03-Nov-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାର ଦେଓଗାଁ ଠାରେ ଏକ ପୂର୍ବଗଣ୍ଡଗୋଳ ଘଟଣାକୁ ନେଇ ଜଣେ ଅଭିଯୁକ୍ତର ଘରେ ଓ ଦୋକାନରେ ନିଆଁଲଗାଇ ପୋଡିଦେବାର ଉଦ୍ୟମ ହୋଇଛି। ଏହି ଘଟଣାରେ ଦେଓଗାଁଥାନାରେ ଏକ ମାମଲା ରୁଜୁ କରାଯାଇ ୧୨ଜଣ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରାଯାଇଛି। ମୁଖ୍ୟ ଅଭିଯୁକ୍ତ ଫେରାର ରହିଛି।
  ମିଳିଥିବା ତଥ୍ୟରୁ ଜଣାଯାଇଛି ଯେ,ଗତ କିଛିଦିନ ତଳେ ଦେଓଗାଁରେ ରହୁଥିବା ଜଣେ ଭିନ୍ନସଂପ୍ରଦାୟର ଯୁବକ ବଲାଙ୍ଗୀର ସହର ସହିତ ଅନ୍ୟଗ୍ରାମର କିଛି ଅପରାଧି ଗୋଷ୍ଠୀଙ୍କୁ ଡକାଇ ଆତଙ୍କରାଜ ଚଳାଇଥିଲା। ଅପରାଧି ଗୋଷ୍ଠୀ ଖୋଲାଖୋଲି ମାରଣାସ୍ତ୍ର ଧରି ଦେଓଗାଁର ସାହୁପଡା ରେ ଆତଙ୍କରାଜ ଖେଳାଇଥିଲେ। ଏହାକୁ ପ୍ରତିବାଦ କରି ଦେଓଗାଁରେ ଉତ୍ତେଜନା ପ୍ରକାଶ ପାଇଥିଲା ଓ ସ୍ଥାନୀୟଲୋକେ ଥାନା ଘେରାଉ କରି ଅଭିଯୁକ୍ତମାନଙ୍କ ଗିରଫ ଦାବି କରିଥିଲେ । ସେହି ଘଟଣାରେ ଦେଓଗାଁରେ ରହୁଥିବା ଭିନ୍ନ ସଂପ୍ରଦାୟର ମୁଖ୍ୟଅଭିଯୁକ୍ତ ସାନାଉଲ୍ଲା ଖାଁ ସମେତ ୫ଜଣ ଯୁବକ ଗିରଫ ହୋଇ ଜେଲ ଯାଇଥିଲେ। ସେମାନେ କୋର୍ଟରୁ ଜାମିନରେ ଆସିବା ପରେ ରବିବାର ଦିନ ଗାଁରେ ଏକ ବୈଠକ ବସିଥିଲା। ବୈଠକରେ ଆଲୋଚନା ଚାଲିଥିବା ବେଳେ ହଠାତ ପ୍ରତିଶୋଧ ପରାୟଣ ହୋଇ ୪୦ରୁ ୫୦ଜଣ ଉତ୍ୟକ୍ତ ଲୋକ ସ୍ଥାନୀୟ ଜଣେ ବ୍ୟକ୍ତିର ପ୍ରରୋଚନାରେ ସାନାଉଲ୍ଲା ଖାଁର ଘରକୁ ପଶି ଘରେ ଓ ଦୋକାନରେ ନିଆଁ ଲଗାଇ ଆତଙ୍କ ଖେଳାଇ ଦେଇଥିଲେ। ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଥିଲା। ଫଳରେ ଘରେ ଥିବା ସାନାଉଲ୍ଲା ଖାଁର ପରିବାର ବର୍ଗ ଜୀଅନ୍ତା ଜଳିଯିବାର ଆଶଂକା ଥିଲା। ଦେଓଗାଁ ପୋଲିସ ପହଞ୍ଚି ସାନାଉଲ୍ଲା ଖାଁର ପରିବାରବର୍ଗଙ୍କୁ ଉଦ୍ଧାର କରିଥିଲେ। ତେବେ ପୋଲିସ ପହଞ୍ଚିଲା ବେଳେ ନିଆଁ ଲଗାଇଥିବା ଯୁବକ ମାନେ ପୋଲିସକୁ ମଧ୍ୟ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ଦେଓଗାଁ ଆଇଆଇସି ବୁଲୁ ମୁଣ୍ଡା ସଦଳବଳେ କୌଣସି ପ୍ରକାରେ ପରିସ୍ଥିତିକୁ ଆୟତ୍ତ କରିଥିଲେ। ଦେଓଗାଁ ଅଗ୍ନୀଶମ ବାହିନୀ ପହଞ୍ଚି ନିଆଁକୁ ଲିଭାଇଥିଲେ। ଦେଓଗାଁ ଥାନାରେ ଏନେଇ ସାନାଉଲ୍ଲା ଖାଁର ଅଭିଯୋଗ କ୍ରମେ ଏକ ମାମଲା ରୁଜୁ କରାଯାଇ ପୋଲିସ ତଦନ୍ତ କରି ଦେଓଗାଁର ୧୨ ଜଣ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି। ତେବେ ଏହି ଘଟଣାକୁ ନେଇ ଆଗକୁ ଯେଭଳି କିଛି ଅଘଟଣ ନଘଟେ ସେନେଇ ପୋଲିସ ସତର୍କ ରହିଛି ବୋଲି ସଦର ଏସଡିପିଓ ସରୋଜ ଉପାଧ୍ୟାୟ ଆମ ପ୍ରତିନିଧିଙ୍କୁ ସୂଚନା ଦେଇଛନ୍ତି। ତେବେ ଗୁରୁତ୍ୱପୂର୍ଣ୍ଣ କଥା ହେଲା ପୂର୍ବରୁ ୨୦୦୮ ମସିହାରେ ସେହି ଦେଓଗାଁଥାନା ଅନ୍ତର୍ଗତ ମୁରସିଂ ଗ୍ରାମରେ ଥିବା ଏକ ଚର୍ଚ୍ଚରେ ନିଆଁ ଲଗାଇ ଦଙ୍ଗା ସୃଷ୍ଟିକରିଥିବା ଅଭିଯୁକ୍ତ ଏହି ଘଟଣାରେ ମଧ୍ୟ ମୁଖ୍ୟ ଅଭିଯୁକ୍ତ ରହିଛି ଓ ସେ ଫେରାର ରହିଛି। ତେଣୁ ଏହି ଘଟଣାକୁ ନେଇ ଅଞ୍ଚଳରେ ଭୟର ବାତାବରଣ ରହିଛି। ଗିରଫ ଅଭିଯୁକ୍ତଙ୍କ ମଧ୍ୟରେ ଟୁନା ଦଳେଇ, ସିତାରାମ ସାହୁ, ରାଜେଶ ଅଗ୍ରୱାଲ, ରାମଚନ୍ଦ୍ର ସାହୁ, ସୁଶାନ୍ତ ମେହେର, ଜିତୁନ ଠେଲା, ଅମର ନନ୍ଦ, ଲବ ସାହୁ, କୁଶ ସାହୁ, ଲିଲୁ ବାରିକ, ରାଜୁ ସାହୁ, ଉମେଶ ସାହୁ ପ୍ରମୁଖ ରହିଛନ୍ତି । ଏମାନଙ୍କ ନାମରେ ଦେଓଗାଁ ଥାନାରେ କେସ ନମ୍ବର- ୩୬୧/ ୨୫, ଦଫା- ୬୧(୨)/୧୯୧(୨)/୧୯୧(୩)/୨୯୬(୩)/୨୯୬/ ୩୫୧(୨)/୧୦୯(ଏଫ)୩୨୬(ଜି)/୧୯୦ ବିଏନଏସ/୭ କ୍ରିମିନାଲ ଲ ଏମେଣ୍ଡମେଣ୍ଟ ଏକ୍ଟରେ ମାମଲା ରୁଜୁ ହୋଇଥିବା ପୋଲିସ ସୂତ୍ରରୁ ଜଣାପଡିଛି ।