03-Mar-2026

(ରାମନାଥ ପଣ୍ଡା )
 ନୂଆପଡ଼ା ଜିଲ୍ଲା ବୋଡ଼େନ ବ୍ଲକ ଅନ୍ତର୍ଗତ ପାତଳ ଗଙ୍ଗାଠାରେ ୟାର ଅନୁଷ୍ଠାନ ସମ୍ପାଦକ ହରି ଦାସ ପଟେଲଙ୍କ ପରିଚାଳନାରେ ୟାର ଅନୁଷ୍ଠାନ ଓ  ଅଜିମ୍ ପ୍ରେମ ଜୀ ଫାଉଣ୍ଡେସନର ମିଳିତ ସହଯୋଗରେ ଲଘୁ ବନଜାତ ଦ୍ରବ୍ୟ  ସଂଗ୍ରହ ଓ ବଜାରୀକରଣ ସମ୍ବନ୍ଧୀୟ ଏକ ବ୍ୟବସାୟୀ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଅଞ୍ଚଳର ପ୍ରମୁଖ ବ୍ୟବସାୟୀ ମୁକେଶ ଅଗ୍ରୱାଲ, ନୂର୍ ମହମ୍ମଦ ଓ ଇସୁବ୍ ଖାନ ଯୋଗଦେଇ ବନଜାତ ଦ୍ରବ୍ୟର ଉଚିତ ମୂଲ୍ୟ, ବଜାର ଚାହିଦା ଓ ଗୁଣମାନ ବିଷୟରେ ଆଲୋଚନା କରିଥିଲେ । ବୈଠକରେ ସୁନାମୁଦି, ଖଡ଼ୁପାଣି, ବାଗଲୋର, ମହୁଳପଦର, କୋଟଗାଁ, ଧୋବେଇ, ରୁଣ୍ଡୀ, ରେଢ଼ାମାଲ, ଭୁଇପାଣି, ନାଗପଡ଼ା, ଝରଣାମାଲ ଓ ମାକରବିର୍ଲି ଗ୍ରାମର ଗୋଷ୍ଠୀ ଜଙ୍ଗଲ ପରିଚାଳନା କମିଟି ସଦସ୍ୟ ସଦସ୍ୟାମାନେ ଏବଂ ସ୍ୱୟଂ ସହାୟିକା ଗୋଷ୍ଠୀର ସଦସ୍ୟାମାନେ ବହୁ ସଂଖ୍ୟାରେ ଉପସ୍ଥିତ ଥିଲେ ।ଜଙ୍ଗଲ ଉପରେ ନିର୍ଭରଶୀଳ ପରିବାରମାନଙ୍କୁ ମଧ୍ୟସ୍ଥିଙ୍କ କବଳରୁ ରକ୍ଷା କରି ଯଥୋଚିତ ମୂଲ୍ୟ ପ୍ରଦାନ କରିବା ନିମନ୍ତେ ଗୋଷ୍ଠୀ ଜଙ୍ଗଲ ପରିଚାଳନା କମିଟି ଓ ସ୍ଵୟଂ ସହାୟିକା ଗୋଷ୍ଠୀ ମାଧ୍ୟମରେ ସିଧାସଳଖ ବ୍ୟବସାୟୀଙ୍କ ସହ ସଂଯୋଗ ସୃଷ୍ଟି କରିବାକୁ ସମ୍ମିଳନୀରେ ନିଷ୍ପତ୍ତି ନିଆଯାଇଥିଲା  । ଆଗାମୀ ଦିନରେ ସ୍ୱୟଂ ସହାୟିକା ଗୋଷ୍ଠୀ ଓ ଗୋଷ୍ଠୀ ଜଙ୍ଗଲ ପରିଚାଳନା କମିଟି ମାଧ୍ୟମରେ ମହୁଲ ଫୁଲ ଓ ଚାର ସଂଗ୍ରହ କରି ଗ୍ରାମସଭା ମାଧ୍ୟମରେ ସିଧାସଳଖ ବ୍ୟବସାୟୀମାନଙ୍କୁ ବିକ୍ରୟ କରାଯିବ ବୋଲି ନିଷ୍ପତ୍ତି ହୋଇଛି ।
କାର୍ଯ୍ୟକ୍ରମରେ ଅରୁଣ ବିଶ୍ୱାଳ, ଖୁସିରାମ ଭୋଇ, ପ୍ରବୀଣ ପଟେଲ, ହୁଲେଶ୍ୱର ମାଝୀ ଓ ଋଷିରାମ ମାଝୀ ଉପସ୍ଥିତ ରହି ବୈଜ୍ଞାନିକ ପଦ୍ଧତିରେ ସଂଗ୍ରହ ଓ ପ୍ରକ୍ରିୟାକରଣ ଉପରେ ଗୁରୁତ୍ୱାରୋପ କରିଥିଲେ ।ସଂଗ୍ରହକାରୀମାନଙ୍କୁ ଆଗାମୀ ଦିନରେ ଉପଯୁକ୍ତ ତାଲିମ ଓ ବଜାର ସୂଚନା ପ୍ରଦାନ କରି ସେମାନଙ୍କୁ ଆର୍ଥିକ ଭାବେ ସ୍ୱାବଲମ୍ବୀ କରିବା ପାଇଁ ଲକ୍ଷ୍ୟ ରଖା ଯାଇଛି ।