15-Dec-2020

ସମ୍ବଲପୁର,(ସଞ୍ଜିବ ପାଣିଗ୍ରାହୀଙ୍କ ରିପୋର୍ଟ): ବୁର୍ଲା ଚାନ୍ଦଲି ଡୁଙ୍ଗୁରିରୁ କାଠ ମାଫିଆ ମାନେ ପୁଣି ଥରେ ଗଛକାଟି ନେଇଯାଇ ଥିବାର ଦେଖିବାକୁ ମିଳିଛି । ସ୍ଥାନୀୟ ଜନସାଧାରଣଙ୍କ ନିରନ୍ତର ଚେଷ୍ଟା ଫଳରେ ଏକଦା ଭୂଲୁଣ୍ଠିତ ଚାନ୍ଦଲି ଡୁଙ୍ଗୁରି ଏବେ ସବୁଜିମାରେ ଭରି ଯାଇଛି । କିନ୍ତୁ ଜଂଗଲ ବିଭାଗର ଅପାରଗତା ଫଳରେ ଏହା ପୁଣି ଥରେ ଶ୍ରୀହୀନ ହେବାକୁ ଯାଉଛି । ଜଂଗଲ ବିଭାଗ ତରଫରୁ ଦିଆଯାଇଥିବା ପିଲାର ନଂ ୧୧୧ ସମ୍ମୁଖରୁ କେହି ଦୁର୍ବୃତ୍ତ ଅନେକ ଗୁଡିଏ ଦୁର୍ମୁଲ୍ୟ ତଥା ମୂଲ୍ୟବାନ ବିରାଟ ବିରାଟ ଗଛ ମେଶିନ ସହାୟତାରେ କାଟି ନେଇଥିବାର ଦେଖିବାକୁ ମିଳିଛି । ବନ ବିଭାଗର ନିଷ୍କ୍ରିୟତା ପାଇଁ ପୂର୍ବରୁ ମଧ୍ୟ ଏପରି ବହୁତ ଥର ଗଛ କାଟି ନିଆ ଯାଇଛି । ବର୍ତ୍ତମାନ ସାରା ଓଡ଼ିଶାରେ ବନ ବିଭାଗରେ ଘଟୁଥିବା କଳା କାରନାମା ହାଟରେ ପଡି ଦାଣ୍ଡରେ ଗଡୁଥିବା ବେଳେ ସମ୍ବଲପୁର ବନ ବିଭାଗର ଏପରି ନିଷ୍କ୍ରିୟତା ଯୋଗୁଁ କିଛି ଦୁର୍ନୀତିର ଗନ୍ଧ ବାରି ହେଉଛି । 
  ବନ ବିଭାଗ କର୍ମଚାରୀଙ୍କ ପରୋକ୍ଷ  ସହଯୋଗରେ ହିଁ ଦୁର୍ବୁତ୍ତ ମାନେ ସଂରକ୍ଷିତ ଜଂଗଲରୁ ଗଛ କାଟି ନେବାର ସାହାସ କରୁଛନ୍ତି ବୋଲି ସ୍ଥାନୀୟ ପରିବେଶ କର୍ମୀ ପ୍ରଭାସ ପୃଷେଠ ଅଭିଯୋଗ କରିଛନ୍ତି । ତେଣୁ ଏଥିରେ ସଂପୃକ୍ତ ବନ କର୍ମଚାରୀଙ୍କୁ ତୁରନ୍ତ ଚାକିରୀରୁ ବହିଷ୍କାର କରି ସେମାନଙ୍କ ବିରୋଧରେ ଫୌଜଦାରୀ ମୋକଦ୍ଦମା ରୁଜୁ କରିବାକୁ ଶ୍ରୀ ପୃଷେଠ୍ ଦାବୀ କରିଛନ୍ତି l