15-Feb-2025

ଯାଜପୁର, ସେତୁ ନିର୍ମାଣ ହୋଇଛି ହେଲେ ବାଡ଼ା ନିର୍ମାଣ ହୋଇନାହିଁ । ନିର୍ମାଣ ସମୟର ତ୍ରୁଟି ଯୋଗୁ ଏବେ ବିପଦକୁ ଆଁ କରି ଅନାଇଛି ଏହି ସେତୁ । ବରୀ ନିର୍ବାଚନ ମଣ୍ଡଳୀ ଯାଜପୁର ବ୍ଲକ ଶିବାଛକରୁ ଏହି ମୁକୁଳା ସେତୁ ଦେଇ ଦୈନିକ ଶହ ଶହ ସଂଖ୍ୟାରେ ଲୋକ ଇନ୍ଦାରୋଇ, ବାଙ୍କସାହି, ରୁଦ୍ରପୁର, ଗୋବର୍ଦ୍ଧନପୁର, ଜୁଣୁଙ୍ଗା, ଖରିପଡ଼ିଆ ପ୍ରଭୃତି ଗ୍ରାମକୁ ଗତାଗତ କରୁଛନ୍ତି । ବହୁ ସଂଖ୍ୟାରେ ଛାତ୍ରଛାତ୍ରୀ ଏହି ମୁକୁଳା ସେତୁ ଦେଇ ବିଭିନ୍ନ ସ୍କୁଲ ଓ କଲେଜକୁ ମଧ୍ୟ ଗତାଗତ କରୁଛନ୍ତି । ସପ୍ତାହରେ ଦୁଇଦିନ ବସୁଥିବା ହାଟକୁ ମଧ୍ୟ ବହୁ ଲୋକ ଏହି ସେତୁ ଦେଇ ଆସୁଛନ୍ତି । ଏହି ସେତୁରେ ବାଡ଼ା ନଥିବାରୁ ବିଭିନ୍ନ ସମୟରେ ଅସାବଧାନତା ଯୋଗୁ କିଛି ଲୋକ ମଧ୍ୟ ଗଳି ପଡିଥିବାର ନଜିର ରହିଛି । ତେଣୁ ଏହି ମୁକୁଳା ସେତୁରେ ତୁରନ୍ତ ଉଚ୍ଚା ବାଡ଼ା ନିର୍ମାଣ କରିବାକୁ ପ୍ରଶାସନ ପଦକ୍ଷେପ ନେବାକୁ ସମାଜସେବୀ ପ୍ରଫୁଲ୍ଲ ଚନ୍ଦ୍ର ନାୟକ, ନରେନ୍ଦ୍ର ଭୂୟାଁ, ପ୍ରକାଶ ରାଉତ, ଅଭିମନ୍ୟୁ ରାଉତ ପ୍ରମୁଖ ଦାବି କରିଛନ୍ତି ।

(ରଞ୍ଜିତ ମହାନ୍ତି)