10-Feb-2026

ନୂଆଦିଲ୍ଲୀ: ସଂସଦର ଚଳିତ ବଜେଟ ଅଧିବେଶନରେ ରାଜ୍ୟସଭା ସାଂସଦ ଶ୍ରୀ ନିରଞ୍ଜନ ବିଶି ତାରାଙ୍କିତ ପ୍ରଶ୍ନ ମାଧ୍ୟମରେ ଓଡ଼ିଶାର ଆକାଂକ୍ଷୀ ଜିଲ୍ଲାଗୁଡ଼ିକ ପାଇଁ ଅତିରିକ୍ତ ଅନୁଦାନ ସହାୟତା ପ୍ରଦାନ ପ୍ରସଙ୍ଗ ଉଠାଇଛନ୍ତି।
ସାଂସଦ ଶ୍ରୀ ବିଶି ବିଶେଷକରି ପଶ୍ଚିମ ଓଡ଼ିଶାର ବଲାଙ୍ଗିର ପରି ଆକାଂକ୍ଷୀ ଜିଲ୍ଲାଗୁଡ଼ିକରେ ଭିତ୍ତିଭୂମି ଉନ୍ନୟନ ଓ ମାନବ ବିକାଶକୁ ତ୍ୱରାନ୍ୱିତ କରିବା ପାଇଁ କେନ୍ଦ୍ର ସରକାର ଅତିରିକ୍ତ ଅନୁଦାନ ଦେବାକୁ କୌଣସି ପ୍ରସ୍ତାବ ବିଚାରାଧୀନ ରଖିଛନ୍ତି କି ନାହିଁ ବୋଲି ପଚାରିଥିଲେ।
ଏହାର ଉତ୍ତରରେ ଅର୍ଥମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ ସଦନକୁ ଜଣାଇଥିଲେ ଯେ, ଆକାଂକ୍ଷୀ ଜିଲ୍ଲାଗୁଡ଼ିକ ପାଇଁ ପୃଥକ ଭାବେ ଅତିରିକ୍ତ ଅନୁଦାନ ଦେବାର କୌଣସି ପ୍ରସ୍ତାବ ବର୍ତ୍ତମାନ ବିଚାରାଧୀନ ନାହିଁ। ତେବେ ଆକାଂକ୍ଷୀ ଜିଲ୍ଲା କାର୍ଯ୍ୟକ୍ରମ  ଅନ୍ତର୍ଗତ ଜିଲ୍ଲାମାନଙ୍କର ତ୍ରୈମାସିକ ପ୍ରଗତି ଆଧାରରେ ଡେଲ୍ଟା ର୍ୟାଙ୍କିଂ ପଦ୍ଧତିରେ ପ୍ରୋତ୍ସାହନ ଦିଆଯାଉଛି।
ଏହି କାର୍ଯ୍ୟକ୍ରମରେ ସ୍ୱାସ୍ଥ୍ୟ ଓ ପୋଷଣ, ଶିକ୍ଷା, କୃଷି ଓ ଜଳ ସମ୍ପଦ, ଆର୍ଥିକ ଅନ୍ତର୍ଭୁକ୍ତି ଓ କୌଶଳ ବିକାଶ, ଏବଂ ଭିତ୍ତିଭୂମି ଇତ୍ୟାଦି lଏହି ପାଞ୍ଚଟି କ୍ଷେତ୍ରରେ ୪୯ଟି ପ୍ରମୁଖ ସୂଚକ ଉପରେ ଜିଲ୍ଲାମାନଙ୍କର କାର୍ଯ୍ୟଦକ୍ଷତା ମାପ କରାଯାଉଛି।
ଅର୍ଥମନ୍ତ୍ରୀ ଆହୁରି କହିଥିଲେ ଯେ, ପ୍ରତ୍ୟେକ ତ୍ରୈମାସିକରେ ମୋଟ ୩୦ କୋଟି ପ୍ରୋତ୍ସାହନ ରାଶି ଶ୍ରେଷ୍ଠ ପ୍ରଦର୍ଶନକାରୀ ଜିଲ୍ଲାମାନଙ୍କୁ ଦିଆଯାଉଛି। ପ୍ରଥମ ସ୍ଥାନ ପାଇଁ ୧୦ କୋଟି ଓ ଦ୍ୱିତୀୟ ସ୍ଥାନ ପାଇଁ ₹୫ କୋଟି ପ୍ରଦାନ କରାଯାଉଛି ଏବଂ ପାଞ୍ଚଟି ବିଷୟଗତ କ୍ଷେତ୍ରରେ ଶ୍ରେଷ୍ଠ ଜିଲ୍ଲାକୁ ପ୍ରତ୍ୟେକରେ ₹୩ କୋଟି ପ୍ରଦାନ କରାଯାଏ।
ଓଡ଼ିଶାରେ ୧୦ଟି ଜିଲ୍ଲା ଆକାଂକ୍ଷୀ ଜିଲ୍ଲା କାର୍ଯ୍ୟକ୍ରମରେ ସାମିଲ ଅଛି। ୨୦୧୯-୨୦ ଠାରୁ ୨୦୨୫-୨୬ (ଅକ୍ଟୋବର ୨୦୨୫ ପର୍ଯ୍ୟନ୍ତ) ଏହି ଜିଲ୍ଲାମାନଙ୍କୁ ମୋଟ ₹୧୩୭.୪୮ କୋଟି ଅନୁମୋଦିତ ହୋଇଛି।
ଏହା ସହିତ, ରାଜ୍ୟଗୁଡ଼ିକୁ ପୁଞ୍ଜି ନିବେଶ ପାଇଁ ବିଶେଷ ସହାୟତା ଯୋଜନା ଅନ୍ତର୍ଗତ ୨୦୨୦-୨୧ ଠାରୁ ଓଡ଼ିଶାକୁ ₹୧୪,୫୧୭ କୋଟି ମିଳିଛି, ଯାହାକୁ ରାଜ୍ୟ ସରକାର ଆକାଂକ୍ଷୀ ଜିଲ୍ଲାର ବିକାଶରେ ବ୍ୟବହାର କରିପାରିବେ ବୋଲି ଅର୍ଥମନ୍ତ୍ରୀ ସୂଚନା ଦେଇଥିଲେ।