06-Jul-2023

ଲୋଇସିଂହା(ବିନୋଦ ଦୀପ)- ବାଲି ବୋଝେଇ ଟ୍ରାକ୍ଟରକୁ ଅଟକାଇବାକୁ ଯାଇ ଆକ୍ରମଣର ଶୀକାର ହେଲେ ବାବୁ ଫାସଡ ଆରଆଇ, ଏପରି କିଛି ଅଭାବନୀୟ ଘଟଣା ଘଟିଛି ବଲାଙ୍ଗୀର ଜିଲ୍ଲା ଲୋଇସିଂହା ତହସିଲ ମୁରଷୁଣ୍ଢି ନିକଟରେ । । ସୂଚନାରୁ ପ୍ରକାଶ ଯେ ଆଜି ପୂର୍ବାହ୍ନରେ ବାବୁ ଫାସଡ ଆର୍ ଆଇ ସର୍କଲରେ କାର୍ଯ୍ୟରତ ଆର୍‌ଆଇ ସୁଶାନ୍ତ ପଟେଲ ଓ ଏଆର୍‌ଆଇ ପ୍ର୍‌ମୋଦ କୁମାର ମେହର କୌଣସି ବିଶ୍ୱସ୍ତ ସୂତ୍ରରୁ ଖବର ପାଇ ଏକ ବେଆଇନ ବାଲି ଚୋରାଚାଲାଣ  ହେଉଥିବା ଟ୍ରାକ୍ଟର(ଓଡି୦୩ଏନ୍‌-୪୪୨୩)କୁ ଅଟକାଇବାକୁ ଯାଇଥିଲେ । ତିନୋଟି ଟ୍ରାକ୍ଟର ମଧ୍ୟରୁ ଗୋଟିଏ ବାଲି ଚାଲାଣ ହେଉଥିବା ବେଳେ ଆଉ ଦୁଇଟି ଟ୍ରାକ୍ଟରରେ ପଥର ଚାଲାଣ ହେଉଥିଲା । ପୋଲିସ ସହାୟତାରେ ଆର୍‌ଆଇ ଓ  ଏଆର୍ ଆଇ ବେଆଇନ ବାଲି ବୋଝେଇ ଟ୍ରାକ୍ଟରକୁ  ଜବତ କରି ସାଲେଭଟା ଫାଣ୍ଡିକୁ ଅଣାଯାଉଥିଲା । ତେବେ ମୁରୁଷୁଣ୍ଢ ଗାଁ ନିକଟରେ ବାଲି ବୋଝେଇ ଟ୍ରାକ୍ଟରର ଡ୍ରାଇଭର  ସନ୍ତୋଷ ପଧାନ ଗାଡି ଧରି ଫେରାର୍ ମାରିବା ପାଇଁ ଚେଷ୍ଟା କରୁଥିବା ବେଳେ ଆର୍ ଆଇ ଶ୍ରୀ ପଟେଲ ଟ୍ରାକ୍ଟରକୁ ଅଟକାଇଥିଲେ । ଏହି ସମୟରେ ଉତ୍ୟକ୍ତ ଟ୍ରାକ୍ଟର ଡ୍ରାଇଭର  ଆର୍ ଆଇ ଓ ଏଆର୍‌ଆଇକୁ ଗାଡି ଚପେଇ ଦେବା ପାଇଁ ଉଦ୍ୟମ କରିଥିଲା । ତେବେ କୌଣସି ମେତେ ଏହି ଦୁଇ ଜଣ କର୍ମଚାରୀଙ୍କ ଜୀବନ ବଂଚି ଯାଇଥିଲା । ଅନ୍ୟପକ୍ଷରେ ଟ୍ରାକ୍ଟର ଫେରାର୍ ହେବାର ଦୃଶ୍ୟ ନିଜ ମୋବଇଲରେ ଉଠାଉଥିବା ସମୟରେ ଟ୍ରାକ୍ଟର ଡ୍ରାଇଭର ସନ୍ତୋଷ ପଧାନ ଫେରି ଆସି ଆର୍ ଆଇ ଶ୍ରୀ ପଟେଲଙ୍କ ହାତକୁ କାମୁଡି ଦେବା ସହ ମୋବାଇଲ ଛଡାଇ ନେଇ ମୋବାଇଲକୁ ନିଆଁରେ ପୋଡି ଦେଇଥିଲା । ଏ ନେଇ ଆର୍ ଆଇ ଲୋଇସିଂହା ଥାନାରେ ଡ୍ରାଇଭରଙ୍କ ବିରୁଦ୍ଧରେ ଲିଖିତ ଅଭିଯୋ୍‌ଗ କରିଛନ୍ତି ।  ସୂଚନାଯୋଗ୍ୟ ଯେ ଲୋଇସିଂହା ତହସିଲ ଅଧୀନରେ ବାଲି ଓ ପଥର ମାଫିଆଙ୍କ ଅବାଧ ଚୋରା କାରବାର ଚାଲିଛି । ତେବେ ଆଜି ଏପରିି ଜଣେ ବାଲି ମାଫିଆକୁ ଧରିବାକୁ ଯାଇ ତହସିଲର କର୍ମଚାରୀ ଏମାନଙ୍କର ଆକ୍ରୋଶର ଶୀକାର ହୋଇଛନ୍ତି ।