18-Nov-2025

କଣ୍ଟାମାଳ(ଜୟ କୁମାର ମହାରଣା): ସରକାର ଛାତ୍ରଛାତ୍ରୀ ମାନଙ୍କ ଶିକ୍ଷା ପାଇଁ କୋଟିକୋଟି ଟଙ୍କା ବ୍ୟୟ କରୁଥିବା ବେଳେ ଶିକ୍ଷା ବିଭାଗ ଏବଂ ପ୍ରଶାସନର ଅବହେଳା ମନୋଭାବ ଯୋଗୁଁ ଆଜି ପର୍ଯ୍ୟନ୍ତ କଣ୍ଟାମାଳ ବ୍ଳକ ଆମ୍ବଗାଁ ସରକାରୀ ପ୍ରାଥମିକ ବିଦ୍ୟାଳୟର ନିଜସ୍ୱ ନାମରେ ଜମି ନାହିଁ l ଫଳରେ ବେସରକାରୀ ଜମିରେ ସ୍ଥାପିତ ହୋଇଥିବା ବିଦ୍ୟାଳୟକୁ ନେଇ ସମସ୍ୟା ଦେଖା ଦେଇଛି  l କଣ୍ଟାମାଳ ତହସିଲ ଅଧୀନରେ ଥିବା ଖାତା ନଂ. ୬୭ ପ୍ଲଟ ନଂ. ୮୨୪ ରେ ଥିବା ୧୩ଡ଼ିସିମିଲ ଘରବାରି ଜାଗାରେ ୧୮୮୫ ମସିହାରେ ଆମ୍ବାଗାଁ ସରକାରୀ ପ୍ରାଥମିକ ବିଦ୍ୟାଳୟ ସ୍ଥାପିତ ହୋଇଛି l ଯେଉଁ ଜମି ମାଲିକାନା ଆମ୍ବଗାଁ ଗ୍ରାମର ଧନପତି ଗଣ୍ଡା ନାମରେ ରହିଛି l ସୂଚନାଯୋଗ୍ୟ ଯେ ସେ ସମୟରେ ବିଦ୍ୟାଳୟ ନିର୍ମାଣ ପାଇଁ ଜମି ଦାନ ସୂତ୍ରରେ ଦେଇ ଏକ ଚୁକ୍ତିନାମା ଲେଖି ଦେଇଥିଲେ l କିନ୍ତୁ ଦୀର୍ଘ ବର୍ଷ ପରେ ମଧ୍ୟ ଆଜି ପର୍ଯ୍ୟନ୍ତ ଜମିର ମାଲିକାନା ଅପରିବର୍ତ୍ତିତ ରହିଛି l ଫଳରେ ତାଙ୍କ ବଂଶଧର ମାନେ ସରକାରଙ୍କୁ ଖଜଣା ପୈଠ କରୁଛନ୍ତି l ସୋମବାର ସନ୍ଧ୍ୟାରେ କୌଣସି କାରଣକୁ ନେଇ ତାଙ୍କ ପରିବାର ଲୋକେ ସ୍କୁଲ ଗେଟରେ ତାଲା ପକାଇବା ଯୋଗୁଁ ଆଜି ବିଦ୍ୟାଳୟର ଛାତ୍ରଛାତ୍ରୀ ଓ ଅଭିଭାବକ ଅସନ୍ତୋଷ ପ୍ରକାଶ କରି ୪୧ ନଂବର ରାଜ୍ୟ ରାଜପଥ ଅବରୋଧ କରିବା ସହିତ ଅନଶନରେ ବସିଥିଲେ l ଫଳରେ ଯାତାୟାତ ବାଧାପ୍ରାପ୍ତ ହେବା ସହ ରାସ୍ତାର ଉଭୟ ପାର୍ଶ୍ୱରେ ଗାଡ଼ିମଟର ଅଟକି ରହିଥିଲା l ଅପରାହ୍ନ ୧ଟା ସମୟରେ କଣ୍ଟାମାଳ ବିଇଓ ଅଶୋଭ ରଞ୍ଜନ ମାଳି  ଓ ଘଣ୍ଟାପଡା ପୋଲିସ ଘଟଣା ସ୍ଥଳରେ ପହଞ୍ଚି ଅନଶନକାରୀଙ୍କ ସହିତ ଆଲୋଚନା କରିଥିଲେ l ସ୍ଥାୟୀ ସମାଧାନ ପାଇଁ ବିଦ୍ୟାଳୟ ପରିଚାଳନା କମିଟି ଏବଂ ଗ୍ରାମବାସୀ ଅଡି ବସିଥିଲେ l ତହସିଲଦାର, ଜିଲ୍ଲା ଶିକ୍ଷାଧିକାରୀ ଏବଂ ଜିଲ୍ଲାପାଳଙ୍କୁ ଉକ୍ତ ସମସ୍ୟା ଜଣାଇବା ସହିତ ଏହାର ସ୍ଥାୟୀ ସମାଧାନ ପାଇଁ ବ୍ୟବସ୍ଥା କରିବୁ ବୋଲି ବିଇଓ ଶ୍ରୀ ମାଳି ପ୍ରତିକ୍ରିୟା ଦେଇଛନ୍ତି l ୪ଟା ପରେ ଅନଶନ ଭଙ୍ଗ ହେବାରୁ ଯାତାୟତ ସ୍ୱାଭାବିକ ହୋଇଥିଲା l ଅନ୍ୟ ପକ୍ଷରେ ଧନପତି ଗଣ୍ଡାଙ୍କ ପୁଅ ଜଗଲ ବିଭାର ପୁତ୍ରବୋହୂ କକେୟା ବିଭାର, ନାତି ରହିତ ବିଭାର ଏବଂ ତାଙ୍କ ପରିବାର ଲୋକ କହିଛନ୍ତି ଯେ ଆମେ ଜମିହୀନ ପରିବାର ହୋଇଥିବାରୁ କିଛି ସରକାରୀ ଜମି ଦଖଲ କରିଥିଲୁ କିନ୍ତୁ ସୋସାଇଟି କାର୍ଯ୍ୟାଳୟ ନିର୍ମାଣ ପାଇଁ ଉଛେଦ କରାଗଲା ଆମେ କେମିତି ଚାଲିବୁ l ତେଣୁ ଆମ ଜମିରେ ବିଦ୍ୟାଳୟ ନିର୍ମାଣ ହୋଇଥିବାରୁ ଆମକୁ ଫେରାଇ ଦେବାକୁ ଅନୁରୋଧ କରୁଛୁ ବୋଲି କହିଛନ୍ତି l