03-Jun-2025

ବରଗଡ଼:(ନିରଞ୍ଜନ ତ୍ରିପାଠୀ)-ଚଳିତ ବର୍ଷ ଠିକ ଡାଳୁଅ ଧାନ ଅମଳ ସମୟରେ ମେ' ମାସ ଶେଷ ସପ୍ତାହରେ ଆଗତୁରା ମୌସୁମୀ ସକ୍ରିୟ ଜନିତ ଅଦିନିଆଁ ବର୍ଷା କାରଣରୁ ପଶ୍ଚିମ ଓଡିଶା ର ବିଭିନ୍ନ ଜିଲ୍ଲାରେ ଚାଷୀମାନେ ଅବର୍ଣ୍ଣନୀୟ ଦୁର୍ଦ୍ଦଶାର ଶୀକାର ହୋଇଛନ୍ତି। ଚାଷୀମାନଙ୍କ ଧାନ ସବୁ ଖେତ,ଖଳା ତଥା ଶୁଖା  ଯାଇଥିବା ସ୍ଥାନରେ ଭିଜି ନଷ୍ଟ ହୋଇଯାଇଛି। ଏପରି ଏକ ଅଭାବନୀୟ ପରିସ୍ଥିତିରେ ଓଡିଶା ସରକାର ଚାଷୀମାନଙ୍କ ସ୍ବାର୍ଥ ଦୃଷ୍ଟିରୁ କୋହଳ ମାନ ଯୋଜନା ( ୟୁ: ଆର୍: ଏସ:) ରେ ସମସ୍ତ ଧାନକୁ ସର୍ବନିମ୍ନ ସହାୟକ ଦରରେ କିଣିନେବା ଘୋଷଣା କରନ୍ତୁ ବୋଲି ପଶ୍ଚିମ ଓଡିଶା କୃଷକ ସଂଗଠନ ସମନ୍ବୟ ସମିତି ତରଫରୁ ଦୃଢ ଦାବି କରାଯାଇଛି।ତା ୦୩.୦୬.୨୦୨୫ରିଖ ବରଗଡ଼ ସ୍ଥିତ ସମତା ଭବନ ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସମନ୍ବୟ ସମିତିର  ଆବାହକ ଦ୍ବୟ ଅଶୋକ ପ୍ରଧାନ ଏବଂ  ଲିଂଗରାଜ ଏହି ଦାବି ଉପସ୍ଥାପନ କରିଛନ୍ତି । ଏହି ସାମ୍ବାଦିକ ସମ୍ମିଳନୀରେ ଆବାହକ ଦ୍ବୟଙ୍କ ବ୍ଯତିତ ପ୍ରବକ୍ତା ସରୋଜ, ଜୟ କିସାନ ଆନ୍ଦୋଳନ ର ସୁଶୀଲ କୁମାର ସାହୁ, ହର ବଣିଆଁ ଏବଂ ଅରୁଣ କୁମାର ସାହୁ ପ୍ରମୁଖ ନେତୃମଣ୍ଡଳୀ ଉପସ୍ଥିତ ଥିଲେ। ଧାନ ଚାଷ ବାବଦକୁ ଉତ୍ପାଦନ ଖର୍ଚ୍ଚ ଇତିମଧ୍ୟରେ ବହୁଗୁଣ ବୃଦ୍ଧି ହୋଇଥିବା ସତ୍ତ୍ବେ ଏଭଳି ଘଡିସନ୍ଧି ମୁହୁର୍ତ୍ତରେ ଚାଷୀମାନଙ୍କୁ ଏକ ମାନ୍'ଧାତା ଅମଳର ପୁରୁଣା ରିଲିଫ କୋର୍ଡ ଆଧାରରେ ଜଣେ ଚାଷୀକୁ ମାତ୍ର ୨ ହେକ୍ଟର ଜମି ବାବଦକୁ  ମାତ୍ର ୨୭ ହଜାର ଟଙ୍କା ଇନ୍ପୁଟ ସହାୟତା ରାଶି ପ୍ରଦାନ ଏକ ଉପହାସ ବୋଲି ଅଭିଯୋଗ କରି ରାଜ୍ୟ ସରକାର ରିଲିଫ କୋର୍ଡ ସଂଶୋଧନ ପୂର୍ବକ କ୍ଷତିଗ୍ରସ୍ତ ଚାଷୀମାନଙ୍କୁ ହେକ୍ଟର ପ୍ରତି ଏକ ଲକ୍ଷ ଟଙ୍କା କ୍ଷତିପୂରଣ ସମସ୍ତ ଜମି ପାଇଁ ପ୍ରଦାନ କରିବାକୁ ସେମାନେ ଦାବି କରିଥିଲେ। ରାଜ୍ୟରେ ମୌସୁମୀର ଆଗମନ ହୋଇ ସାରିଥିବାରୁ ସରକାର ଚାଷୀମାନଙ୍କ ଠାରୁ ଯୁଦ୍ଧକାଳୀନ ଭିତ୍ତିରେ ସପ୍ତାହକ ମଧ୍ୟରେ ସମସ୍ତ ଧାନ କିଣି ନେବା ପାଇଁ ଦାବି କରାଯାଇଛି। ଏପରି ଏକ ଗମ୍ଭୀର ସଂକଟ ସମୟରେ ରାଜ୍ୟ ସରକାର ଚାଷୀମାନଙ୍କ ପ୍ରତି ସହାନୁଭୂତିଶୀଳ ହୋଇ ଆବଶ୍ଯକ ହସ୍ତକ୍ଷେପ ନନେଲେ ଅସହାୟ କୃଷକମାନଙ୍କ ଭିତରେ ଅ-ସୁରକ୍ଷା ଓ କିଙ୍କକର୍ତ୍ତବ୍ଯ ବିମୁଢ ହେବା ଆଶଙ୍କା ଦେଖାଦେଇ ପାରେ ବୋଲି ଚାଷୀ ନେତାମାନେ ମତବ୍ୟକ୍ତ କରିଥିଲେ