30-Apr-2022

ବିନିକା(ହିମାଂଶୁ ଶେଖର ପୁଟେଲ) ସୁବର୍ଣ୍ଣପୁର ଜିଲ୍ଲା ବିନିକା ବ୍ଳକ ଚରଦା ପଞ୍ଚାୟତ ଫୁଲମୁଠି ଗ୍ରାମ୍ୟ ରାସ୍ତା ଅତ୍ୟନ୍ତ ଶୋଚନୀୟ ହୋଇଥିଲା ଲୋକଙ୍କ ଯିବା ଆସିବା ମସ୍କିଲ ହୋଇପଡ଼ିଥିଲା ।ତେବେ ସେ ଯାହାବି ହେଉ ନିର୍ବାଚନ ପୂର୍ବରୁ ଦେଇଥିବା ପ୍ରତିଶ୍ରୁତିକୁ ପାଳନ କରିଛନ୍ତି ସମିତିସଭ୍ୟା ନଳିନୀ ସାହୁ ଓ ସରପଞ୍ଚ ବୃନ୍ଦାବତୀ ନାୟକ । ଫଳରେ ଉଭୟ ପ୍ରତିନିଧିଙ୍କ ପାଇଁ ଗ୍ରାମବାସୀ ମହଲରେ ଖୁସିର ଲହରୀ ଖେଳିଯାଇଛି ।ପ୍ରକାଶ ଥାଉକି ଗତ ୨୦୦୨ ମସିହାରେ ବିନିକା ବିଧାନସଭା କ୍ଷେତ୍ରର ପୂର୍ବତନ ବିଧାୟକ ତଥା ବର୍ତ୍ତମାନ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀଙ୍କ ସମୟରେ ଏହି ଗ୍ରାମ୍ୟ ରାସ୍ତା କଂକ୍ରିଟ କରଣ ହୋଇଥିଲେ ହେଁ ଦୀର୍ଘ ୨୦ବର୍ଷ ଧରି ତାର

ମରାମତି କିମ୍ବା ଆଧୁନିକରଣ ହୋଇ ନଥିବାରୁ ପୁରୁଣା କଂକ୍ରିଟ ରାସ୍ତା ମାଟିରେ ପୋତି ଅସଂଖ୍ୟ ଗର୍ତ୍ତ ସୃଷ୍ଟି କରିଥିଲା ।ଯାହା ଫଳରେ ରାସ୍ତାରେ ଗାଡ଼ି ମଟର ହାତୀ ଝୁଲିଲା ପରି ଯାଉଥିବା ବେଳେ ବାଧ୍ୟ ହୋଇ ଲୋକେ ଯନ୍ତ୍ରଣାଦାୟକ ରାସ୍ତାରେ ବହୁ ଦୁଃଖ କଷ୍ଟରେ ଯିବା ଆସିବା କରୁଥିଲେ ।ରାସ୍ତା ଅବସ୍ଥା ଏପରି ସାଙ୍ଘାତିକ ଥିଲା ଯେ ଅଧିକାଂଶ ସମୟରେ ଛୋଟ ଛୋଟ ଦୁର୍ଘଟଣା ମଧ୍ୟ ଘଟିଥିବା ନଜିର ରହିଛି ।ଗାଁ ଉପରପଡ଼ା ପୂଜା ମଣ୍ଡପ ଠାରୁ ତଳିପଡ଼ା ପର୍ଯ୍ୟନ୍ତ ପ୍ରାୟ ୮୦୦ମିଟର ଏହି ରାସ୍ତା ଅସଂଖ୍ୟ ଛୋଟବଡ ଗର୍ତ୍ତରେ ପରିପୂର୍ଣ ରହିଥିଲା । ତେବେ ସେ ଯାହା ବି ହେଉ ଉଭୟ ପଞ୍ଚାୟତ ପ୍ରତିନିଧି ନିର୍ବାଚନ ବେଳେ ଦେଇଥିବା କଥା କୁ ଅକ୍ଷରେ ଅକ୍ଷରେ ପାଳନ କରି ଆଜି ଉକ୍ତ ଦଦରା ରାସ୍ତାର ନବ କଳେବର କାମ ଆରମ୍ଭ କରିଥିବାରୁ ଗ୍ରାମବାସୀ ମହଲରେ ଖୁସିର ଲହରୀ ଖେଳିଯାଇଛି ।କାମ ସଂପୂର୍ଣ୍ଣକରଣ ନେଇ ଗ୍ରାମର ସମସ୍ତ ୱାର୍ଡ ପ୍ରତିନିଧି ଓ ଗ୍ରାମବାସୀ ସହଯୋଗ କରୁଥିବା ଦେଖିବାକୁ ମିଳୁଛି ।ଆଗାମୀ ଦିନରେ ମଧ୍ୟ ଗ୍ରାମ ତଥା ଚରଦା ପଞ୍ଚାୟତ ବିକାଶ ପାଇଁ ଉଭୟ ସରପଞ୍ଚ ଓ ସମିତି ସଭ୍ୟା ବଦ୍ଧପରିକର ବୋଲି କହିଛନ୍ତି ।