20-Jul-2025

ଶିଳ୍ପ ପ୍ରତିଷ୍ଠା ନେଇ ପଲ୍ଲୀସଭା ଚାଲିଥିଲା l ତେବେ ପ୍ରଶାସନ ମତାମତ ସଂଗ୍ରହ କରି ଫଳାଫଳ ନ ଜଣାଇବାରୁ ସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା l ପରେ ଗ୍ରାମବାସୀ ବ୍ଲକ ଘେରାଉ କରିଥିଲେ l ତେବେ ଏହି ସମୟରେ ପୁଲିସ ସେମାନଙ୍କ ଉପରେ ଲାଠି ଚାଳନା କରିଥିବା ଜଣାପଡିଛି l ସୂଚନା ଅନୁଯାୟୀ,ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ରେ ରୁଙ୍ଗଟା ଶିଳ୍ପ ପ୍ରତିଷ୍ଠା ହେବା ନେଇ ପୁରୁଣାପାଣି ପଞ୍ଚାୟତ କଣ୍ଟାବଣି ସ୍କୁଲ

ପଡିଆ ଠାରେ ସ୍ବତନ୍ତ୍ର ପଲ୍ଲୀସଭା ହୋଇଥିଲା l ଯେଉଁଥିରେ ପ୍ରଭାବିତ ହେବାକୁ ଥିବା ଗ୍ରାମର ଲୋକ ଯୋଗ ଦେଇଥିଲେ l ରାଇରଙ୍ଗପୁର ଗୋଷ୍ଠୀ ଉନ୍ନୟନ ଅଧିକାରୀ ଧନାଇ ଚରଣ ଟୁଡୁଙ୍କ ଅଧ୍ଯକ୍ଷତାରେ ଦିନ ୧୦ଟା ବେଳେ ପଲ୍ଲୀସଭା ଆରମ୍ଭ ହୋଇଥିଲା l ପ୍ରଶାସନ ପକ୍ଷରୁ ହାତ ଉଠାଇ ଶିଳ୍ପ ସପକ୍ଷରେ  ଓ ବିପକ୍ଷରେ ମତ ଲୋଡାଯାଇଥିଲା l ତେବେ ସ୍ପଷ୍ଟ ନ ହେବାରୁ ଦସ୍ତଖତ ମାଧ୍ଯମରେ ମତାମତ ସଂଗ୍ରହ କରାଯାଇ ଥିଲା l ବିପକ୍ଷ ମତ ଅଧିକ ଆସୁଥିବା ଦେଖି ବିଡିଓ କୁଆଡେ ପଲ୍ଲୀସଭାରୁ ଦସ୍ତଖତ ଖାତା ନେଇ ଚାଲିଯିବା ଉଦ୍ଯମ କରିଥିଲେ l ହେଲେ ତାଙ୍କୁ ଛଡାଯାଇ ନଥିଲା ଏବଂ ପୁଣି ମତାମତ ସଂଗ୍ରହ ହୋଇଥିଲା l ପ୍ରାୟ ୬ ଘଣ୍ଟା ଧରି ଏହି ପ୍ରକ୍ରିଆ ଚାଲିଥିବା ବେଳେ ତେବେ ଅଧିକାରୀମାନେ ଫଳାଫଳ ନ ଜଣାଇ ବ୍ଲକ କାର୍ଯ୍ଯାଳୟ ଚାଲିଯାଇଥିଲେ l ଫଳରେ ଉତ୍ତ୍ଯକ୍ତ ଗ୍ରାମବାସୀ ବ୍ଲକ ଘେରାଉ କରିଥିଲେ ଏବଂ ଫଳାଫଳ

ଜାଣିବା ପାଇଁ ଅଡିବସିଥିଲେ l ସଂନ୍ଧ୍ଯା ୭ଟା ବେଳେ ଉତ୍ତେଜନା ବଢିଥିଲା l ସ୍ଥିତି ନିୟନ୍ତ୍ରଣ ପାଇଁ ୮ ଟା ବେଳେ ପୁଲିସ ଲାଠି ଚାଳନା କରିଥିଲେ l ବିଦ୍ଯୁତ୍ କାଟ ହୋଇଥିଲେ ବି ପୁଲିସ ଗୋଡାଇ ଗୋଡାଇ ପିଟିଥିଲେ l ପୁଲିସ ମାଡରୁ ଗଣମାଧ୍ଯମ ପ୍ରତିନିଧୁ ମଧ୍ଯ ବାଦ୍ ପଡି ନଥିଲେ l ସ୍ଥିତି ନିୟନ୍ତ୍ରଣ ପାଇଁ ରାଇରଙ୍ଗପୁର ଅତିରିକ୍ତ ଏସପି ଯଦୁନାଥ ଜେନା, ଏସଡିପିଓ ଗୋକୁଳାନନ୍ଦ ସାହୁ, ରାଇରଙ୍ଗପୁର ଆଇଆଇସି ଜ୍ଯୋତି ପ୍ରକାଶ ସ୍ବାଇଁ ପ୍ରମୁଖଙ୍କ ସହ ୪ ପ୍ଲାଟୁନ ପୁଲିସ ଫୋର୍ସ ବ୍ଲକ କାର୍ଯ୍ଯାଳୟ ରେ ମୁତୟନ ଥିଲେ l

ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଶ୍ଯାମନେନ୍ଦୁ ପରିଡାଙ୍କ ରିପୋର୍ଟ