27-Dec-2022

ବଲାଙ୍ଗିର(ପ୍ରେରଣା ଖବର)- ଅଗ୍ରଣୀ ସାମାଜିକ ଅନୁଷ୍ଠାନ ଭୂମିକା ପକ୍ଷରୁ ଆସନ୍ତା  ୨ଠ୨୩ ଜାନୁୟାରୀ ୮ ତାରିଖରୁ ୧୨ ତାରିଖ ପର୍ଯ୍ୟନ୍ତ ପାଂଚ ଦିନ ବ୍ୟାପୀ ସର୍ବଭାରତୀୟ ନାଟ୍ୟ ମହୋତ୍ସବ ଅନୁଷ୍ଠିତ ହେବାକୁ ଯାଉଛି । ପ୍ରତ୍ୟେକ ଦିନ ଦେଶର ବିଭିନ୍ନ ପ୍ରାନ୍ତରୁ ଆସିଥିବା ବିଭିନ୍ନ ନାଟ୍ୟାନୁଷ୍ଠାନ ପକ୍ଷରୁ ନାଟକ ପରିବେଷିତ ହେବ । ନାଟକର ପୂର୍ବ ଗୌରବକୁ ଫେରାଇ ଆଣିବା ପାଇଁ ଗ୍ରାମାଂଚଳ ସ୍ତରରେ ଏହାର ବ୍ୟାପକ ପ୍ରଚାର ପ୍ରସାର କରାଯିବ ଓ ଏହି ସମସ୍ତ କାର୍ଯ୍ୟକ୍ରମର ସଫଳତା ପାଇଁ ସମସ୍ତଙ୍କ ସହଯୋଗ ଆବଶ୍ୟକ ବୋଲି ଆଜି ସ୍ଥାନୀୟ ଆଇନ ମହାବିଦ୍ୟାଳୟ ଠାରେ ଭୂମିକା ପକ୍ଷରୁ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀ ଏହି ସୂଚନା ଦିଆଯାଇଛି । ଭୂମିକା ଅନୁଷ୍ଠାନର ସଭାପତି  ବ୍ୟାସଦେବ ନନ୍ଦଙ୍କ ପରିଚାଳନାରେ ଆୟୋଜିତ ଏହି ସାମ୍ବାଦିକ ସମ୍ମିଳନୀର ଭୂମିକାର ୁପସଭାପତି ଚିତ୍ତରଂଜନ ଦାଶ ଯୋଗ ଦେଇ ପାଞ୍ଚ ଦିନ ବ୍ୟାପି ଅନୁଷ୍ଠିତ ହେବାକୁ ଥିବା ସର୍ବଭାରତୀୟ ନାଟ୍ୟମହୋତ୍ସବର ପରିଚାଳନା ଓ ପରିବେଷିତ ହେବାକୁ ଥିବା ବିଭିନ୍ନ ଭାଷାର ନାଟକ ସଂପର୍କରେ ସୂଚନା ଦେଇଥିଲେ । ପ୍ରଥମ ସଂଧ୍ୟାରେ ହିନ୍ଦି ନାଟକ କୋର୍ଟ ମାର୍ସଲ, ଦ୍ୱିତୀୟ ଦିନ ବେଙ୍ଗୋଲି ନାଟକ ଟିଟାସ ଏକ୍ ଟା ନଦୀର ନାମ୍ , ତୃତୀୟ ସଂଧ୍ୟାରେ ଓଡ଼ିଆ  ନାଟକ ଫୁଲ୍ ଟେନ୍‌ସନ , ଚତୁର୍ଥ ସଂଧ୍ୟାରେ କୋସଲୀ ନାଟକ କିଂଚିତ ଭୋଗମ ଓ ଉଦ୍‌ଯାପନୀସଂଧ୍ୟାରେ ଛତିଶଗଡି ନାଟକ ସାକୁବାଇ ପ୍ରଦର୍ଶିତ ହେବ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି । ପ୍ରତ୍ୟେକ ଦିନ ନାଟକ ସରିବା ପରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଓ ଏଠାକାର ଲୁକ୍କାୟିତ ପ୍ରତିଭା ଓ କଳାକାର ମାନଙ୍କୁ ସମ୍ବର୍ଦ୍ଧିତ କରିବାର କାର୍ଯ୍ୟକ୍ରମ ରହିଛି । ଏଥିସହ ପ୍ରତ୍ୟେକ ଦିନର ମଂଚକୁ ଜଣେ ଜଣେ ଦିବଂଗତ କଳାକାରଙ୍କ ନାମରେ ଉତ୍ସର୍ଗୀକୃତ କରାଯିବ ବୋଲି ସୂଚନା ଦିଆଯାଇଛି । ଏହି ସାମ୍ବାଦିକ ସମ୍ମିଳନୀରେ ମଠଖାଇ ମହୋତ୍ସବର ଅଧ୍ୟକ୍ଷ ବଲାଙ୍ଗୀର ବିଧାୟକ ନରସିଂହ ମିଶ୍ର, ଭୂମିକାର ମୁଖ୍ୟ ପରାମର୍ଶଦାତା ପ୍ରଫେସର ମଧୁସୂଦନ ପତି ଓ ନାଟ୍ୟଭୂଷଣ ଜଗଦାନନ୍ଦ ଛୁରିଆ ମଂଚାସୀନ ରହି ନାଟ୍ୟ ମହୋତ୍ସବକୁ କିପରି ସଫଳ କରାଯାଇପାରିବ ଓ ଗ୍ରାମାଞ୍ଚଚଳରୁ କିପରି ଅଧିକରୁ ଅଧିକ ସଂଖ୍ୟକ ନାଟ୍ୟପ୍ରେମୀ ଏଥିରେ ଜୋଡି ହୋଇ ପାରିବେ ସେ ନେଇ ଆୟୋଜକ କମିଟିକୁ ବିଭିନ୍ନ ପ୍ରସ୍ତାବ ଦେଇଥିଲେ ।