11-Dec-2023

ଲୋଇସିଂହା, (ପ୍ରେରଣା ଖବର) ବଲାଙ୍ଗୀର ଜିଲ୍ଲା ଲୋଇସିଂହା ବ୍ଲକ ଅନ୍ତର୍ଗତ ସରଗାଡ ଗ୍ରାମରେ ଜଣେ ବୃଦ୍ଧା ଅନ୍ୟ ଜାତିରେ ବିବାହ କରିଥିବାରୁ ବାସନ୍ଦ ଜୀବନ ବିତାଇ ଆସୁଥିଲେ l ହେଲେ ଗତ ସନ୍ଧ୍ୟାରେ ତାଙ୍କର ମୃତ୍ୟୁ ହେଲା l ପରିଣତ ବୟସରେ ମୃତ୍ୟୁ ହୋଇଥିଲେ ସୁଦ୍ଧା ତାଙ୍କ ଏକ ମାତ୍ର ପୁଅ କିମ୍ବା ଗ୍ରାମବାସି ପାଖ ମାଡ଼ି ନାହାନ୍ତି l ସେପଟେ ୧୨ ଘଣ୍ଟା ଶବ ଘରେ ଅସହାୟ ଅବସ୍ଥାରେ ପଡ଼ିରହିବା ପରେ ଆଜି  ବଲାଙ୍ଗୀର ସ୍ଵେଚ୍ଛାସେବୀ ସଂଗଠନ ତାଙ୍କ ଶବ ସତ୍କାର କରିଛି l ସୂଚନା ଅନୁସାରେ ସରଗାଡ ଗ୍ରାମର ମହିଳା ପ୍ରତିମା ବିଶ୍ଵାଳ ଗାଁ ର ଜଣେ ଅନ୍ୟଜାତି ର ଯୁବକଙ୍କୁ ପ୍ରେମ ବିବାହ କରିଥିଲେ l ଯାହାପରେ ତାଙ୍କୁ ବାସନ୍ଦ ଜୀବନ କାଟିବାକୁ ପଡିଥିଲା। ୨୦ ବର୍ଷ ପୂର୍ବେ ଏହି ମହିଳାଙ୍କ ସ୍ଵାମୀଙ୍କ ମୃତ୍ୟୁ ହୋଇଥିଲା l ତେବେ ତାଙ୍କର  ଏକମାତ୍ର ପୁଅ ମଧ୍ୟ ତାଙ୍କୁ ବୃଦ୍ଧା ଅବସ୍ଥାରେ ଛାଡି ଦେଇଥିଲେ l ତେବେ ବୃଦ୍ଧାଜଣକ ତାଙ୍କ ଜଣେ ସମ୍ପର୍କୀୟ ଚୈତନ୍ୟ ପ୍ରଧାନ ଙ୍କ ଘରେ ରହି ଆସୁଥିଲେ l ସେପଟେ ଏହି ମହିଳାଙ୍କର ବୃଦ୍ଧା ଅବସ୍ଥାରେ ଗତକାଲି ସନ୍ଧ୍ୟାରେ ମୃତ୍ୟୁ ହୋଇଥିଲା ତେବେ ମୃତ୍ୟୁପରେ ମଧ୍ୟ ତାଙ୍କ ପୁଅ କିମ୍ବା ଗ୍ରାମବାସି ତଥା ପାଖ ପଡୋଶୀ କେହି ସାହା ହୋଇ ନ ଥିଲେ l ସେପଟେ ବୃଦ୍ଧାଙ୍କ ଶବ ଦୀର୍ଘ ବାର ଘଣ୍ଟା ଅସହାୟ ଅବସ୍ଥାରେ ପଡ଼ି ରହିଥିଲା, ତେବେ ଏହାର ସୂଚନା ବଲାଙ୍ଗୀର ସ୍ୱେଛାସେବୀ ସଂଗଠନ ପାଇବା ପରେ ସଂଗଠନର ସଦସ୍ୟ ମାନେ ସମ୍ପୃକ୍ତ ଗାଁକୁ ଯାଇଥିଲେ ଏବଂ ଶବକୁ ଉଦ୍ଧାର କରି ହିନ୍ଦୁ ରୀତି ନୀତିରେ ସମ୍ମାନର ସହ ଚାରି କାନ୍ଧ ଦେଇଥିଲେ l ସେହିପରି ଶବକୁ  ସ୍ଥାନୀୟ ସ୍ମଶାନ ଘାଟକୁ ନେଇ ଶବ ସତ୍କାର କରିଛନ୍ତି l ଏହି ଅବସରରେ ସୁମିତ ମିଶ୍ର , ସନ୍ତୋଷ ପଟ୍ଟନାୟକ, ଲିଙ୍କନ ସେଠ୍, ରବୀନ୍ଦ୍ର ପଧାନ, ରାଜୀବ ପରମାନିକ୍, ଏମ. ଡି ବାବଳୁ, ଆଲୋକ ପଟେଲ,ପିଙ୍କୁ ପୁଟେଲ,ସୁବାସ ଯାଦବ,ଜିତୁ ସାହୁ,ତନ୍ମୟ ପଟେଲ ପ୍ରମୁଖ ବଲାଙ୍ଗୀର ସ୍ବେଚ୍ଛାସେବୀ ସଂଗଠନ ର ସଦସ୍ୟ ଉପସ୍ଥିତ ରହି ସହଯୋଗ କରିଥିଲେ l ଏବେ ପ୍ରଶ୍ନ ଉଠୁଛି ଭାରତ ସ୍ୱାଧୀନ ହେବାର ୭୫ ବର୍ଷ ବିତି ଯାଇଥିଲେ ସୁଦ୍ଧା ଆମ ବଲାଙ୍ଗୀର ଭଳି ପଛୁଆ ଜିଲ୍ଲାରେ ଏଭଳି ମାନସିକତା ଚିନ୍ତାର ବିଷୟ ବୋଲି ସେ କହିଛନ୍ତି l ତେବେ ଏହି ଅସହାୟ ଶବକୁ ସେମାନେ ସମ୍ମାନର ସହ ଶବ ସତ୍କାର କରିଥିବାର ସେ କହିଛନ୍ତି l ଆଜିର ଯୁଗରେ ପ୍ରେମ ବିବାହ ସାଧାରଣ ହୋଇଥିବା ବେଳେ କେବଳ ଜାତିପ୍ରଥାକୁ ନେଇ ନିଜ ଆତ୍ମୀୟଙ୍କ ପ୍ରତି ଏଭଳି ଅଭିଚାର କରିବାକୁ ସ୍ବେଚ୍ଛାସେବୀ ମାନେ ନିନ୍ଦା କରିଛନ୍ତି ଏବଂ ସେମାନେ ଏହି ଦିଗରେ ଲୋକଙ୍କୁ ସଚେତନ କରୁଥିବା ବେଳେ ପ୍ରଶାସନ ମଧ୍ୟ ଏଭଳି ସଚେତନତା କାର୍ଯ୍ୟକ୍ରମ ହାତକୁ ନେଇ ଲୋକଙ୍କୁ ଜାଗୃତ କରିବା ପାଇଁ ଅନେକ ସ୍ବେଛାସେବୀ ସଂଗଠନ ଦାବୀ ଜଣାଇଛନ୍ତି l