18-Dec-2023

ବଲାଙ୍ଗୀର(ପ୍ରେରଣା ଖବର)-ରାଜ୍ୟରେ କୃଷି ଓ କୃଷକର ବିକାଶ ପାଇଁ ରାଜ୍ୟସରକାର ଅନେକ ଯୋଜନା କରିଛନ୍ତି । କିନ୍ତୁ ବଲାଙ୍ଗୀର ଜିଲ୍ଲାରେ ଚାଷିମାନେ ଅବହେଳାର ଶୀକାର ହେଉଥିବା ଅଭିଯୋଗ ହେଉଛି । ମୁଖ୍ୟତଃ ସରକାରୀ ପ୍ରୋତ୍ସାହନ ଅଭାବ କାରଣରୁ ବଲାଙ୍ଗୀର ଜିଲ୍ଲାରେ ମକାଚାଷ ପରିମାଣ କମିଚାଲିଛି । ଏକ ପରିସଂଖ୍ୟାନରୁ ଜଣାଯାଇଛି ଯେ,ପ୍ରାୟ ୫ବର୍ଷ ପୂର୍ବରୁ ବଲାଙ୍ଗୀର ଜିଲ୍ଲାରେ ୭ହଜାର ହେକ୍ଟରରୁ ଅଧିକ ଜମିରେ ଖରିଫରେ ମକାଚାଷ ହେଉଥିଲା । କିନ୍ତୁ ଏବେ ଏହା ଖସି ଆସି ୩ହଜାର ହେକ୍ଟରରେ ପହଞ୍ଚିଛି । ଜିଲ୍ଲାରେ ଧାନ ଓ କପାପରେ ଡାଲିଜାତୀୟ ଚାଷ ଓ ମକାଚାଷ ପ୍ରତି ଲୋକଙ୍କ ଆଗ୍ରହ ରହିଛି । ପ୍ରାୟ ୬ବର୍ଷ ପୂର୍ବେ ଜିଲ୍ଲାରେ ବହୁତ ପରିମାଣରେ ମକାଚାଷ  ହୋଇଥିଲା । କିନ୍ତୁ ଏହାକୁ ବିକ୍ରୀ ସୁବିଧା ମିଳିଲା ନାହିଁ । ଚାଷି ମାନେ ହତାଶ ହୋଗଲେ । ଶାଗମାଛ ଦରରେ କେତେକ କୁକୁଡା ଫାର୍ମ ଏହି ମକାମଞ୍ଜିକୁ କୁକୁଡା ଖାଦ୍ୟ ପାଇଁ କିଣିଲେ । ଚାଷିମାନେ କ୍ଷତି ସହିଲେ । ସେହିପରି ସରକାରଙ୍କ ତରଫରୁ ଚାଷିଙ୍କୁ ଦିଆଯାଉଥିବା ମକାମଞ୍ଜି ଓ ସହାୟତା ରାଶି ବନ୍ଦ କରିଦିଆଯାଇଛି । ଉତ୍ପାଦିତ ମକାର ଅଭାବୀ ବିକ୍ରୀ ଓ ସରକାର ଦେଉଥିବା ମଞ୍ଜି ଓ ସହାୟତା ବନ୍ଦ ହୋଇଯିବା କାରଣରୁ ଜିଲ୍ଲାରେ ମକାଚାଷ କମିଚାଲିଛି । ବଲାଙ୍ଗୀର ଜିଲ୍ଲାର ଦେଓଗାଁ ବ୍ଲକରେ ସର୍ବାଧିକ ପରିମାଣରେ ମକାଚାଷ ହୋଇଥାଏ । ଉଭୟ ମିଠାମକା ଓ ସାଦାମକା ଉତ୍ପାଦନ ହୋଇଥାଏ । ଦେଓଗାଁ ବ୍ଲକର ଉପରଝର,ଉଡାର ପଞ୍ଚାୟରେ ବିପୁଳ ପରିମାଣରେ ମକାଚାଷ ହୋଇଥାଏ । ସରକାର ପ୍ରୋତ୍ସାହନ ଦେଉନଥିଲେ ହେଁ ଉପରଝର ପଞ୍ଚାୟତର କୁହିମୁଣ୍ଡା ଗାଁରେ ଶମ୍ଭୁଭୁଷଣ ସାହୁଙ୍କ ସମେତ ଗ୍ରାମବାସୀ ପ୍ରାୟ ୩ଏକର ଜମିରେ ମକାଚାଷ କରି ଲାଭାନ୍ୱିତ ହୋଇଛନ୍ତି । ପୂର୍ବରୁ କୃଷିବିଭାଗ ତଥା କୃଷିବିଜ୍ଞାନ କେନ୍ଦ୍ରତରଫରୁ ସରକାରୀ ଯୋଜନାରେ ମକାମଞ୍ଜି ଯୋଗାଇ ଦେବା ସହ ସାର,ଔଷଧ ଖର୍ଚ୍ଚ ମଧ୍ୟ ଯୋଗାଇଦେଉଥିଲେ । କିନ୍ତୁ ଗତ ପ୍ରାୟ ୪ବର୍ଷ ହେଲା ଆଉ ସରକାରୀ ପ୍ରୋତ୍ସାହନ ମିଳୁନାହିଁ  ତେଣୁ ଚାଷୀମାନେ ବିଶି ଆଗ୍ରହ ପ୍ରକାଶ କରୁନଥିବା କୁହିମୁଣ୍ଡାର ଚାଷି ଶମ୍ଭୁ ସାହୁ କହିଛନ୍ତି । ଏବେ ରବିଋତୁରେ ସ୍ୱିଟକର୍ଣ୍ଣର ଚାହିଦା ରହିବ । କୁହିମୁଣ୍ଡାରେ ଉଠାଜଳସେଚନ ପଏଣ୍ଟ ଜରିଆରେ ଚାଷ କରାଯାଇ ପାରିବ । ତେଣୁ କୃଷିବିଭାଗ ଚାଷିଙ୍କୁ ମକାଚାଷ ପାଇଁ ପ୍ରୋତ୍ସାହିତ କରିବାକୁ ଚାଷୀମାନେ ଦାବି କରିଛନ୍ତି ।