02-Aug-2026

ବରପାଲି (ସୁଦାମ ଦୀପ )
 ବରଗଡ ଜିଲ୍ଲା  କମଗାଁ ମହାବିଦ୍ୟାଳୟର ଇତିହାସ ବିଭାଗର ବରିଷ୍ଠ ପ୍ରାଧ୍ୟାପକ ଶ୍ରୀ ହରେକୃଷ୍ଣ ଦେବତା ଓ ସଂସ୍କୃତ ବିଭାଗର ଅଧ୍ୟାପକ ଶ୍ୟାମ  ସୁନ୍ଦର ସାହୁ ଦୀର୍ଘ ୩୪ ବର୍ଷ ଧରି ମହାବିଦ୍ୟାଳୟରେ ସଫଳତାର ସହ ସେବା ପ୍ରଦାନ କରିବା ପରେ ଅବସର ଗ୍ରହଣ କରିଛନ୍ତି। ଏହି ଅବସରରେ ମହାବିଦ୍ୟାଳୟ ପକ୍ଷରୁ ଏକ ଭାବବିହ୍ୱଳ ବିଦାୟକାଳୀନ ସମାରୋହ ସଭାରେ  ମହାବିଦ୍ୟାଳୟର ପୂର୍ବତନ ସଭାପତି  ପ୍ରବୋଧ ପ୍ରଧାନ, ପୂର୍ବତନ ସମ୍ପାଦକ  ବେଣୁଧର ସାହୁ ଓ ଶ୍ରୀ ପ୍ରେମ ରାଜ ମେହେର ଅତିଥି ଭାବେ ଯୋଗଦେଇ ଅବସରପ୍ରାପ୍ତ ଅଧ୍ୟାପକ ଦ୍ୱୟଙ୍କ ଶିକ୍ଷାକ୍ଷେତ୍ରର ଅବଦାନକୁ ପ୍ରଶଂସା କରିଥିଲେ। ଲଖମରା ମହାବିଦ୍ୟାଳୟର ଅଧ୍ୟକ୍ଷ  ବିଜୟ କୁମାର ମିଶ୍ର ଏବଂ ଗୌଡ଼ଗାଁ ପଞ୍ଚାୟତ ମହାବିଦ୍ୟାଳୟର ଅଧ୍ୟକ୍ଷ  ତାରିଣୀ ଦେବତା ମଧ୍ୟ ଉପସ୍ଥିତ ରହି ଶୁଭେଚ୍ଛା ଜଣାଇଥିଲେ।
ମହାବିଦ୍ୟାଳୟର ପ୍ରଥମ ବ୍ୟାଚର ପୁରାତନ ଛାତ୍ରଛାତ୍ରୀଙ୍କ ସହ ପୂର୍ବତନ ପରିଚାଳନା ସମିତି ସଦସ୍ୟ ମନବୋଧ ନାଏକ,  ସନ୍ତୋଷ ଖମାରୀ,  ନାରାୟଣ ଗଡ଼ତିଆ, ଶେଷଦେବ ଭୋଇ, ୧୯୯୨ ମସିହାରେ ଯୋଗଦେଇଥିବା ପୂର୍ବତନ ଅଧ୍ୟାପକ  ସୁରେଶ ଦାଶ ଓ  ଖେଦୁ ପ୍ରଧାନ, ପୂର୍ବତନ ଅଧ୍ୟକ୍ଷ ପ୍ରେମାନନ୍ଦ ପଟେଲ ପ୍ରମୁଖ ଯୋଗଦେଇ ପୁରୁଣା ସ୍ମୃତିଚାରଣ କରିଥିଲେ।
ଅବସରପ୍ରାପ୍ତ ପ୍ରାଧ୍ୟାପକ  ହରେକୃଷ୍ଣ ଦେବତା ମହାବିଦ୍ୟାଳୟର ସ୍ଥାପନାଠାରୁ ବିକାଶ ପର୍ଯ୍ୟନ୍ତର ଇତିହାସ ବର୍ଣ୍ଣନା କରିଥିବାବେଳେ, ପୂର୍ବତନ ଅଧ୍ୟକ୍ଷ ଶ୍ରୀ ପ୍ରେମାନନ୍ଦ ପଟେଲ ଏବଂ ପୂର୍ବତନ ଅଧ୍ୟାପକ  ସୁରେଶ ଦାଶ ଓ ଖେଦୁ  ପ୍ରଧାନ କମଗାଁରେ କାର୍ଯ୍ୟକାଳ ସମୟର ସ୍ମୃତି ଓ ଅଧ୍ୟାପକମାନଙ୍କ ମଧ୍ୟରେ ଥିବା ଭାତୃତ୍ୱ ସମ୍ପର୍କ ବିଷୟରେ ଆଲୋକପାତ କରିଥିଲେ।
ମହାବିଦ୍ୟାଳୟର ଅଧ୍ୟକ୍ଷ  ରବିନାରାୟଣ ସାହୁ ସଭାରେ ଅଧ୍ୟକ୍ଷତା କରିଥିଲେ। ମହାବିଦ୍ୟାଳୟର ସମସ୍ତ ଅଧ୍ୟାପକ ଓ କର୍ମଚାରୀ ଉଭୟ ଅବସରପ୍ରାପ୍ତ ଅଧ୍ୟାପକଙ୍କ କର୍ମନିଷ୍ଠା, ଶୃଙ୍ଖଳା ଓ ଶିକ୍ଷାଦାନ ପ୍ରତି ସମର୍ପଣକୁ ସ୍ମରଣ କରି ତାଙ୍କ ସୁସ୍ଥ, ସୁଖମୟ ଓ ଦୀର୍ଘାୟୁ ଜୀବନ କାମନା କରିଥିଲେ।
ମହାବିଦ୍ୟାଳୟର ପ୍ରତିଷ୍ଠାତା ସଦସ୍ୟ  ବୈଶାଖୁ ଭୋଇ ସୁଦୂର କୋଲକାତାରୁ ଶୁଭେଚ୍ଛା ବାର୍ତ୍ତା ପଠାଇ ଉଭୟ ଅଧ୍ୟାପକଙ୍କୁ ଅଭିନନ୍ଦନ ଜଣାଇଥିଲେ ମହାବିଦ୍ୟାଳୟର ଶୁଭାକାଙ୍କ୍ଷୀ ଶ୍ରୀ କ୍ଷିରେଶ୍ୱର ଗଡ଼ତିଆ ଏବଂ +୩ ଅଧ୍ୟକ୍ଷ ଡ଼. ରତିକାନ୍ତ ସାହୁ ଉପଢୌକନ ପ୍ରଦାନ କରି ଅବସରପ୍ରାପ୍ତ ଅଧ୍ୟାପକ ଦ୍ୱୟଙ୍କୁ ସମ୍ମାନିତ କରିଥିଲେ। ଶେଷରେ ଅଧ୍ୟାପିକା ଅନୁପମା ପଣ୍ଡା ଧନ୍ୟବାଦ ଅର୍ପଣ କରି ସଭାର ସମାପନ କରିଥିଲେ।