16-Apr-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ଼ ସ୍ଥିତ ଗଙ୍ଗାଧର ନଗର ଏ.ଇ.ଏମ ଇଂଲିଶ ମିଡିୟମ ସ୍କୁଲର ବାର୍ଷିକୋତ୍ସବ ମହାସମାରୋହରେ ପାଳିତ ହୋଇଯାଇଛି। ଏହି ଉତ୍ସବରେ ସମ୍ମାନିତ ଅତିଥି ଭାବରେ ବରଗଡ଼ ଲୋକସଭା ସାଂସଦ ଶ୍ରୀ ପ୍ରଦୀପ ପୁରୋହିତ ଓ ବରଗଡ଼ ବିଧାୟକ ଶ୍ରୀ ଅଶ୍ୱିନୀ କୁମାର ଷଡ଼ଙ୍ଗୀ ଯୋଗଦାନ କରିଥିଲେ । ମାନ୍ୟବର ସାଂସଦ ତାଙ୍କ ବକ୍ତବ୍ୟରେ ଶିକ୍ଷାର ମହତ୍ତ୍ଵ ପ୍ରତିପାଦିତ କରିଥିଲେ। ମାନ୍ୟବର ବିଧାୟକ ସମସ୍ତଙ୍କ ପାଇଁ ସହଜ ଓ ସୁଲଭ ଶିକ୍ଷା ଉପରେ ଗୁରୁତ୍ଵ ଦେଇଥିଲେ। ବିଦ୍ୟାଳୟର ଚେୟାରମେନ ଡ. ଜଶବୀର ସିଂ ସଭାରେ ଅଧ୍ୟକ୍ଷତା କରିଥିବା ବେଳେ ପ୍ରିନ୍ସିପାଲ ଶ୍ରୀ ପ୍ରଦୀପ କୁମାର ମିଶ୍ର ବାର୍ଷିକ ବିବରଣୀ ପାଠ କରିଥିଲେ ଓ ଟ୍ରଷ୍ଟି ମନୋରଞ୍ଜନ ମିଶ୍ର ଧନ୍ୟବାଦ ଅର୍ପଣ କରିଥିଲେ । ବିଦ୍ୟାଳୟର ଶ୍ରେଷ୍ଠ କୃତୀ ଛାତ୍ର/ଛାତ୍ରୀ ହିସାବରେ ସବ୍ ଜୁନିୟର ବିଭାଗରେ ଆରାଧ୍ୟା ସାହୁ, ଜୁନିୟର ବିଭାଗରେ ଶୁଭଲକ୍ଷ୍ମୀ ଦୀପ ଓ ସିନିୟର୍ ବିଭାଗରେ ଶିଳ୍ପୀ କୁମାରୀ ଶାହ ପୁରସ୍କୃତ ହୋଇଥିଲେ। ପ୍ରତ୍ୟେକଙ୍କୁ ବିଦ୍ୟାଳୟ ତରଫରୁ ୨୧୦୦/- ଟଙ୍କାର ଚେକ୍ ପ୍ରଦାନ କରାଯାଇଥିଲା। ବିଦ୍ୟାଳୟ ର ଛାତ୍ର ସାଇ ଅମନ୍ ଙ୍କୁ ଓଲିମ୍ପିଆଡ ପରୀକ୍ଷାରେ ରାଜ୍ୟସ୍ତରରେ ପ୍ରଥମ ଓ ଇଣ୍ଟରନେସନାଲ ସ୍ତରରେ ଦ୍ଵିତୀୟ ସ୍ଥାନ ଅଧିକାର କରି ଥିବାରୁ ୭୫୦୦/- ଟଙ୍କାର ଚେକ୍ ପ୍ରଦାନ  କରାଯାଇଥିଲା। ଶ୍ରୀ ସନ୍ତୋଷ ସାହୁଙ୍କ ଦ୍ଵାରା ନିର୍ଦ୍ଦେଶିତ ଏକ ଭିନ୍ନ ସ୍ଵାଦର ନାଟକ  'ସୁଟିଂ ଚାଲିଛେ’ ଛାତ୍ର ଛାତ୍ରୀଙ୍କ ଦ୍ଵାରା ପ୍ରଦର୍ଶିତ ହୋଇ ଉଚ୍ଚ ପ୍ରଶଂସିତ ହୋଇଛି ।