01-Apr-2023

ସମ୍ବଲପୁର, (ସଂଜୀବ ପାଣିଗ୍ରାହୀ)
 ଓଡିଶାର ପୂର୍ବତନ ମୁଖ୍ୟମନ୍ତ୍ରୀ ରାଜେନ୍ଦ୍ର ନାରାୟଣ ସିଂଦେଓଙ୍କ ୧୧୨ତମ ଜନ୍ମ ଜୟନ୍ତୀ ଓଡିଶା ସାଂସ୍କୃତିକ ସମାଜ ପକ୍ଷରୁ ପାଳିତ ହୋଇଯାଇଛି। ସାଂସ୍କୃତିକ ସମାଜର ଉପସଭାପତି ଶିବନାରାୟଣ ପାଣିଗ୍ରାହୀଙ୍କ ଅଧ୍ୟକ୍ଷତାରେ ଆୟୋଜିତ ଏହି ସଭାରେ ମୁଖ୍ୟବକ୍ତା ଭାବରେ ଯୋଗଦେଇ ଡ. ଗୌରିଦାସ ପ୍ରଧାନ ତାଙ୍କ ବକ୍ତବ୍ୟରେ କହିଥିଲେ ଯେ, ରାଜେନ୍ଦ୍ର ନାରାୟଣ ସିଂଦେଓ ଜଣେ ଦୂରଦୃଷ୍ଟି ସମ୍ପନ୍ନ ବ୍ୟକ୍ତିଥିଲେ। ସେ ସାମାଜିକ ପରିବର୍ଦ୍ଧନକୁ ଆକଳନ କରି ଭବିଷ୍ଯତ ପାଇଁ ସଠିକ କାର୍ଯ୍ୟପନ୍ଥା ନିର୍ଧାରଣ କରିପାରୁଥିଲେ। ପରୋକ୍ଷରେ ତାଙ୍କ ଯୋଗୁଁ ହିଁ ଜୱାହାରଲାଲ ନେହେରୁଙ୍କ ବଲାଙ୍ଗିର ଆଗମନ ହୋଇଥିଲା ବୋଲି ଦର୍ଶାଇ ସେ କହିଥିଲେ ଯେ,ଓଡିଶାରେ ସେ ସମୟରେ ଏକ ମାତ୍ର  ରାଜନୈତିକ ଦଳ ପଶ୍ଚିମ ଓଡିଶାରେ ଜନ୍ମ ନେବା ସହ ଏହାର ଚାବିକାଠି ମଧ୍ଯ ପଶ୍ଚିମ ଓଡିଶାରେ ରହିପାରିଥିଲା। ଅନ୍ୟତମ ଆଲୋଚକ ଐତିହାସିକ ଦୀପକ କୁମାର ପଣ୍ଡା ରାଜେନ୍ଦ୍ର ନାରାୟଣଙ୍କ ପୋଷ୍ୟପୁତ୍ର ଭାବରେ ବଲାଙ୍ଗିର ଆଗମନ ଏବଂ ତାଙ୍କ ସକାଶେ ହୋଇଥିବା ଉତ୍ସବ କିପରି ସମ୍ବଲପୁରର ସୋନପୁର ବଙ୍ଗଳାରେ ପାଳିତ ହୋଇଥିଲା ସେ ବିଷୟରେ ପ୍ରାଞ୍ଜଳ ଭାବରେ ଆଲୋଚନା କରିବା ସହ ସେ କିପରି ଅତି ସରଳ ବ୍ୟବହାର ଦ୍ୱାରା ଅନ୍ୟ ନେତାମାନଙ୍କୁ ପ୍ରଭାବିତ କରି କାର୍ଯ୍ଯ ହାସଲ ପାରୁଥିଲେ ତାହା ବ୍ୟକ୍ତ କରିଥିଲେ। ବରିଷ୍ଠ ସଦସ୍ୟ ଅରବିନ୍ଦ ମହାପାତ୍ର ଏବଂ ସୁରଂଜନ ମହାପାତ୍ର ପ୍ରମୁଖ ମଧ୍ୟ ଆଲୋଚନାରେ ଭାଗ ନେଇଥିଲେ। ସମ୍ପାଦକ ଡ. ସିଦ୍ଧାର୍ଥ ପଣ୍ଡା ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ ସହସମ୍ପାଦକ ସୁରେଖା ସାହୁ ଧନ୍ୟବାଦ ଅର୍ପଣ କରିଥିଲେ।