12-Nov-2020

ପାଟଣାଗଡ଼, - ବର୍ତ୍ତମାନ ବଲାଙ୍ଗୀର ଜିଲ୍ଲାରେ କରୋନା ସଂକ୍ରମଣ ଅପେକ୍ଷାକୃତ ଭାବରେ କମିଯାଇଥିବା ବେଳେ ଏ ପର୍ଯ୍ୟନ୍ତ ବିପଦ ଟଳି ନାହିଁ । ବର୍ତ୍ତମାନ କରୋନାର ଦ୍ୱିତୀୟ ଲହରୀ ଚାଲିଥିବା ବେଳେ ସାମାନ୍ୟ ଅବହେଳା ମଣିଷ ପାଇଁ ଜଟିଳ ହୋଇପାରେ । ତେବେ ସରକାରଙ୍କ ବ୍ୟାପକ ଜନସଚେତନତା ସତ୍ତ୍ୱେ ବଲାଙ୍ଗୀର ଜିଲ୍ଲା ପାଟଣାଗଡ଼ ଉପଖଣ୍ଡରେ ଲୋକେ କୋଭିଡ କଟକଣାକୁ ମାନୁ ନଥିବା ଯୋଗୁଁ ଏହା ଆଗକୁ କରୋନା ସଂକ୍ରମଣକୁ ବୃଦ୍ଧି କରିବାର ଆଶଙ୍କା ରହିଛି । ସକାଳ ୫ଟାରୁ ପାଟଣାଗଡ଼ ସହରରେ ଯାତ୍ରାପର୍ବ ପରି ଜନଗହଳି ଦେଖାଯାଉଛି । ଲୋକେ ସାମାଜିକ ଦୂରତା ପାଳନ କରୁନଥିବା  ବେଳେ ଲୋକଙ୍କ ମୁହଁରେ ମାସ୍କ ନଥିବା ମଧ୍ୟ ଦେଖାଯାଇଛି । କିଛି ମାସ ପୂର୍ବରୁ ପୋଲିସ ଓ ପ୍ରଶାସନ ମାସ୍କ ପିନ୍ଧିନଥିବା ଲୋକଙ୍କୁ ତାଗିତ୍ କରିବା ସହ ତାଙ୍କ ଟାରୁ ଜରିମାନା ଆଦାୟ କରୁଥିଲା । ଏବେ ଲୋକେ ପୋଲିସରେ ଢ଼ିଲାପଣର ସୁଯୋଗ ନେଇ ସହରରେ ବୁଲୁଥିବା ଦେଖାଯାଉଛି । ଥାନା ପାଖ ରାସ୍ତା, ବସଷ୍ଟାଣ୍ଡ ଆଦି ଅଞ୍ଚଳରେ ଲୋକଙ୍କ ଭିଡ ଆଗକୁ କରୋନା ଜନିତ ବିପଦ ସୃଷ୍ଟି କରିପାରେ । ତେବେ ଅମାନିଆ ମାନଙ୍କୁ ସାବାଡ କରିବାରେ ପାଟଣାଗଡ଼ ପୋଲିସ ତତ୍ପରତା ପ୍ରକାଶ କଲେ ଲୋକଙ୍କ ଧନଜୀବନ ସୁରକ୍ଷିତ ରହିବ ବୋଲି ଜନମତ ପ୍ରକାଶ ପାଇଛି ।