18-Jun-2023

ବଲାଙ୍ଗିର(ପ୍ରେରଣା ଖବର) ରାଜ୍ୟରେ ଇଂରାଜୀ ମିଡିୟମ ଜରିଆରେ ଗ୍ରାମାଞ୍ଚଳର ଛାତ୍ରଛାତ୍ରୀଙ୍କୁ ଉନ୍ନତ ପାଠପଢାଇବା ଉଦ୍ଦେଶ୍ୟ ରଖି ରାଜ୍ୟସରକାର ପ୍ରତ୍ୟେକ ବ୍ଲକରେ ଆଦର୍ଶସ୍କୁଲ ଆରମ୍ଭ କରିଥିଲେ । ଗତ ୨୦୧୬ ଅପ୍ରେଲରେ ସରକାର ଏହାର ଆରମ୍ଭ କରିଥିଲେ । ଏବେ ୭ବର୍ଷର ଉଦ୍ୟମରେ ଛାତ୍ରଛାତ୍ରୀ ଖୁବ ଉନ୍ନତ ପ୍ରଦର୍ଶନ କରୁଥିବା ଲକ୍ଷ୍ୟ କରାଯାଇଛି । ଚଳିତଥର ସର୍ବଭାରତୀୟ ନିଟ୍ ପରୀକ୍ଷାରେ ଓଡିଶା ଆଦର୍ଶ ବିଦ୍ୟାଳୟରୁ ୨୧ଜଣ ଛାତ୍ରଛାତ୍ରୀ କୃତକାର୍ଯ୍ୟ ହୋଇଛନ୍ତି । ଆଉ ସବୁଠୁ ଖୁସିଖବର ହେଲା ରାଜ୍ୟର ଏହି ୨୧ଜଣଙ୍କ ମଧ୍ୟରୁ ବଲାଙ୍ଗୀର ଜିଲ୍ଲାର ୩ଟି ଆଦର୍ଶ ବିଦ୍ୟାଳୟରୁ ୪ଜଣ ନିଟ୍ ପରୀକ୍ଷାରେ ସଫଳତା ପାଇଛନ୍ତି । ସଇଁତଳା ବ୍ଲକ

ବିବିନା ଓଏଭିର ଛାତ୍ର ଅଜୟ ମେହେର ମୋଟ ୭୨୦ ମାର୍କରୁ ୬୬୨ ନମ୍ବର ରଖି ଓଏଭିଏସରେ ସର୍ବଶ୍ରେଷ୍ଠ ସ୍ଥାନରେ ରହିଛନ୍ତି । ସେହିପରି ବଲାଙ୍ଗୀର ପଥରଚେପା ଆଦର୍ଶବିଦ୍ୟାଳୟର ୨ଜଣ  ଅନୁଭବ ମିଶ୍ର ୬୪୮ ଏବଂ ନିଶାରାଣୀ ସା ୫୮୬ ମାର୍କ ରଖି କୃତକାର୍ଯ୍ୟ ହୋଇଛନ୍ତି । ଠିକ ସେହିପରି ଭାଲୁମୁଣ୍ଡା ଆଦର୍ଶବିଦ୍ୟାଳୟର ଜ୍ଞାନବନ୍ତ ସାହୁ ୬୪୫ ନମ୍ବର ରଖି କୃତକାର୍ଯ୍ୟ ହୋଇଛନ୍ତି । ଆଦର୍ଶବିଦ୍ୟାଳୟର ଏହି ସଫଳତାରେ ବଲାଙ୍ଗୀର ଜିଲ୍ଲାରେ ଖୁସିର ମାହୋଲ ସୃଷ୍ଟି ହୋଇଛି । ପ୍ରକାଶ୍ୟ ଯେ,ସର୍ବଭାରତୀୟ ଜେଇଇ ପରୀକ୍ଷାରେ ଚଳିତବର୍ଷ ଓଡିଶା ଆଦର୍ଶ ବିଦ୍ୟାଳୟ ର ଛାତ୍ରଛାତ୍ରୀ ମାନେ ମଧ୍ୟ କମାଲ କରିଛନ୍ତି । ଜେଇଇ ମେନ୍ ପରୀକ୍ଷାରେ ରୋହନରାଜ ଭୋଇ(୯୮.୬୪), ଅନୁଭବ ମିଶ୍ର(୯୫.୮୫), ଶୁଭଙ୍କର ମିଶ୍ର(୮୮.୨୧ ଇଡବ୍ଲୁଏସ),ସମରେନ୍ଦ୍ର ସାହୁ(୭୬.୨୪ ଓବିସ ଏନସିଏଲ)ଓ ମିଲନ ମେହେର(୫୩.୪୭ ଏସଟି) ପାଇ ଜେଇଇ ଆଡଭାନ୍ସ ପାଇଁ ଯୋଗ୍ୟତା ଅର୍ଜନ କରିଥିଲେ । ଏମାନଙ୍କ ବ୍ୟତିତ ଅନିରୁଦ୍ଧ ଯୋଷୀ(୮୯.୫୯),ସ୍ମୃତିଶରଣ ତ୍ରୀପାଠୀ(୮୮.୩୮), ସ୍ୱସ୍ତିକଚିନ୍ତନ ତ୍ରୀପାଠୀ(୮୦.୮୨),ପ୍ରତିକ୍ଷା ତ୍ରୀପାଠୀ(୮୫.୭୦),ଆୟସା ନନ୍ଦ(୭୪.୬୫) ଜେଇଇ ମେନ ପରୀକ୍ଷାରେ ସଫଳତା ପାଇଛନ୍ତି ।