06-Feb-2021

ନୂଆଦିଲ୍ଲୀ (ପ୍ରେରଣା ଖବର) ଗତ କିଛି ଦିନ ହେଲା ସଂସଦ କ୍ୟାଣ୍ଟିନକୁ ନେଇ ଅନେକ ଚର୍ଚ୍ଚା ହେଉଛି। କ୍ୟାଣ୍ଟିନରେ ମିଳୁଥିବା ସବସିଡି ସରକାର ବନ୍ଦ କରିଦେଇଛନ୍ତି। ବର୍ତ୍ତମାନ କ୍ୟାଣ୍ଟିନରେ ଖାଇବା ପୂର୍ବ ଭଳି ଶସ୍ତାରେ ମିଳୁନି। ସବୁ ମେନ୍ୟୁର ଦାମ ବଢି ଯାଇଛି। ସଂସଦ କ୍ୟାଣ୍ଟିନର ନିଜର ଏକ ଇତିହାସ ରହିଛି। ସ୍ୱାଧୀନତା ପରଠାରୁ ସାଂସଦ, ସଂସଦ ପରିସର କର୍ମଚାରୀ ଓ ଏଠାକୁ ଆସୁଥିବା ତମାମ ପ୍ରତିନିଧି ମଣ୍ଡଳ ଏଠାରେ ଖାଇ ଆସୁଛନ୍ତି। ସଂସଦରେ କିଭଳି ଖାଇବା ମିଳେ ଓ କିଭଳି ପ୍ରସ୍ତୁତ ହୁଏ ପଢନ୍ତୁ।
ଦେଶ ସ୍ୱାଧୀନତା ସମୟରେ ସଂସଦ କ୍ୟାଣ୍ଟିନ ବହୁତ ଛୋଟ ଓ ପାରମ୍ପରିକ ଥିଲା। ଆଗରୁ ଲୋକସଭା କର୍ମଚାରୀ କ୍ୟାଣ୍ଟିନ ଚଳାଉଥିଲେ। ତତ୍କାଳୀନ ପ୍ରଧାନମନ୍ତ୍ରୀ ଜବାହାରଲାଲ ନେହରୁ ଅଧିକାଂଶ ସମୟରେ ଏହି କ୍ୟାଣ୍ଟିନରେ ଖାଉଥିଲେ। କିନ୍ତୁ ପରେ ଧୀରେ ଧୀରେ କ୍ୟାଣ୍ଟିନ ବ୍ୟବସ୍ଥା ବଦଳିବାକୁ ଲାଗିଲା। ୬୦ ଦଶକରେ ସଂସଦ କ୍ୟାଣ୍ଟିନରେ ଅନେକ ପରିବର୍ତ୍ତନ ହୋଇଥିଲା। କାଠ ଚୁଲି ବଦଳରେ ଏଲପିଜି ଗ୍ୟାସ ବ୍ୟବହାର ହେଲା। କ୍ୟାଣ୍ଟିନ ବ୍ୟବସ୍ଥା ସୁଧାରିବାକୁ କ୍ୟାଣ୍ଟିନ ସଞ୍ଚାଳନ ଦାୟିତ୍ୱ ଭାରତୀୟ ରେଳବାଇକୁ ଦିଆଗଲା। ୧୯୬୮ ମସିହାରୁ ଭାରତୀୟ ରେଳବାଇର ଉତ୍ତର ଜୋନର ଆଇଆରସିଟିସି କ୍ୟାଣ୍ଟିନ କାମ ସମ୍ଭାଳୁଥିଲା। ସେତେବେଳେ କ୍ୟାଣ୍ଟିନରେ ଖାଇବା ବହୁତ ଶସ୍ତା ଥିଲା।ସଂସଦରେ ଏକ ମୁଖ୍ୟ କ୍ୟାଣ୍ଟିନ ଅଛି। ଏଠାରେ ରୋଷେଇ ହୁଏ ଓ ସଂସଦ ପରିସରରେ ଥିବା ୫ଟି କ୍ୟାଣ୍ଟିନକୁ ଅଣାଯାଇଥାଏ। ସେଠାରେ ଖାଇବା ଗରମ କରିବାକୁ ପୁରା ବ୍ୟବସ୍ଥା ଅଛି। ସଂସଦ କ୍ୟାଣ୍ଟିନରେ ଭୋଜନ ପ୍ରକ୍ରିୟା ସକାଳୁ ଆରମ୍ଭ ହୋଇଥାଏ। ସକାଳୁ ପର୍ଯ୍ୟାପ୍ତ ମାତ୍ରାରେ ପରିବା, କ୍ଷୀର, ଆମିଷ ଓ ଅନ୍ୟ ଜରୁରୀ ସାମଗ୍ରୀ କ୍ୟାଣ୍ଟିନରେ ପହଞ୍ଚିଯାଏ। ସାମଗ୍ରୀ ଆସିବ ପରେ କ୍ୟାଣ୍ଟିନ କର୍ମଚାରୀ କାମ ଆରମ୍ଭ କରିଦିଅନ୍ତି। କ୍ୟାଣ୍ଟିନରେ କମ୍ପ୍ୟୁଟର ପ୍ରିଣ୍ଟରରୁ ଆରମ୍ଭ କରି ପରଷିବା ଜିନିଷ ଓ ଅନ୍ୟାନ୍ୟ ସମସ୍ତ ସାମଗ୍ରୀ ଲୋକସଭା ସଚିବାଳୟ ଦ୍ୱାରା ଉପଲବ୍ଧ କରାଯାଇଥାଏ।

୨୦୦୮ ମସିହାରେ ଗ୍ୟାସ ପାଇପ ଲାଇନରେ ଲିକ ଯୋଗୁଁ ଇନ୍ଧନର ପୁରା ପ୍ରକ୍ରିୟା ବଦଳାଇ ଦିଆଯାଇଥିଲା। ଖାଦ୍ୟ ବିଜୁଳି ଉପକରଣ ଦ୍ୱାରା ପ୍ରସ୍ତୁତ ହୋଇଥାଏ। କ୍ୟାଣ୍ଟିନ ବ୍ୟବସ୍ଥା ଓ ଖାଦ୍ୟର କ୍ୱାଲିଟି ସାଂସଦ ସହ ଜଡିତ ଏକ ସମିତି ତଦାରଖ କରିଥାନ୍ତି। ମଝି ମଝିରେ ଏଥିପାଇଁ ଗାଇଡଲାଇନ ମଧ୍ୟ ନିର୍ଦ୍ଧାରିତ କରାଯାଇଥାଏ। ଏବେ ସୁଦ୍ଧା ଆଇଆରସିଟିସି ସଂସଦ କ୍ୟାଣ୍ଟିନ ଚଳାଉଥିଲା। ଏଥିପାଇଁ ୪୦୦ କର୍ମଚାରୀ କାମ କରୁଥିଲେ।

ବର୍ତ୍ତମାନ ସଂସଦ ଅଧିବେଶନ ଚାଲିଛି ଯେଉଁଥିପାଇଁ ୫ ହଜାର ଲୋକଙ୍କ ଖାଦ୍ୟ ପ୍ରସ୍ତୁତ ହେଉଛି। ରୋଷେଇ ସାଧାରଣତଃ ୧୧ ସୁଦ୍ଧା ପ୍ରସ୍ତୁତ ହୋଇଯାଏ। ତାପରେ ମୁଖ୍ୟ କ୍ୟାଣ୍ଟିନରୁ ପରିସରର ଅନ୍ୟ କ୍ୟାଣ୍ଟିନକୁ ନିଆଯାଇଥାଏ। ଗତ ବର୍ଷ ଯାଏଁ କ୍ୟାଣ୍ଟିନରେ ମୋଟ ୯୦ ପ୍ରକାର ବ୍ୟଞ୍ଜନ ଉପଲବ୍ଧ ଥିଲା। କିନ୍ତୁ ବର୍ତ୍ତମାନ ଭାରତୀୟ ପର୍ଯ୍ୟଟନ ବିକାଶ ନିଗମ କ୍ୟାଣ୍ଟିନ ସଞ୍ଚାଳନ କରୁଛି। ବର୍ତ୍ତମାନ ୪୮ ପ୍ରକାର ବ୍ୟଞ୍ଜନ ପ୍ରସ୍ତୁତ ହେଉଛି।
କ୍ୟାଣ୍ଟିନ ପାଇଁ ସାମଗ୍ରୀ କେନ୍ଦ୍ରୀୟ ଭଣ୍ଡାରରୁ ଆସିଥାଏ ଓ ପନିପରିବା ଓ ଫଳ ସଂସଦ ପରିସର ନିକଟ ମଦର ଡାଏରୀରୁ ଆସିଥାଏ। ଆମିଷ ପାଇଁ ଜଣେ ଧାର୍ଯ୍ୟ ଭେଣ୍ଡର ଅଛନ୍ତି।