12-Feb-2023

ବଲାଙ୍ଗିର-ବଲାଙ୍ଗୀର ରାଜେନ୍ଦ୍ରବିଶ୍ୱବିଦ୍ୟାଳୟର ଋଷ୍ୟଶୃଙ୍ଗ ଓ ଗନ୍ଧମାର୍ଦ୍ଦନ ଛାତ୍ରାବାସର ଦୁଇଜଣ ଛାତ୍ରଙ୍କୁ ଦୁଇଦିନ ତଳେ ଜଣେ ନିଶାଖୋର ଯୁବକ ଛୁରି ଓ ବ୍ଲେଡରେ ଆକ୍ରମଣ କରିଥିଲା । ସେହି ଘଟଣାରେ ବଲାଙ୍ଗୀରବାସୀ ତ୍ରୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ଏହି ଘଟଣାକୁ ଗୁରୁତର ସହିତ ସହିତ ରାଜେନ୍ଦ୍ର କଲେଜର ପୁରାତନ ଛାତ୍ରସଂସଦ ଗଭୀର ଉଦବେଗ ପ୍ରକାଶ କରିବା ସହିତ ଆଜି ଏକ ପ୍ରତିନିଧି ଦଳ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଉମାବଲ୍ଲଭ ମହାପାତ୍ରଙ୍କୁ ଭେଟି ସମସ୍ୟା ବିଷୟରେ ଆଲୋଚନା କରିଥିଲେ । ଠିକ ସେହିପରି ସଂଧ୍ୟାରେ ଋଷ୍ୟଶୃଙ୍ଗ ଓ ଗନ୍ଧମାର୍ଦ୍ଦନ ବାଳକ ଛାତ୍ରାବାସକୁ ଯାଇ ଅନ୍ତେବାସୀଙ୍କ ସହିତ ଆଲୋଚନା କରିଥିଲେ । ଆଲୋଚନା କାଳରେ ଅନ୍ତେବାସୀଙ୍କ ସହିତ ବଲାଙ୍ଗୀରବାସୀ ଅଛନ୍ତି । ସହରର ବହୁ ସଂଗଠନ ଏହି ଘଟଣାକୁ ନେଇ ଉଦବେଗ ପ୍ରକାଶ କରିଛନ୍ତି । ତେଣୁ ଛାତ୍ରମାନେ ଭୟ କରିବାର ନାହିଁ । ଛାତ୍ରମାନେ ଭୟ ତଥା ମାନସିକ ଚାପରେ ନରହି ନିଜର ସମସ୍ୟା ଗୁଡିକୁ ନିଜ ସାଙ୍ଗଙ୍କ ମଧ୍ୟରେ ବାଣ୍ଟିବାକୁ ମଧ୍ୟ ପରାମର୍ଶ ଦେଇ ସମସ୍ୟାଗୁଡିକୁ ମିଳିତ ପ୍ରୟାସକରି ସମାଧାନ କରାଯିବ ବୋଲି ପ୍ରତିଶୃତି ଦେଇଥିଲେ । ପୁରାତନ ଛାତ୍ରସଂସଦର ସଭାପତି ପ୍ରଭାସ ପାଣିଗ୍ରାହୀ, ସଂପାଦକ ଭବାନୀଶଙ୍କର ଶତପଥି, ରାଜେନ୍ଦ୍ର କଲେଜର ପୂର୍ବତନ ସଭାପତି ରତନ ମହାରଣା, ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା, ଛାତ୍ରନେତା ସୁମନ ନନ୍ଦ ପହଞ୍ଚି ଛାତ୍ରାବାସର ଅନ୍ତେବାସୀଙ୍କ ସହିତ ଆଲୋଚନା କରିଥିଲେ । ଆସନ୍ତା ମଙ୍ଗଳବାର ଦିନ ଏହି ପ୍ରତିନିଧିଦଳ ଜିଲ୍ଲାପାଳ ଓ ଏସପିଙ୍କୁ ମଧ୍ୟ ଭେଟି ବିଶ୍ୱବିଦ୍ୟାଳୟରେ ଶାନ୍ତିଶୃଙ୍ଖଳା ବଜାୟ ରଖିବାକୁ ପ୍ରଶାସନ ପଦକ୍ଷେପ ନେବାକୁ ଦାବି ଜଣାଇବେ ବୋଲି କହିଛନ୍ତି । ଏହା ପୂର୍ବରୁ ବଲାଙ୍ଗୀର ବିଧାୟକ ନରସିଂହ ମିଶ୍ର ଏନେଇ ପୋଲିସ ବିଭାଗ ଉପରେ ବର୍ଷିଥିବା ବେଳେ ଆଜି ରାଜେନ୍ଦ୍ର କଲେଜର ଏହି ସମସ୍ୟାକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ରାଜ୍ୟସରକାରଙ୍କୁ ଟାର୍ଗେଟ କରିଛନ୍ତି । ରାଜ୍ୟରେ ଆଇନଶୃଙ୍ଖଳା ବିଗିଡି ସାରିଥିବା ଶ୍ରୀ ପ୍ରଧାନ ଅଭିଯୋଗ କରିଛନ୍ତି ।