20-Jul-2025

ସମ୍ବଲପୁର (ସଂଜୀବ ପାଣିଗ୍ରାହୀ)
ସମ୍ବଲପୁରର ସାମ୍ବାଦିକ ନବୀନ ଦାଶ ଏକ ସଡ଼କ ଦୁର୍ଘଟଣାର ଶିକାର ହୋଇଛନ୍ତି । ନବୀନ ଓ ତାଙ୍କ ପତ୍ନୀ ନିରୁପମା ଶନିବାର ଜମନକିରା ଥାନା ଅନ୍ତର୍ଗତ ମୁକ୍ତେଶ୍ଵର ମନ୍ଦିରକୁ ଦର୍ଶନ ନିମନ୍ତେ ଏକ ବାଇକରେ ଯାଇଥିଲେ। ଅପରାହ୍ନ ୫ଟା ସମୟରେ ସେମାନେ ସମ୍ବଲପୁରକୁ ଫେରୁଥିବାବେଳେ ଗୌଡ଼ପାଲି ଛକ ନିକଟରେ ସମ୍ମୁଖରୁ ଆସୁଥିବା ଏକ ଦ୍ରୁତଗାମୀ ବାଇକ ସେମାନଙ୍କୁ ଜୋରରେ ଧକ୍କା ଦେଇଥିଲା। ଫଳରେ ଶ୍ରୀ ଦାଶ ଓ ପତ୍ନୀ ଜାତୀୟ ରାଜପଥ ଉପରେ ଛିଟକି ପଡ଼ିଥିଲେ। ଦୁର୍ଘଟଣା ଯୋଗୁଁ ସାମ୍ବାଦିକ ଶ୍ରୀ ଦାଶଙ୍କ ମୁଣ୍ଡ ଓ ଗୋଡ଼ରେ ଗଭୀର ଆଘାତ ଲାଗିଛି ଏବଂ ତାଙ୍କର ପତ୍ନୀ ମଧ୍ୟ ଆହତ ହୋଇଛନ୍ତି। ଅପରପକ୍ଷରେ ଦୁର୍ଘଟଣା ଘଟାଇଥିବା ଅନ୍ୟ ବାଇକରେ ଥ‌ିବା ୨ ଆରୋହୀ ମଧ୍ୟ ଆହତ ହୋଇଛନ୍ତି। ତେବେ ଉକ୍ତ ଗାଡ଼ିର ଚାଳକ ଗୁରୁତର ଆହତ ହୋଇଥିବା ବେଳେ ଅନ୍ୟ ଜଣକ ସାମାନ୍ୟ ଆହତ ହୋଇଛନ୍ତି । ଖବରପାଇ ଗୌରପାଲି ଫାଣ୍ଡି ପୁଲିସ ଘଟଣାସ୍ଥଳକୁ ପହଞ୍ଚି ତୁରନ୍ତ ସାମ୍ବାଦିକ ଶ୍ରୀ ଦାଶ, ତାଙ୍କର ପତ୍ନୀ ଓ ଆହତ ଅନ୍ୟ ବାଇକ ଚାଳକଙ୍କୁ ସ୍ଥାନୀୟ ଲୋକଙ୍କ ସହାୟତାରେ ଉଦ୍ଧାର କରି ବୁର୍ଲା ଭିମସାରକୁ ସ୍ଥାନାନ୍ତର କରିଥିଲେ। ଖବର ଲେଖାଯିବା ପର୍ଯ୍ୟନ୍ତ ଶ୍ରୀ ଦାଶଙ୍କ ଅବସ୍ଥା ସଙ୍କଟାପନ୍ନ ରହିଥ‌ିବାର ଜଣାପଡ଼ିଛି। ଅନ୍ୟ ପଟରେ ପୁଲିସ ୨ ବାଇକକୁ ଜବତ କରି ଘଟଣାର ତଦନ୍ତ ଆରମ୍ଭ କରିଥିବା ବେଳେ ଦୁର୍ଘଟଣା ଘଟାଇଥିବା ବାଇକ ଚାଳକର ପରିଚୟ ମଧ୍ୟ ଖୋଜୁଛି ।