06-Aug-2024

ବିନିକା(ହିମାଂଶୁ ଶେଖର ପୁଟେଲ): ସ୍ଥାନୀୟ ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନ ପର୍ଯ୍ୟନ୍ତ ମୌଖିକ ଓ ଲିଖିତ ଅଭିଯୋଗ କଲେ ।ପ୍ରତିଶ୍ରୁତି ମିଳିଲା ହେଲେ ରାସ୍ତାର ଦଦରା ଅବସ୍ଥା ସମାଧାନ ହେଲା ନାହିଁ ।ସମୟ ଅତିବାହିତ ହେଲା ପରେ ବାଧ୍ୟ ହୋଇ ଆମରଣ ଅନଶନ କରିବାକୁ ପଡିଲା ।ଘଟଣାଟି ହେଉଛି ସୁବର୍ଣ୍ଣପୁର ଜିଲ୍ଲା ବିନିକା ଅଞ୍ଚଳରେ ।ଏନଏସି ୧୦ନଂ ୱାର୍ଡ ଉଲ୍ଲେ ଗାଁ ମୁଣ୍ଡ ରାସ୍ତା ଶୋଚନୀୟ ହୋଇ ପଡ଼ିଛି ।ରାସ୍ତାର ଅଧିକାଂଶ ସ୍ଥାନରେ ଛୋଟ ବଡ଼ ଗର୍ତ୍ତ ସୃଷ୍ଟି କରି ମରଣମୁହାଁ କୁ ଅନେଇ ରହିଛି ।ସାମାନ୍ୟ ବର୍ଷା ହେଲେ ଉକ୍ତ ଗର୍ତ୍ତ ମାନଙ୍କରେ ପାଣି ଭରି ରହିଥିବାରୁ କେଉଁ ଗର୍ତ୍ତରେ କେତେ ପାଣି ରହୁଛି ଲୋକେ ଜାଣି ନ ପାରି ଖାଲରେ ପଡି ଖଣ୍ଡିଆ ଖାବରା ହେଉଥିବା ଦେଖିବାକୁ ମିଳୁଛି।ପୁଣି ଗାଡ଼ି ମଟର ଗୁଡ଼ିକ ହାତୀ ଝୁଲିଲା ପରି ଯିବା ଆସିବା କରୁଛି ।ପର୍ଯ୍ୟଟନ ସ୍ଥଳୀ ପାପକ୍ଷୟ ଠାରୁ ଚରଦା କପିଳେଶ୍ୱର ମନ୍ଦିରକୁ ସଂଯୋଗ କରୁଥିବା ଏହି ରାସ୍ତା ଏବେ ଶିବ ଭକ୍ତଙ୍କ ପାଇଁ ଜନଗହଳି ହୋଇପଡ଼ିଛି ।ସେହିପରି ଏହି ବିପଦ ଗାମୀ ରାସ୍ତାରେ ପ୍ରତିଦିନ ଛାତ୍ରଛାତ୍ରୀ ମାନେ ନିକଟ ଆଦର୍ଶ ବିଦ୍ୟାଳୟ ଏବଂ ବିନିକା ର ବିଭିନ୍ନ ସ୍କୁଲକୁ ପାଠ ପଡ଼ିବାକୁ ଯାଉଛନ୍ତି।ବିପଦ ଗାମୀ ରାସ୍ତାର ଦୂରବସ୍ଥା ସମ୍ପର୍କରେ ସମାଜସେବୀ ଅରୁଣ କୁମାର ପଣ୍ଡା ଗତ ୧୫ଦିନ ତଳେ ସ୍ଥାନୀୟ ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନ ପର୍ଯ୍ୟନ୍ତ ଲିଖିତ ଅଭିଯୋଗ କରିଥିଲେ ।କେବଳ ବିଭାଗ ପ୍ରତିଶ୍ରୁତି ଦେଇ ଦିନ ଗଡାଇଲା ।ଶେଷରେ ବାଧ୍ୟ ହୋଇ ଅରୁଣ ଆଜିଠାରୁ ସ୍ଥାନୀୟ ତହସିଲ କାର୍ଯ୍ୟାଳୟ ସମ୍ଭୂଖ ରେ ଆମରଣ ଅନଶନ ଆରମ୍ଭ କରିଛନ୍ତି।ଅଞ୍ଚଳର ସାମୁହିକ ସମସ୍ୟା ସମାଧାନ ନହେବା ପର୍ଯ୍ୟନ୍ତ ଅନଶନ ଜାରି ରହିବ ବୋଲି ପ୍ରକାଶ କରିଛନ୍ତି।ଏହି ଜନସମୁହ ସମସ୍ୟାର ତ୍ୱରିତ ସମାଧାନ ପାଇଁ ସୁବର୍ଣ୍ଣପୁର ଜିଲ୍ଲାପାଳ ୩ଲକ୍ଷ ଟଙ୍କା ମଞ୍ଜୁର କରି ବିନିକା ଏନଏସି କାର୍ଯ୍ୟନିର୍ବାହୀ ଅଧିକାରୀଙ୍କୁ କାର୍ଯ୍ୟ ସମ୍ପୁର୍ଣ୍ଣ ନେଇ ଦାୟିତ୍ଵ ପ୍ରଦାନ କରିଛନ୍ତି ।ଫଳରେ କାର୍ଯ୍ୟନିର୍ବାହୀ ଅଧିକାରୀ ସତ୍ୟ ନାରାୟଣ ପ୍ରଧାନ ଅନଶନସ୍ଥଳକୁ ଆସି ଅନଶନକାରୀ ଅରୁଣ ପଣ୍ଡାଙ୍କୁ ଫଳରସ ପିଆଇ ଅନଶନ ଭଙ୍ଗ କରିଥିଲେ ।