29-Nov-2025

ବିନିକା(ହିମାଂଶୁ ଶେଖର ପୁଟେଲ)୧୯୫୯ମସିହାରେ ସ୍ଥାପିତ ପିତେଇପାଲି ସରକାରୀ ନୂତନ ଉଚ୍ଚ ପ୍ରାଥମିକ ବିଦ୍ୟାଳୟରେ ଅଧ୍ୟୟନରତ ଛାତ୍ରଛାତ୍ରୀ ମାନେ ବିଭିନ୍ନ ମୌଳିକ ସୁବିଧାରୁ ବଂଚିତ ହୋଇଥିବା ଜଣାପଡିଛି। ଏହି ବିଦ୍ୟାଳୟ ଉପରେ ପିତେଇପାଲି ଓ ଗଜବନ୍ଧ ଦୁଇଟି ଗ୍ରାମର ଛାତ୍ରଛାତ୍ରୀ ମାନେ ନିର୍ଭରଶୀଳ ।ହେଲେ ଏଠାରେ ୪ଗୋଟି କୋଠରୀ ଥିବା ବେଳେ ପଡୁଛନ୍ତି ଶିଶୁ ବାଟିକା ରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ।ଶିକ୍ଷକ ଅଛନ୍ତି ମାତ୍ର ୩ଜଣ ।ତେବେ ୯ଟି ଶ୍ରେଣୀର ଛାତ୍ରଛାତ୍ରୀଙ୍କୁ ୩ଜଣ ଶିକ୍ଷକ କେମିତି ପାଠ ପଢ଼ାଉ ଥିବେ ତାହା ସହଜେ ଅନୁମେୟ ।ଏକାଥରକେ ୩ଟି କ୍ଲାସରେ ୩ଜଣ ଶିକ୍ଷକ ପାଠ ପଡ଼ାଉ ଥିବା ବେଳେ ବାକି ୬ଟି ଶ୍ରେଣୀର ଛାତ୍ରଛାତ୍ରୀ ମାନଙ୍କୁ ପଡ଼ିବା ପାଇଁ ଅପେକ୍ଷା କରିବାକୁ ପଡୁଥିବା ଦେଖିବାକୁ ମିଳିଛି।ଅନ୍ୟ ପକ୍ଷରେ ଏହି ପରିସର ଭିତରେ ପୁଣି ୨ଗୋଟି ଅଙ୍ଗନୱାଡ଼ି କେନ୍ଦ୍ର ରହିଛି ।ପରିସର ଭିତରେ ଥିବା ନଳକୂପ ଟି ଦୀର୍ଘ ଦିନ ହେଲା ଅଚଳ ହୋଇ ପଡ଼ିଥିବାରୁ ପାଣି ଟିକେ ପାଇଁ ଛାତ୍ରଛାତ୍ରୀ ମାନେ ଗୁଲୁଗୁଲା ହେଉଛନ୍ତି।ମଧ୍ୟାହ୍ନ ଭୋଜନ ଖାଇ ସାରିବା ପରେ ପାଣି ପାଇଁ ଅନ୍ୟ ସ୍ଥାନକୁ ଯିବାକୁ ବାଧ୍ୟ ହେଉଛନ୍ତି ।ସେହିପରି ସ୍କୁଲ ଶୌଚାଳୟ ଗୁଡ଼ିକ ଅପରିତକ୍ତ ଅବସ୍ଥାରେ ଥିବାରୁ ତାହା କାମରେ ଆସୁନାହିଁ।ଫଳରେ ଛାତ୍ରଛାତ୍ରୀ ମାନେ ଶୌଚ,ପରିସ୍ରା ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ନଳକୂପର ମଟର ମରାମତି ପାଇଁ ଅଭିଯୋଗ କରାଯାଇଥିଲେ ହେଁ ଅଦ୍ୟାବଧି ତାହା ସଜଡ଼ା ହୋଇନାହିଁ ।ଛାତ୍ରଛାତ୍ରୀଙ୍କ ଭବିଷ୍ୟତ ଗଠନ ଦିଗରେ ଶିକ୍ଷାର ଉନ୍ନତି ପାଇଁ ସରକାର ପର୍ଯ୍ୟାପ୍ତ ପରିମାଣରେ ଅନୁଦାନ ଯୋଗାଇ ଦେଉଛନ୍ତି ହେଲେ ଏହି ୬୫ବର୍ଷର ପୁରୁଣା ସ୍କୁଲର ସମସ୍ୟା ପ୍ରତି କେହି ଦୃଷ୍ଟି ଦେଉନଥିବାରୁ ସ୍କୁଲର ଅବସ୍ଥା ଦିନକୁ ଦିନ ଶୋଚନୀୟ ହେବାରେ ଲାଗିଛି।ତେବେ ଏ ସମ୍ପର୍କରେ ବିନିକା ଗୋଷ୍ଟି ଶିକ୍ଷା ଅଧିକାରୀଙ୍କ ପଚାରିବା ପାଇଁ ଅଫିସକୁ ଯାଇଥିଲେ ହେଁ ତାଙ୍କ ଚେମ୍ଭର ରେ ତାଲା ଝୁଲୁଥିବା ଦେଖିବାକୁ ମିଳିଥିଲା।ସେହିପରି ସ୍ଥାନୀୟ ବିଡ଼ିଓଙ୍କୁ ଯୋଗାଯୋଗ କରିବାରୁ ସ୍କୁଲରେ ରହିଥିବା ପାନୀୟ ଜଳ ସମସ୍ୟାର ସମାଧାନ ତୁରନ୍ତ କରାଯିବ ବୋଲି ପ୍ରକାଶ କରିଥିଲେ।