟ ନଜିର ରହିଛି। ପାଇକମାଲ ଥାନାର ପିସିଆର ଗାଡ଼ି କେବେ ପ୍ରେଟ୍ରୋଲିଙ୍ଗରେ ନୃସିଂହନାଥ ଆସେ ନାହିଁ । ନୃସିଂହନାଥ ବୈଶାଖ ମେଳା ବୈଠକ ରେ ପୋଲିସ କଥା ଉଠିଲେ ମାଓବାଦୀଙ୍କ ବାହାନା ବାଜି କରି କଥା ଏଡ଼ାଇ ଦିଆଯାଏ । ଲୋକ ମଧ୍ୟରେ ଆଲୋଚନା ହୁଏ ଯେ ପୋଲିସ ତାଙ୍କ ବନ୍ଧୁ ପରିଜନଙ୍କୁ ନୃସିଂହନାଥ ବୁଲିବାକୁ ଆଣିଲେ ମାଓ ଭୟ ନ ଥାଏ କିନ୍ତୁ ପୋଲିସ ବ୍ୟବସ୍ଥା କଥା ଉଠିଲେ ମାଓବାଦୀ ଭୟ କଥା ଉଠେ କାହିଁକି ? ଶ୍ରୀଶ୍ରୀ ନୃସିଂହନାଥ ପୀଠ  ଭଗବାନ ଭରସାରେ ଚାଲୁଛି । ଗୃହ ବିଭାଗ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ଗୁରୁତ୍ବ ଦେଇ ଶ୍ରୀଶ୍ରୀ ନୃସିଂହନାଥ ପର୍ଯ୍ୟଟନ ପୀଠରେ ଆଇନଶୃଙ୍ଖଳା ପରିସ୍ଥିତି ସୁଧାର ସହ ପର୍ଯ୍ୟଟକଙ୍କ ସୁରକ୍ଷା ପାଇଁ ଏକ ଦିବାରାତ୍ର ଫାଣ୍ଡି ସହ ପୋଲିସ ବ୍ୟବସ୍ଥା କରିବାକୁ ସ୍ଥାନୀୟ ଜନସାଧାରଣଙ୍କ ସମେତ ପର୍ଯ୍ୟଟକମାନେ ଦାବି କରୁଛନ୍ତି।