14-May-2025

ବଲାଙ୍ଗୀର (ପ୍ରେରଣା ଖବର): ପୁଇନ୍ତଲା ବ୍ଲକ୍ ସ୍ଥିତ ଖମାରମୁଣ୍ଡା ଗ୍ରାମରେ ୭ଦିନ ଧରି ଚାଲିଥିବା ଜଗନ୍ନାଥ ମନ୍ଦିର ପ୍ରତିଷ୍ଠା ଉତ୍ସବ ଉଦ୍‌ଯାପିତ ହୋଇଯାଇଛି। ପବିତ୍ର ନୃସିଂହ ଚତୁର୍ଦଶୀ ଦିନ ଜଗନ୍ନାଥ ମହାପ୍ରଭୁଙ୍କୁ ରତ୍ନ ସିଂହାସନରେ ବିଜେ କରାଯାଇଥିଲା । କଣ୍ଟାବାଞ୍ଜି (ମାତାମଠ) ମହନ୍ତ ଶ୍ରୀନିବାସ ଦାସଙ୍କ ପୌରହିତ୍ୟରେ ଯଜ୍ଞକର୍ତ୍ତା ଆର୍ତତ୍ରାଣ ଷଡଙ୍ଗୀ ଓ ଜ୍ୟୋସ୍ନାମୟୀ ଷଡଙ୍ଗୀ, ୨୪ପ୍ରହରୀ ନାମଯଜ୍ଞକର୍ତ୍ତା ମହେନ୍ଦ୍ର ଭୋଇ ଓ ସୁରୁକୁନି ଭୋଇ, ମୁଖ୍ୟ ଯଜ୍ଞ ପୂଜକ ଭାବେ ମୋନଜ କୁମାର ଷଡଙ୍ଗୀ ଓ ସାଥି ଏବଂ ନାମଯଜ୍ଞ ପୂଜକ ଚିତ୍ତରଂଜନ ଷଡଙ୍ଗୀ ଓ ସାଥୀ କାର୍ଯ୍ୟ ତୁଳାଇଥିଲେ । ଏହି ଅବସରରେ ଯଜ୍ଞ ନାମ ସଙ୍କୀର୍ତନ ପ୍ରବଚନ , ରାମାୟଣ , ପାରାୟଣ, ଗୋପଳିଳା ପଠନ, ସଂଚାର ଅନନ୍ତମୁଖୀ ପାରାୟଣ ବାଣୀ କଣ୍ଠ ଦୁଃଖୀଶ୍ୟାମ ତ୍ରିପାଠୀ ଓ ସାଥି ଭଜନ ସଂଧ୍ୟା ଓ ମୀନାବଜାର ସହିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏଥିରେ  ରାଜ୍ଯ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ.ମୁକେଶ ମହାଲିଙ୍ଗ, ପୁଇନ୍ତଲା ବ୍ଲକ୍ ଅଧ୍ୟକ୍ଷ ସରୋଜ ପଧାନ, ସମାଜସେବୀ ଗୋପାଲଜୀ ପାଣିଗ୍ରାହୀଙ୍କ ସମେତ ଅନ୍ୟାନ୍ୟ ବିଶିଷ୍ଟ ବ୍ୟକ୍ତିଗଣ ଯୋଗ ଦେଇଥିଲେ । ଆଖପାଖ ଅଂଚଳର ବହୁ ଲୋକଙ୍କ ସମାଗମ ସହ ଗ୍ରାମର ସମସ୍ତ ବ୍ୟକ୍ତିଙ୍କର ସକ୍ରିୟ ସହେଯାଗରେ କାର୍ଯ୍ୟକ୍ରମଟି ସୁଚାର ରୂପେ ସମାପିତ ହୋଇଥିଲା ।