08-Oct-2023

ବଲାଙ୍ଗୀର,(ପ୍ରେରଣା ଖବର)-ପଶ୍ଚିମଓଡିଶାରେ ବସବାସ କରୁଥିବା ମୁଖ୍ୟତଃ ଚାଷିମାନଙ୍କ ମଧ୍ୟରେ ୮୪ଘର ଅଘରିଆ ସମାଜ ଅନ୍ୟତମ । ଏହି ଅଞ୍ଚଳରେ ଅଞ୍ଚଳରେ ଅଘରିଆଙ୍କ ପ୍ରଧାନ୍ୟ ବଢିଛି । କିନ୍ତୁ ଅଘରିଆ ସମାଜର ଇତିହାସ ଉପରେ ଯଥେଷ୍ଟ ଗବେଷଣା ହୋଇନାହିଁ । ୧୫୪୦ ମସିହା ସମୟରେ ଉତ୍ତରପ୍ରଦେଶର ଆଗ୍ରା ଅଞ୍ଚଳରୁ ଆସି ଏହି ମଧ୍ୟପ୍ରଦେଶ,ଛତିଶଗଡ,ଓଡିଶା,ଝାରଖଣ୍ଡ ଅଞ୍ଚଳରେ ବସବାସ କରିଥିବା ଅଘରିଆଙ୍କର ଏକ ସ୍ମରଣୀୟ ଇତିହାସ ହୋଇପାରିବ । ତେଣୁ ଅଘରିଆ ଜାତିର ଗବେଷକମାନେ ଏଦିଗରେ ଅଧିକ ଗବେଷଣା କରିବାକୁ ଆଜି ବଲାଙ୍ଗୀର କୋସଲକଳାମଣ୍ଡଳ ପଡିଆଠାରେ ଅଘରିଆ ସମାଜ ପକ୍ଷରୁ ଆୟୋଜିତ ନୂଆଖାଇ ଭେଟଘାଟ କାର୍ଯ୍ୟକ୍ରମରେ ଆହ୍ୱାନ ଦିଆଯାଇଛି । ଏହା ସହିତ ପୁଅ ଓ ଝିଅ ମଧ୍ୟ ପ୍ରଭେଦ ନରଖି ପୁଅଙ୍କ ସଂଖ୍ୟା ସାଙ୍ଗରେ ତାଳଦେଇ ଝିଅମାନଙ୍କୁ ଶିକ୍ଷା,ସ୍ୱାସ୍ଥ୍ୟ ଦିଗରେ ଆଗେଇନେବାକୁ ମଧ୍ୟ ଆହ୍ୱାନ ଦିଆଯାଇଛି । ଜିଲ୍ଲା ଅଘରିଆ ସମାଜର ସଭାପତି ସୁଭ୍ରାଂଶୁ ପଟେଲଙ୍କ ସଭାପତିତ୍ୱ ଓ ସଂପାଦକ ଦିଗାମ୍ବର ନାଏକଙ୍କ ସଂଯୋଜନାରେ ଅନୁଷ୍ଠିତ ସଭାରେ ମୁଖ୍ୟଅତିଥି ଭାବରେ ବଲାଙ୍ଗୀର ଅତିରିକ୍ତ ଆରକ୍ଷୀଅଧିକ୍ଷକ ସୁରେଶ ନାଏକ,ସମ୍ମାନୀତ ଅତିଥି ଭାବରେ ଅଘରିଆ ସମାଜର ରାଜ୍ୟସଭାପତି ଦୀନବନ୍ଧୁ ନାଏକ,ମୁଖ୍ୟବକ୍ତା ଭାବରେ ତୁଷୁରା ତହସିଲଦାର ରବିନ୍ଦ୍ରକୁମାର ପଟେଲ ଓ ଅଘରିଆ ସମାଜର ଉପସଭାପତି ଲିଲି ପଟେଲ ମଞ୍ଚାସୀନ ରହିଥିଲେ । ମୁଖ୍ୟ ଅତିଥି ତାଙ୍କ

ବକ୍ତବ୍ୟରେ ଅଘରିଆ ସମାଜର ଏକତା ବଜାୟ ରଖିବାକୁ ଉଦବୋଧନ ଦେଇଥିଲେ । ବଲାଙ୍ଗୀର ଜିଲ୍ଲାରେ ଅଘରିଆ ସମାଜର ଏକତାରୁ ବିଭିନ୍ନ କାର୍ଯ୍ୟକ୍ରମ ସଫଳ ହୋଇପାରୁଛି ବୋଲି କହିଥିଲେ । ମୁଖ୍ୟବକ୍ତା ରବିନ୍ଦ୍ର ପଟେଲ ତାଙ୍କ ବକ୍ତବ୍ୟରେ ୧୫୪୦ ମସିହା ପରଠାରୁ ଏହି ଅଞ୍ଚଳରେ ଅଘରିଆମାନେ ବସବାସ କରିଆସୁଛନ୍ତି । କିନ୍ତୁ ପ୍ରଶାସନିକ ସେବାରେ ଅଘରୀଆଙ୍କ ସଂଖ୍ୟା କମ ରହିଛି । କେବଳ ପୋଲିସ ବିଭାଗରେ ମୋଟ ଉପରେ ୨ରୁ ୫% ପର୍ଯ୍ୟନ୍ତ ଲୋକ ରହିଛନ୍ତି ଯାହାକି ଗର୍ବର କଥା ବୋଲି କହି ଅଘରିଆ ସମାଜର ଇତିହସ ଉପରେ ଗବେଷଣା ଆବଶ୍ୟକ ବୋଲି କହିଥିଲେ । ଠିକ ସେହିପରି ଜିଲ୍ଲା ସଭାପତି ତାଙ୍କ ବକ୍ତବ୍ୟରେ ଜିଲ୍ଲାରେ ଅଘରିଆ ସମାଜ ପକ୍ଷରୁ ବିଗତ ଦିନରେ କରାଯାଇଥିବା କାର୍ଯ୍ୟକ୍ରମ ଉପରେ ବର୍ଣ୍ଣନା କରିଥିଲେ । ଏହା ସହିତ ସମାଜରେ ପୁଅମାନଙ୍କ ସଂଖ୍ୟା ତୁଳନାରେ ଝୀଅଙ୍କ ସଂଖ୍ୟା କମିଚାଲିଛି ଯାହାକି ଉଦବେଗର ବିଷୟ ବୋଲି କହିଥିଲେ । ସମାଜରେ ପୁଅ ଓ ଝିଅଙ୍କ ମଧ୍ୟରେ କୌଣସି ପ୍ରଭେଦ ନାହିଁ । ତେଣୁ ଝିଅମାନଙ୍କ ଶିକ୍ଷା,ସ୍ୱାସ୍ଥ୍ୟ କ୍ଷେତ୍ରରେ ପ୍ରାଧାନ୍ୟ ଦିଆଯାଉ ବୋଲି ଆହ୍ୱାନ ଦେଇଥିଲେ । ସଭାପରେ ଅଘରୀଆ ସମାଜ ଶିଶୁ କଳାକାରମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ପ୍ରାୟ ୧୦ ହଜାର ଅଘରୀଆ ଲୋକଙ୍କ ସମାଗମରେ ନୂଆଖାଇ ଭେଟଘାଟର ସାଂସ୍କୃତିକ କାର୍ଯ୍ୟକ୍ରମରେ କୋସଳକଳାମଣ୍ଡଳ ପଡିଆ ଦୁଲୁକିଥିଲା । ଏହି କାର୍ଯ୍ୟକ୍ରମରେ ଜିଲ୍ଲାର ସମସ୍ତ ପ୍ରାନ୍ତରୁ ଅଘରିଆ ସମାଜର ପୁରୁଷ/ମହିଳା ଯୋଗଦେଇଥିଲେ ।