05-Sep-2025

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ)
ସୁବର୍ଣ୍ଣପୁର ଜିଲ୍ଲା ସଦର କୋଶଳ ଉଚ୍ଚ ବିଦ୍ୟାଳୟରେ ଏକ ଅଭିନବ ଭାବରେ ଗୁରୁପୂଜନ ଉତ୍ସବ ପାଳିତ ହୋଇଯାଇଛି | ପାଖାପାଖି 6 ଟି ଜିଲ୍ଲାରୁ ସୁନାମଧନ୍ୟ ପ୍ରାୟ 15 ଜଣ ଅବସରପ୍ରାପ୍ତ ଓ କର୍ମରତ ଶିକ୍ଷକମାନଙ୍କୁ କୋଶଳ ଉଚ୍ଚ ବିଦ୍ୟାଳୟ ତରଫରୁ ନିଆରା ଢଙ୍ଗରେ ପୂଜନ କରାଯାଇ ଶ୍ରେଷ୍ଠ ଗୁରୁ ସମ୍ମାନ -2025 ରେ ସମ୍ମାନିତ କରାଯାଇଥିଲା | ଏହି ଅବସରରେ ସୁବର୍ଣ୍ଣପୁର ଜିଲ୍ଲାର ଆରକ୍ଷୀ ଅଧିକ୍ଷକ ଶ୍ରୀଯୁକ୍ତ ନାରାୟଣ ନାୟକ ମୁଖ୍ୟ ଅତିଥି ଭାବରେ ଯୋଗଦେଇଥିବା ବେଳେ ସ୍ୱତନ୍ତ୍ର ଅତିଥି ଭାବରେ ଅତିରିକ୍ତ ଜିଲ୍ଲାପାଳ ଶ୍ରୀଯୁକ୍ତ ରାଜେନ୍ଦ୍ର ମାଝୀ ଓ ଉପ-ଜିଲ୍ଲାପାଳ ଡ଼. ସୌମ୍ୟରୂପା ରଥ ଯୋଗ ଦେଇ ଗୁରୁଦିବସ ତାତ୍ପର୍ଯ୍ୟ କହିବା ସାଙ୍ଗେ ଗୁରୁଙ୍କ ପରି ଜଣେ ମହାନ ସଂସ୍କାରକ ଓ ସୁମାନବ ହେବାକୁ ଭାଷଣ ମାଧ୍ୟମରେ କହିଥିଲେ | ସମ୍ମାନିତ ଅତିଥି ଭାବରେ ଅବସର ପ୍ରାପ୍ତ ଶାରୀରିକ ଶିକ୍ଷା ନିରୀକ୍ଷକ ଶ୍ରୀଯୁକ୍ତ ଦୁର୍ୟୋଧନ ରାଉତ ଓ ବିଦ୍ୟାଳୟ ଗଠନର ପ୍ରାଣ ପ୍ରତିଷ୍ଠାତା ଓ ଅବସର ପ୍ରାପ୍ତ ପ୍ରଧାନ ଆଚାର୍ଯ୍ୟ ଶ୍ରୀଯୁକ୍ତ ଶ୍ୟାମସୁନ୍ଦର ମହାପାତ୍ର ପ୍ରମୁଖ ଯୋଗଦେଇ ଉତ୍ତମ ମାନବ ହେବାର ଦିଶା ଉପରେ ପରାମର୍ଶ ଦେଇଥିଲେ | ବିଦ୍ୟାଳୟର ପ୍ରଧାନ ଆଚାର୍ଯ୍ୟ ଶ୍ରୀଯୁକ୍ତ ପରମା ନାଏକ ସମସ୍ତଙ୍କ ଉଦ୍ଧେଶ୍ୟରେ ସ୍ୱାଗତ ଅଭିଭାଷଣ ଓ ଅତିଥି ପରିଚୟ ରଖିବା ସହିତ ଗୁରୁପୂଜନ ଦିବସର ଉଦ୍ଧେଶ୍ୟ ଉପସ୍ଥାପନା କରିଥିଲେ | ବିଦ୍ୟାଳୟ ସମ୍ପାଦକ ଶ୍ରୀଯୁକ୍ତ ସଞ୍ଜୟ କୁମାର ସାହୁ  ଧନ୍ୟବାଦ ଅର୍ପଣ କରିଥିବା ବେଳେ ସହ ପ୍ରଧାନ ଆଚାର୍ଯ୍ୟା ସୁଶ୍ରୀ ସ୍ମିତାରାଣୀ ନାୟକ ମଞ୍ଚ ପରିଚାଳନା କରିଥିଲେ | ବିଦ୍ୟାଳୟର ଦୀପ୍ତି ପାଲିଆ, ଗୌରୀ ବଗର୍ତି, ନମିତା କୁମାର, ରୁପା ପଧାନ, ଶ୍ରୀତମ ସାମଲ, ମମତା ମନହିରା, ପ୍ରତିଭା ନାଏକ, ମୌସୁମୀ ସ୍ୱାଇଁ, ରମିଲା ସାହୁ, ଅନନ୍ୟା ପଧାନ ତଥା ସମସ୍ତ ଛାତ୍ରଛାତ୍ରୀ କାର୍ଯ୍ୟ କ୍ରମ ରେ ସହଯୋଗ କରିଥିଲେ |