01-Jun-2026

ବଲାଙ୍ଗୀର (ପ୍ରେରଣା ଖବର):  ବଲାଙ୍ଗୀର ରେଞ୍ଜ ଉପରଝର ପଂଚାୟତ ଅନ୍ତର୍ଗତ ଫଟାମୁଣ୍ଡା  ଗାଁ ର ସାତ୍ ଝରନ୍ ସଂରକ୍ଷିତ ଜଙ୍ଗଲର ୫୦ ହେକ୍ଟର ଜମିରେ  ବଲାଙ୍ଗୀର ଜଙ୍ଗଲ ବିଭାଗ ପକ୍ଷରୁ ନର୍ସରୀ ତିଆରି ହେଉଛି। ଏଠାରେ ପ୍ରାୟ ୧୦ ହଜାର ଚାରା ରୋପଣ କରାଯିବାକୁ ଯୋଜନା ରହିଥିବା ଜଙ୍ଗଲ ବିଭାଗ କହୁଛି। ତେବେ ନର୍ସରୀ ତିଆରି ଆଳରେ ଖୋଦ ଜଙ୍ଗଲ ବିଭାଗ ଲୋକ ଲଗାଇ ଜଙ୍ଗଲ ର ଗଛ ସବୁ କାଟି ପଦା କରି ଦିଆ ଯାଉଛି ଯାହାକୁ ନେଇ ଫଟାମୁଣ୍ଡା ଗ୍ରାମବାସୀ ତଥା ପରିବେଶପ୍ରେମୀ ଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସବୁଠାରୁ ବଡ଼ କଥା ହେଲା ଏହି ଜଙ୍ଗଲରେ ନିର୍ମାଣ ହେବାକୁ ଯାଉଥିବା ନର୍ସରୀ କେଉଁ ସ୍କିମ ରୁ ହେଉଛି, କେତେ ଟଙ୍କା ଅନୁଦାନରେ କାମ ହେଉଛି, ଲୋକଙ୍କ ପାଖରେ ତାହାର କୌଣସି ସୂଚନା ନାହିଁ। ସରକାରୀ ଅନୁଦାନରେ ଯେ କୌଣସି କାମ ହେଲେ ପ୍ରଥମେ ଲୋକଙ୍କ ଅବଗତି ପାଇଁ ସୂଚନା ଫଳକ ରହିବାର ନିୟମ ରହିଛି। କିନ୍ତୁ ଏହି ନିୟମକୁ ଉଲ୍ଲଙ୍ଘନ କରି ଜଙ୍ଗଲ ବିଭାଗ କାହାସ୍ୱାର୍ଥରେ ଜଙ୍ଗଲ ରେ ଏହି ନର୍ସରୀ ନିର୍ମାଣ କାମ ହାତକୁ ନେଇଛି  ବୋଲି ଗ୍ରାମବାସୀ ପ୍ରଶ୍ନ କରିଛନ୍ତି। ବିନା ସୂଚନା ଫଳକରେ ନିର୍ମାଣ ହେଉଥିବା ଏହି ନର୍ସରୀ କେଉଁ ସ୍କିମ ରୁ ଓ କେତେ ଅନୁଦାନ ରେ ତିଆରି ହେଉଛି ତାହାକୁ ନେଇ ଗ୍ରାମବାସୀ ଅନ୍ଧାରରେ ରହିଛନ୍ତି।  କିଛି ଦିନ ତଳେ ଏଠାରେ କାର୍ଯ୍ୟରତ ଫରେଷ୍ଟର ଗାର୍ଡ କୁ ଗାଁ ଲୋକେ ଅଟକାଇ  ନର୍ସରୀ ସମ୍ପର୍କରେ ପଚାରି ଥିଲେ। ତେବେ ଫରେଷ୍ଟ ଗାର୍ଡ କିଛି କହି ପାରି ନଥିଲେ। ଏ ସମ୍ପର୍କରେ ଆମେ ବଲାଙ୍ଗୀର ରେଞ୍ଜର ନବୀନ ପଣ୍ଡା ଙ୍କୁ ପଚାରିବାରୁ ବିନା ସୂଚନାଫଳକରେ ଜଙ୍ଗଲର ଗଛ କାଟି ଜଙ୍ଗଲ ବିଭାଗ ନର୍ସରୀ ତିଆରି କରିବା ଘଟଣାକୁ ଅସ୍ବୀକାର କରିବା ସହ ସରକାର ଙ୍କ 'କାମ୍ପା'(Compensiate afforestation)ଯୋଜନାରେ ନିର୍ମାଣ ହେବାକୁ ଥିବା ଏହି ନର୍ସରୀ ପାଇଁ ସରକାରୀସ୍ତରରେ ଏପ୍ରୁଭାଲ ହୋଇଛି କିନ୍ତୁ ସାଙ୍ଗସନ୍ ହୋଇନି। ନର୍ସରୀ ନିର୍ମାଣ ସାଙ୍ଗସନ୍ ହେଲା ପରେ ନିଶ୍ଚିତ ଭାବରେ ସୂଚନା ଫଳକ ଲଗାଯିବ ବୋଲି ରେଞ୍ଜର ଶ୍ରୀ ପଣ୍ଡା କହିଛନ୍ତି। ଏହି ଘଟଣାକୁ ବଲାଙ୍ଗୀର ଟାଙ୍ଗିଆ ଜାମ୍ ଆନ୍ଦୋଳନର ନେତା ତଥା ଆଇନଜୀବୀ ଗୋପାଳ ହୋତା ନିନ୍ଦା କରିଛନ୍ତି।

ତେବେ ଫଟାମୁଣ୍ଡା  ଗାଁ ର ସାତ୍ ଝରନ୍ ସଂରକ୍ଷିତ ଜଙ୍ଗଲର ସୁରକ୍ଷା ଓ ବନୀକରଣ ପାଇଁ ଲକ୍ଷାଧିକ ଟଙ୍କାର ସରାକରୀ ଅନୁଦାନ ଆସୁଥିଲେ ସୁଦ୍ଧା ଏଠାରେ ବନୀକରଣ ଯୋଜନା ଫେଲ ମାରିଛି ।