11-Apr-2021

ସୁରଟ(ପ୍ରେରଣା ଖବର ବ୍ୟୁରୋ) : କରୋନା ଭୂତାଣୁ ସଂକ୍ରମଣ ହୁ ହୁ ହୋଇ ବଢ଼ିଚାଲିଛି। ସୁରଟରେ ସ୍ଥିତି ଅସମ୍ଭାଳ ହୋଇପଡ଼ିଛି। ମୃତକଙ୍କ ସଂଖ୍ୟା ଲଗାତାର ବୃଦ୍ଧି ପାଉଥିବା ବେଳେ ଶବ ସତ୍କାର ପାଇଁ ଜାଗା କମ୍‌ ପଡ଼ୁଥିବା ଅଭିଯୋଗ ହେଉଛି। ଏପରିକି ଶ୍ମଶାନରେ ଭିଡ଼ି ଜମୁଥିବା ଦେଖିବାକୁ ମିଳୁଛି। ସବୁଠୁ ଆଶ୍ଚର୍ଯ୍ୟର କଥା ହେଉଛି ଶୀଘ୍ର ଶବଦାହ ପାଇଁ ଲୋକେ ଟଙ୍କା ଦେଉଛନ୍ତି। ଟଙ୍କା ଦେଇ ଶୀଘ୍ର ଶବଦାହ କରାଇ ଲୋକେ କାମ ସାରିବାକୁ ତତ୍ପରତା ପ୍ରକାଶ କରୁଥିବା ନେଇ ଖବର ମିଳିଛି।

ଗୁଜୁରାଟରେ ସବୁଠୁ ଅଧିକ ସଂକ୍ରମଣ ସୁରଟର ବୋଲି ଜଣାପଡ଼ିଛି। କରୋନା ସଂକ୍ରମଣ ହଠାତ ବୃଦ୍ଧି ପାଇବା ପରେ ୧୨ ଜଣିଆ କେନ୍ଦ୍ରୀୟ ଟିମ୍‌ ସୁରଟ ଗସ୍ତ କରି ସ୍ଥିତି ସମୀକ୍ଷା କରିଥିଲେ। ସୁରଟ ସହରର ବରାଛା ଅଞ୍ଚଳରେ ଥିବା ଅଶ୍ବିନିକୁମାର ଶ୍ମଶାନ ଘାଟରେ ଅନ୍ତିମ ସଂସ୍କାର ପାଇଁ ଟୋକନ ନେବାକୁ ପଡ଼ୁଛି। ଟୋକନ ନେବା ପରେ ଲୋକେ ନିଜ ପାଳି ଆସିବା ପର୍ଯ୍ୟନ୍ତ ଅପେକ୍ଷା କରୁଛନ୍ତି। ଟୋକନ ବ୍ୟବସ୍ଥା ଥିବା ସତ୍ବେ କିଛି ଲୋକ ଲାଞ୍ଚ ନେଇ ଅନ୍ତିମ ସଂସ୍କାର କରାଉଥିବା ମଧ୍ୟ ଅଭିଯୋଗ ହୋଇଛି।

ଜଣେ ସାମାଜିକ କର୍ମୀ ନିଜର ପରିଜନଙ୍କ ଅନ୍ତିମ ସଂସ୍କାର କରାଇବା ପାଇଁ ସେଠାକୁ ଯାଇଥିଲେ। ସେଠରେ ସେ ଦେଖିଲେ କିଛି ଲୋକ ଟୋକନ ନେଇ ଶବଦାହ କରିବାକୁ ଅପେକ୍ଷା କରିଥିଲେ। କିନ୍ତୁ ଗୋଟିଏ ପରିବାର ବିନା ଟୋକନ​‌ରେ ସେଠାରେ ଥିଲେ। ସେଠାକର କିଛି କର୍ମଚାରୀ ଜଲଦି ଅନ୍ତିମ ସଂସ୍କାର କରାଇଦେବା ନାଁରେ ଲୋକଙ୍କ ପାଖରୁ ଲାଞ୍ଚ ନେଉଥିବା ନେଇ ସାମାଜିକ କର୍ମୀ ଅଭିଯୋଗ କରିଛନ୍ତି। ୧୫୦୦- ୨୦୦୦ ଟଙ୍କା ଦେଇଦେଲେ ଲୋକଙ୍କୁ ଆଉ ଟୋକନ ନେବାକୁ ପଡ଼ୁନାହିଁ ସେମାନେ ନିଜ କାମ ସାରି ଫେରିଯାଉଥିବା ମଧ୍ୟ ସେ କହିଛନ୍ତି।

କରୋନା ସଂକ୍ରମଣ ଯୋଗୁ ସୁରଟରେ ସ୍ଥିତି ବିଗିଡ଼ିଥିବା ବେଳେ ମୃତକଙ୍କ ସଂଖ୍ୟା ବଢ଼ୁଛି। ତେଣୁ ଶ୍ମଶାନରେ ଏକାସଙ୍ଗେ ୨୫ ଶବ ଦାହ ପାଇଁ ବ୍ୟବସ୍ଥା କରିବାକୁ ସ୍ଥାନୀୟ ପ୍ରଶାସନ ଯୋଜନା କରୁଥିବା ଜଣାପଡ଼ିଛି। କରୋନା ଏବଂ ଅଣ କରୋନା ମୃତକଙ୍କ ଦାହ ପାଇଁ ଶ୍ମଶାନରେ ଲମ୍ବା ଲାଇନ୍‌ ଲାଗୁଛି। ଶନିବାର ରାତିରେ ୨୦ ଜଣଙ୍କ ଅନ୍ତିମ ସଂସ୍କାର କରାଯାଇଛି। ମିଳିଥିବା ସୂଚନା ଅନୁସାରେ ଗତବର୍ଷ ଅପେକ୍ଷା ସୁରଟରେ ୨୦୨୧ରେ ସ୍ଥିତି ଅଧିକ ଅସମ୍ଭାଳ ହୋଇପଡ଼ିଛି।