08-Jul-2025

ଭୁବନେଶ୍ୱର(ପ୍ରେରଣା ଖବର): ସ୍ଥାନୀୟ ସଂସ୍କୃତି ଭବନ ସଭାଗୃହରେ କେନ୍ଦ୍ର ସାହିତ୍ୟ ଅକାଦେମି ଏବଂ ଓଡ଼ିଶା ସାହିତ୍ୟ ଏକାଡେମୀର ମିଳିତ ଆନୁକୂଲ୍ୟରେ ଆୟୋଜିତ ଅତିବଡ଼ୀ ଜଗନ୍ନାଥ ଦାସ ଜାତୀୟ ଆଲୋଚନାଚକ୍ର ଆଜି ଉଦ୍ଯାପିତ ହୋଇଯାଇଛି। ଆଜିର ପ୍ରଥମ ଆଲୋଚନାଚକ୍ରରେ ପ୍ରଫେସର ବ୍ରଜକିଶୋର ସ୍ୱାଇଁ ସଭାପତିତ୍ୱ କରିଥିଲେ। ଏଥିରେ ଗୌହାଟୀ ବିଶ୍ୱବିଦ୍ୟାଳୟର ପ୍ରଫେସର ଜ୍ୟୋତ୍ସ୍ନା ବିଶ୍ୱାଳ ରାଉତ ଆସାମର ଶ୍ରୀମନ୍ତ ଶଙ୍କରଦେବଙ୍କ ଦ୍ୱାରା ଆରମ୍ଭ ହୋଇଥିବା ନାମଘର ଓ ଭାଗବତ ଟୁଙ୍ଗୀର ତୁଳନାତ୍ମକ ଚିତ୍ର ପ୍ରଦାନ କରିଥିଲେ। ସେହିପରି ଯୁବ ଗବେଷିକା ଶ୍ରେୟା ହାଲଦାର ତାଙ୍କ ପ୍ରବନ୍ଧରେ ବଙ୍ଗଳା ଭାଗବତ ଓ ଓଡ଼ିଆ ଭାଗବତର ତୁଳନା କରିଥିଲେ। ଅନ୍ୟତମ ଆଲୋଚକ ଡକ୍ଟର ରବୀନ୍ଦ୍ରନାଥ ମିଶ୍ର ‘ଜଗନ୍ନାଥ ଦାସ ଓ କବୀରଙ୍କ ବ୍ରହ୍ମ ଚେତନା’ ଶୀର୍ଷକ ପ୍ରବନ୍ଧ ପାଠ କରିଥିଲେ। ଏହି ଅଧିବେଶନରେ ଓଡ଼ିଶା ସାହିତ୍ୟ ଏକାଡେମୀର ସଚିବ ଡକ୍ଟର ଚନ୍ଦ୍ରଶେଖର ହୋତା ସ୍ୱାଗତ ଭାଷଣ ପ୍ରଦାନ ପୂର୍ବକ ଅତିବଡ଼ୀ ଜଗନ୍ନାଥ ଦାସଙ୍କ ଭାଗବତର ବୈଶିଷ୍ଟ୍ୟ ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ। 
ଆଲୋଚନାଚକ୍ରର ଅନ୍ତିମ ଅଧିବେଶନରେ ସଭାପତିତ୍ୱ କରିଥିଲେ ବିଶିଷ୍ଟ ସମାଲୋଚକ ଡକ୍ଟର ବାବାଜୀ ଚରଣ ପଟ୍ଟନାୟକ। ସେ ଓଡ଼ିଆ ଭାଗବତ ପ୍ରକାଶନ ତଥା ଏହାର ବିଭିନ୍ନ ଦିଗ ସମ୍ପର୍କରେ ଆଲୋକପାତ କରିଥିଲେ। ଡକ୍ଟର

କୈଳାସ ଚନ୍ଦ୍ର ଚିକାୟତରାୟ ନିଜ ପ୍ରବନ୍ଧ ପାଠ କରି ଜଗନ୍ନାଥ ଦାସଙ୍କ ବିଭିନ୍ନ କୃତିର ତାତ୍ତ୍ୱିକ ଆଲୋଚନା କରିଥିଲେ। ଡକ୍ଟର ସୁରେନ୍ଦ୍ର କୁମାର ମିଶ୍ର ଓଡ଼ିଆ ଭାଗବତର ଆବେଗ ସମ୍ପର୍କରେ ମାର୍ମିକ ବକ୍ତବ୍ୟ ପ୍ରଦାନ କରିଥିଲେ। ଅଧ୍ୟାପକ ଶୁଭ୍ରାଂଶୁ କୁମାର ବେହେରାଙ୍କ ଦ୍ୱାରା ଉପସ୍ଥାପିତ ପ୍ରବନ୍ଧର ଶୀର୍ଷକ ଥିଲା ‘ଭକ୍ତି, ସିଦ୍ଧି ଓ ବିଶ୍ୱାସର ସାଧକ ଅତିବଡ଼ୀ ଜଗନ୍ନାଥ ଦାସ, ସାଧନା ଭାଗବତ।’ 
ଏହି ଅବସରରେ ଡକ୍ଟର ସୁରେନ୍ଦ୍ର ମିଶ୍ରଙ୍କର ରଚିତ ତଥା ଗବେଷିକା ଶ୍ରେୟା ହାଲଦାରଙ୍କ ଦ୍ୱାରା ବଙ୍ଗଳାକୁ ଅନୂଦିତ ପୁସ୍ତକ ‘ଶ୍ରୀ ଜଗନ୍ନାଥ ଚେତନା; ସଂହତିର ସ୍ୱରଲିପି’ର ବଙ୍ଗଳା ଅନୁବାଦ ଉନ୍ମୋଚିତ ହୋଇଥିଲା। ସଭା ସଂଯୋଜନା ସହିତ ଧନ୍ୟବାଦ ଅର୍ପଣ କରିଥିଲେ ସାହିତ୍ୟ ଅକାଦେମି କୋଲକାତା କାର୍ଯ୍ୟାଳୟର ଭାରପ୍ରାପ୍ତ ଅଧିକାରୀ କ୍ଷେତ୍ରବାସୀ ନାଏକ।