11-Feb-2025

ଅତାବିରା(ଆକାଶ ମିଶ୍ର):  ଅତାବିରା କଲେଜର ୪୪ ତମ ବାର୍ଷିକ ଉତ୍ସବ ପାଳନ ଅବସରରେ କେନ୍ଦୁଝର କଲେଜର  ଅବସରପ୍ରାପ୍ତ ପ୍ରଫେସର ନରେନ୍ଦ୍ର କୁମାର ପ୍ରଧାନ ମୁଖ୍ୟ ବକ୍ତା ଭାବରେ ଯୋଗ ଦେଇ ଛାତ୍ରଛାତ୍ରୀ ମାନଙ୍କ ମଧ୍ୟରେ ଶୃଙ୍ଖଳା ଜ୍ଞାନର ବିକାଶ ତଥା  ସମାଜ ତଥା ଦେଶ ଗଠନରେ ତାଙ୍କର ଭୂମିକା  ଉପରେ ଆଲୋକପାତ କରି କହିଥିଲେ ସାମ୍ପ୍ରତିକ  ସ୍ଥିତିରେ ଛାତ୍ରଛାତ୍ରୀ ମାନେ ନିଜର  ଦାୟିତ୍ଵ ପ୍ରତି ଅଧିକ  ଯତ୍ନବାନ ହେବାର ଆବଶ୍ୟକତା ରହିଛି । ଅତାବିରା ମହା ବିଦ୍ୟାଳୟର ଅଧ୍ୟକ୍ଷ ଅଶ୍ଵିନୀ କୁମାର ପ୍ରଧାନଙ୍କ  ଅଧ୍ୟକ୍ଷତାରେ ଆୟୋଜିତ ଏହି ଉତ୍ସବରେ ସ୍ଥାନୀୟ ବିଧାୟକ ନିହାର ରଞ୍ଜନ ମହାନନ୍ଦ ମୁଖ୍ୟ ଅତିଥି ଭାବରେ ଯୋଗ ଦେଇ ଛାତ୍ରଛାତ୍ରୀ ମାନଙ୍କ ଭବିଷ୍ୟତ ଗଠନ ପାଇଁ ଉପଯୁକ୍ତ ମାର୍ଗ ଦର୍ଶନ କରିବା ସହ ସହିଦ ଜନାର୍ଦ୍ଦନ ସିଂ ଙ୍କ ଉପରେ ଉଚିତ୍ ଗବେଷଣା ହେବା ଆବଶ୍ୟକ ବୋଲି କହିଥିଲେ।ଏହା ବ୍ୟତୀତ  ଯୁକ୍ତ ତିନି କଳା ଓ ବିଜ୍ଞାନ ପାଇଁ ନୂତନ କୋଠଘର ନିର୍ମାଣ ପାଇଁ ସରକାରଙ୍କ ପକ୍ଷରୁ ୩କୋଟି  ୮୨ଲକ୍ଷ ଟଙ୍କା ମଞ୍ଜୁରୀ ହୋଇଛି ବୋଲି  ଘୋଷଣା କରିଥିଲେ । ଅନୁଷ୍ଠାନର ସର୍ବାଙ୍ଗୀନ ବିକାଶ ପାଇଁ ଯାହା କିଛି ଆବଶ୍ୟକ ତାହା ପୁରଣ କରିବା ଦିଗରେ ବିହୀତ ପଦକ୍ଷେପ ନେବେ ବୋଲି ଶ୍ରୀ ମହାନନ୍ଦ ନିଜ ବକ୍ତବ୍ୟରେ  କହିଥିଲେ। ଅଧ୍ୟାପକ ପରମାନନ୍ଦ ରଥ  ମଞ୍ଚ ପରିଚାଳନା କରିଥିଲେ । ଏହି ଉତ୍ସବ ପାଳନ ଅବସରରେ ମହା ବିଦ୍ୟାଳୟର +୨ ଓ +୩ କଳା ଓ ବିଜ୍ଞାନର ଛାତ୍ରଛାତ୍ରୀ ମାନେ ବିଭିନ୍ନ କ୍ଷେତ୍ରରେ  ପାରଦର୍ଶିତା ହାସଲ କରିଥିବା ଯୋଗୁଁ ୨୫୦ ରୁ ଅଧିକ ଛାତ୍ରଛାତ୍ରୀଙ୍କୁ ମାନପତ୍ର ଦେଇ ସମ୍ବର୍ଦ୍ଧିତ କରା ଯାଇଥିଲା। ଅଧ୍ୟାପକ ସୂର୍ଯ୍ୟନାରାୟଣ ବିଶ୍ଵାଳ ଧନ୍ୟବାଦ୍ ଅର୍ପଣ କରିଥିଲେ । ବାର୍ଷିକ ଉତ୍ସବର ଦ୍ଵିତୀୟ ପର୍ଯ୍ୟାୟର ଅଧ୍ୟକ୍ଷ ଶ୍ରୀ ପ୍ରଧାନ ଓ ଅଧ୍ୟାପିକା ରିଙ୍କି ପ୍ରଧାନଙ୍କ ନିର୍ଦ୍ଦେଶନାରେ" ସ୍କୁଲ୍  ଚଲେ ହମ୍ " ଉପରେ ଲଘୁ ନାଟିକା , "ସେଭ୍ ଗାର୍ଲ୍ ଚାଇଲ୍ଡ " ସଚେତନଧର୍ମୀ କ୍ଷୁଦ୍ର ନାଟକ ପରିବେଷିତ ହୋଇଥିଲା ଯାହା  ସମସ୍ତଙ୍କ ମନକୁ ବେଶ୍ ପ୍ରଭାବିତ କରିଥିଲା । ଏହାପରେ ସାଂସ୍କୃତିକ କାର୍ଯ୍ୟକ୍ରମରେ ବିଭିନ୍ନ ଭାଷା ଓ ସମ୍ପ୍ରଦାୟର  ୪୦ ଗୋଟି ନୃତ୍ୟ ପରିବେଷିତ ହୋଇଥିଲା । ମହାବିଦ୍ୟାଳୟର ସମସ୍ତ ଅଧ୍ୟାପକ ଅଧ୍ୟାପିକା, କର୍ମଚାରୀ ଏହାକୁ ସହଯୋଗ କରିଥିଲେ ।