08-Jan-2025

ବଲାଙ୍ଗୀର (ପ୍ରେରଣା ଖବର):

'ଯେହେତୁ ସୁଯୋଗ ମିଳିଲା ତେଣୁ ମୁଁ ଆଉଥରେ ନାଟକ ଦେଖିବାକୁ ଆସିଛି । ନାଟକ ଓ ନୃତ୍ୟ ଭିନ୍ନ ଭାବରେ ଜୀବନକୁ ପ୍ରତିଫଳିତ କରୁଛି । ଆମେ ଯେତେଦିନ ପାଇଁ ପୃଥିବୀକୁ ଆସିଛୁ ଟିକେ ଭାବିବା ଯେ, ଆମେ ଯାହା ଏହି ମାଟିରୁ ନେଇଛୁ କିପରି ତାହା ଫେରେଇପାରିବା । ମାଟିପାଇଁ ଗର୍ବିତ ନହୋଇ ଯଦି ଆମେ କୃତଜ୍ଞ ହେବା ତାହାହେଲେ ଏହା ଆମସମସ୍ତଙ୍କ ମଙ୍ଗଳମୟ ହେବ । ଯେଉଁଭଳି ଭାବରେ ସମସ୍ତ କ୍ଷେତ୍ରରୁ ବାଛି ବାଛି ମଠଖାଇ ସମ୍ମାନ ପ୍ରଦାନ କରୁଛନ୍ତି, ଆପଣଙ୍କ ଏହି ସାଧୁବାଦ ପାଇଁ ଅନେକ ଅନେକ ସାଧୁବାଦ' ।

 ଆଜି ସନ୍ଧ୍ୟାରେ ଭୂମିକା ଅନୁଷ୍ଠାନ ତରଫରୁ ସ୍ଥାନୀୟ କୋଶଳ କଳା ମଣ୍ଡଳ ପଡିଆ ଠାରେ ଆୟୋଜିତ ସର୍ବଭାରତୀୟ ବହୁଭାଷୀ ନାଟ୍ୟ ସମାରୋହ ମଠଖାଇ ମହୋତ୍ସବର ଚତୁର୍ଥ ସନ୍ଧ୍ୟାରେ  ମୁଖ୍ୟ ଅତିଥି ଭାବେ ଯୋଗ  ଏହା କହିଛନ୍ତି ଦୈନିକ  ଖବରକାଗଜ ଧରିତ୍ରୀ ର ସମ୍ପାଦକ ତଥାଗତ ସତପଥୀ l  ସମ୍ମାନିତ ଅତିଥି ଭାବେ 

ନାଟ୍ୟଭୂଷଣ ଜଗଦାନନ୍ଦ ଛୁରିଆ ଯୋଗ ଦେଇ ନିଜ ବକ୍ତବ୍ୟରେ  ବାଲାଙ୍ଗୀରର ସମସ୍ତ ସଂଗଠନ ମିଶି ଏହି ନାଟକ ଆନ୍ଦୋଳନକୁ ଆଗେଇ ନେଉଛନ୍ତି, ଏହା ନିଶ୍ଚିତ ସାଧୁବାଦର ହକଦାର ବୋଲି ମତ ଦେଇଥିଲେ | ଆଜିଯାଏଁ ୮୧ ଟି ନାଟକ ଏହି ମହୋତ୍ସବର ୧୬ ବର୍ଷରେ ନିଜର ଅଭିନୟ ପରିବେଷଣ କରିଛନ୍ତି l ଏହି ମହୋତ୍ସବ ନିଶ୍ଚୟ ନିଜର ଛୋଟ ଛୋଟ ପାହୁଣ୍ଡ ପକେଇ ଆଗକୁ ଯିବ | ଏହା ଦିଆନିଆ ଓ ମିଳାମିଶାର ପର୍ବ l କଳାକାର ସମାଜର ନିଶ୍ଚୟ ଆଗଧାଡିର ବ୍ୟକ୍ତି ଏଥିରେ ତିଳେମାତ୍ର ସନ୍ଦେହ ନାହିଁ ବୋଲି ଶ୍ରୀ ଛୁରିଆ ମତ ରଖିଥିଲେ |  ମଠଖାଇ ମହୋତ୍ସବର ଅଧ୍ୟକ୍ଷ ନରସିଂହ ମିଶ୍ର ମଞ୍ଚାସୀନ ରହି ଉପସ୍ଥିତ ନାଟ୍ୟପ୍ରେମୀ ଓ କଳାକାର ମାନଙ୍କୁ ଉତ୍ସାହିତ କରିଥିଲେ l

  ଅନ୍ୟତମ ସମ୍ମାନିତ ଅତିଥି ଭାବେ ପ୍ରଫେସର ମଧୁସୂଦନ ପତି ଯୋଗ ଦେଇ  ମଣିଷ ମଂଚାସୀନ ହେଲେ ମଞ୍ଚାଧୀନ ହୁଏ ବୋଲି କହିଥିଲେ | ୧୬ ବର୍ଷ ଅତିକ୍ରାନ୍ତ କରି ମଠଖାଇ ମହୋତ୍ସବ ଆଜି ଯୁବକ ହେଇଗଲା | ସଂସାରରେ କେହିବି ଅପରିହାର୍ଯ୍ୟ ନୁହେଁ ତେଣୁ ଏହି ମହୋତ୍ସବ ନିଶ୍ଚୟ ଆଗକୁ ଯିବ କେହି ଥାଉ ବା ନଥାଉ | ନାଟକ ପ୍ରଶାନ୍ତି ଓ ପରିତୃପ୍ତି ପ୍ରଦାନ କରେ ବୋଲି ଶ୍ରୀ ପତି କହିଥିଲେ l ଏହି ମହୋତ୍ସବ ବାଲାଙ୍ଗୀରର ସମସ୍ତଙ୍କୁ ଏକାକାର କରିବାରେ ସମର୍ଥ ହୋଇଛି ବୋଲି ଶ୍ରୀ ପତି ଦୋହରାଇ ଥିଲେ |

'ଭୂମିକା' ର ସଭ୍ୟ ଚିତ୍ତରଞ୍ଜନ ଦାସଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ଭୂମିକାର ସମ୍ପାଦକ ଅଶୋକ ଦାସ ପ୍ରାରମ୍ଭିକ ଭାଷଣ ଦେଇଥିଲେ l ଆଜିର ମଞ୍ଚକୁ ପ୍ରଖ୍ୟାତ ମଞ୍ଚ କଳାକାର 

ସ୍ଵର୍ଗତ ଗୋପାଳ ସାହୁ (ଏଲି)ଙ୍କ ସ୍ମୃତିରେ  ସମର୍ପିତ କରଯାଇଥିଲା  l ଏହି ଅବସରରେ ଶବ ଦାହକ  ଜୟନ୍ତ ବାଗ ଙ୍କୁ ମଠଖାଇ ସମ୍ମାନ ପ୍ରଦାନ କରାଯାଇଥିଲା l  ଭୂମିକାର ସଭ୍ୟ ଜିତେନ୍ଦ୍ରିୟ ତ୍ରିପାଠୀ ମାନପତ୍ର ପଠନ କରିଥିଲେ  l ବଲାଙ୍ଗୀରର ସଂଜ୍ୟୋତ କଳାକେନ୍ଦ୍ର ଦ୍ଵାରା ପରିବେଷିତ ନୃତ୍ୟ 'ବଜାସାଲ' ବେଶ ଆକର୍ଷଣୀୟ ହୋଇଥିଲା l  ଶେଷରେ ଜାମସେଦପୁରର ଝାରଖଣ୍ଡ ସାଂସ୍କୃତିକ ମଞ୍ଚ ଦ୍ଵାରା ପ୍ରସ୍ତୁତ ତଥା ଶିବଲାଲ ସାଗରଙ୍କ  ନିର୍ଦ୍ଦେଶନାରେ ହିନ୍ଦୀ  ନାଟକ 'ସୂର୍ଯ୍ୟ କେ ଅନ୍ତିମ କିରଣ ସେ ସୂର୍ଯ୍ୟ କେ ପହଲି କିରଣ ତକ' କୁ ଦର୍ଶକ ମାନେ ଉପଭୋଗ କରିଥିଲେ l ଆଜି ପୂର୍ବାହ୍ନରେ  କୋଶଳୀ ନାଟକ 'ଉଲପି'  ର ସମୀକ୍ଷା କରାଯାଇଥିଲା l ଆସନ୍ତାକାଲି  ହେଉଛି ମଠଖାଇ ମହୋତ୍ସବର ଉଦଯାପନୀ ଦିବସ l